ခီဖျိတတါကၠိတၢ်သမံသမိးတြဲၤအဃိ ကမျၢၢ်အိၣ်ဘူးဖဲန့ၣ်သ့ၣ်တဖၣ်ထံၣ်ဘၣ်တၢ်ကီတၢ်ခဲ

လါဒံၣ်စ့ဘၢၣ် ၁ သီႇ ၂၀၂၁ နံၣ်ႇ ခ့ၣ်အဲးစံၣ်

ခီဖျိပယီၤသုးအိးထီၣ်တၢ်သမံသမိးလီၢ်ဖဲကညီကီၢ်စဲၣ် ကီးတရံး၀့ၢ်ကပၤ တတါကၠိသ၀ီပူၤႇ သမံသမိး၀ဲသိလ့ၣ်လၢလံာ်လဲၢ်တအိၣ်ဘၣ်သ့ၣ်တဖၣ်ဟဲအါထီၣ်ဒီး ခီဖျိလၢဒူသ၀ီအပူၤစ့ၢ်ကီး တၢ်ဖိတၢ်လံၤအၦ့ၤထီၣ်အဃိ သ၀ီဖိတဖၣ်ထံၣ်ဘၣ်တၢ်ကီတၢ်ခဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

တၢ်သမံသမိးတြဲၤလီၢ်အံၤအိးထီၣ်၀ဲဒ်သိးကသမံသမိး၀ဲပနံာ်တၢ်ဖိတၢ်လံၤလၢအတဖိးသဲစးသ့ၣ်တဖၣ်တုၤလီၤတီၤလီၤဘၣ်ဆၣ်သနါက့ ခီဖျိသမံသမိးဖီၣ်ဃုာ်စ့ၢ်ကီးဒီးလီၢ်က၀ီၤကမျၢၢ်လၢအအိၣ်ဘူးဖဲန့ၣ်အသိလ့ၣ်ႇဆဲးကဲးတဖၣ်အဃိ ၦၤသ၀ီဖိတဖၣ်လဲၤၦ့ၤတၢ်လၢ၀့ၢ်ပူၤတဘူၣ်လၢၤဘၣ်ဒီးလၢဒူသ၀ီပူၤတၢ်ဖိတၢ်လံၤအၦ့ၤထီၣ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ

ၦၤလၢအဟးဆါတၢ်အီၣ်တၢ်အီတၢ်ဖိတၢ်လံၤလၢသ၀ီပူၤတဂၤစံး၀ဲ“ခဲအံၤမတၤတဂၤမးလဲၤလၢ၀့ၢ်ပူၤတဘူၣ်လၢၤဘၣ်ႉ မ့လဲၤန့ၣ်ဘၣ်ငါ၀ဲသိလ့ၣ်ႇ ဆဲးကဲးလၢအလံာ်အိၣ်တဖၣ်လီၤမီၤနီၤႉ ခီဖျိဘၣ်ဟ့ၣ်အလဲဒိၣ်အဃိ တၢ်ဖိတၢ်လံၤသ့ၣ်တဖၣ်အၦ့ၤထီၣ်၀ဲလီၤ
ႉ
လၢမၠၣ်၀တံၣ်နါက့ခဲအံၤလံာ်လဲၢ်မ့တအိၣ်ဘၣ်န့ၣ်လဲၤတဘူၣ်ဘၣ်အဃိ လၢ၀့ၢ်ပူၤနါက့တၢ်ဖိတၢ်လံၤအၦ့ၤထီၣ်စ့ၢ်ကီး၀ဲလီၤႉ ခဲအံၤစ့ၢ်ကီးမုၢ်ကျိၤ၀ဲၤကွာ်တဘၣ်ဂီၢ်ဘၣ်ဒွါတမၠိ ခီဖျိအ၀ဲသ့ၣ်ဖီၣ်သိလ့ၣ်ႇ ဆဲးကဲးလၢလံာ်လဲၢ်တအိၣ်ဘၣ်ဒ်အံၤအဃိမၤအီၣ်တၢ်တဘၣ်ဂီၢ်နီတမံၤလၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

တတါကၠိတၢ်သမံသမိးတြဲၤလၢအအိၣ်ဖဲကီးတရံး၀့ၢ်ဒီး ၉ တၢၣ်အဘၢၣ်စၢၤအံၤ ပယီၤသုးႇပၢၤကီၢ်သုးႇမီၤတီၤပံၤကဲၤဃုာ်ဒီး(လ၀က)တဖၣ်သမံသမိး၀ဲသိလ့ၣ်ႇဆဲးကဲးလၢအလံာ်လဲၢ်တအိၣ်ဘၣ်သ့ၣ်တဖၣ်န့ၣ်လီၤႉ လၢန့ၣ်အမဲာ်ညါ ၦၤလၢအသိၣ်လ့ၣ်လံာ်လဲၢ်တအိၣ်ဘၣ်သ့ၣ်တဖၣ်ဃ့အီၣ်လိး၀ဲစ့အါန့ၢ်(၅)ကလးကၠးအဂ့ၢ်န့ၣ် သ့ၣ်ညါဘၣ်လၢၦၤလၢအသဂၢၢ်ဘၣ်ဒီးတၢ်အံၤတဂၤအအိၣ်န့ၣ်လီၤႉ

လၢန့ၣ်အမဲာ်ညါဖဲတတါကၠိတၢ်သမံသမိးတြဲၤအံၤ တၢ်ကသမံသမိးဖီၣ်၀ဲသိလ့ၣ်ႇကျိချံၦာ်သၣ်ႇ တၢ်မၤပိၢ်ဖးထီၣ်တၢ်ဖိတၢ်လံၤႇကသံၣ်မူၤဘှီးဒီးတၢ်ကူၣ်လဲၤမၤကၤတၢ်ဖိတၢ်လံၤလၢအတဖိးသဲစးဘၣ်အမဲာ်ညါ ဆၣ်ဖိကီၢ်ဖိဒီးတၢ်ဖိတၢ်လံၤလၢအဟးထီၣ်လၢဆၣ်ဖိကီၢ်ဖိအအိၣ်တဖၣ်ႇၦၤနုာ်လီၤဟးထီၣ်လၢအတဖိးသဲစးသ့ၣ်တဖၣ်အဂ့ၢ် ကီၢ်စဲၣ်သုးကီၣ်ကးခိၣ်စီၤမၠ့ၣ်အူစံးဘၣ်၀ဲၤကျိၤဘၣ်ထွဲသ့ၣ်တဖၣ်န့ၣ်လီၤႉ