လါဒံၣ်စ့ဘၢၣ် ၇ သီႇ ၂၀၂၁ နံၣ်ႇ ခ့ၣ်အဲးစံၣ်
ဖဲမဟါလါဒံၣ်စ့ဘၢၣ် ၆ သီ ဟါခီ ၆ နၣ်ရံၣ်ဘျဲၣ်အဆၢကတီၢ် မ့ၣ်ပိၢ်ပိၢ်ဖးထီၣ်တပယူာ်ဃီလၢကညီကီၢ်စဲၣ် ဖၣ်အၣ်၀့ၢ်က၀ီၤဒ့(၅)ပူၤဒီး ဖဲန့ၣ်ကမျၢၢ်တဂၤဘၣ်ဒိ၀ဲတဆံးတက့ၢ်အဂ့ၢ်န့ၣ် ဖၣ်အၣ်လီၢ်က၀ီၤဖိတဂၤပာ်ဂၢၢ်ပာ်ကျၢၤစံး၀ဲန့ၣ်လီၤႉ
တၢ်ကဲထီၣ်သးန့ၣ်ဖဲဖၣ်အၣ်၀့ၢ်က၀ီၤဒ့(၅)ဖၠၣ်စိမိၤကျဲႇဘၣ်ဖဲၦၤတဂၤဆၢထၢၣ်ဖဲဆဲးကဲးကပၤအခါန့ၣ် ၦၤခံဂၤဟဲဒိး၀ဲဒီးဆဲးကဲးကွံာ်လီၤ၀ဲတၢ်ဘိၣ်တဘိၣ်ဒီး ၦၤလၢအဆၢထၢၣ်ဖဲဆဲးကဲးကပၤတဂၤအံၤထူဖျိးကွံာ်၀ဲအခါမ့ၣ်ပိၢ်ဖးထီၣ်၀ဲအဂ့ၢ်န့ၣ် ဖၣ်အၣ်၀့ၢ်ဖိတဂၤစံး၀ဲဒ်အံၤန့ၣ်လီၤႉ
“ဖဲန့ၣ်ကျးကၣ်ဆါတၢ်ညၣ်အိၣ်တဖျၢၣ်လီၤႉ ဆဲးကဲတခိၣ်အိၣ်ပတုာ်၀ဲဖဲကျးတဖျၢၣ်န့ၣ်အကပၤႇဖဲဆဲးကဲးကပၤန့ၣ်အိၣ်၀ဲဒီးၦၤတဂၤလီၤႉ ၦၤတဂၤအံၤထံၣ်၀ဲလၢၦၤဟဲကွံာ်လီၤမ့ၣ်ပိၢ်တဖျၢၣ်အဃိ အ၀ဲလဲၤကရီထူးဖျိးကွံာ်၀ဲလီၤႉ မ့ၣ်ပိၢ်ပိၢ်ဖးထီၣ်အခါန့ၣ်အခီၣ်ဘၣ်ဒိတစဲးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
ၦၤလၢအဟဲကွံာ်လီၤမ့ၣ်ပိၢ်တဖၣ်ဟဲသိး၀ဲဒီးကမျၢၢ်ကူကၤႇစိာ်ဃုာ်စ့ၢ်ကီးဒီးကျိ၀ံၤကွံာ်စိဃီၤ၀ဲမ့ၣ်ပိၢ်အဂ့ၢ်ႇ ဖဲအကွံာ်လီၤမ့ၣ်ပိၢ်၀ံၤဟးထီၣ်အခါမ့ၣ်ပိၢ်ပိၢ်ဖးထီၣ်ကဒီးတဖျၢၣ်ဖဲဖၠၣ်စိမိၤကၠိမဲာ်ညါကျဲမ့ၣ်အူပတုာ်(မံပွဲၣ်)ဒီး ပိၢ်ဖးထီၣ်ကဒီးသၢဖျၢၣ်တဖျၢၣ်ဖဲ(အထက ၃)ကၠိမဲာ်ညါအဂ့ၢ်န့ၣ် ဖၣ်အၣ်၀့ၢ်ဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ
အပူၤကွံာ်ဖၣ်အၣ်၀့ၢ်ပူၤန့ၣ်တၢ်ဟ့ၣ်အခွဲးဟးထီၣ်ဟးလီၤန့ၢ်တုၤ၀ဲဖဲမုၢ်နၤခီ ၈ နၣ်ရံၣ်လီၤဒီး ဘၣ်ဆၣ်စးထီၣ်ဖဲအပူၤကွံာ်လါနိၣ်၀့ဘၢၣ် ၇ သီအနံၤ လၢအလီၤဘၣ်၀ဲကညီကီၢ်စဲၣ်မုၢ်နံၤန့ၣ် တၢ်ဟ့ၣ်အါထီၣ်တၢ်ဟးထီၣ်ဟးလီၤအခွဲးတုၤလၢမုၢ်နၤခီ ၁၀ နၣ်ရံၣ်န့ၣ်လီၤႉ ခီဖျိမ့ၣ်ပိၢ်အံၤပိၢ်ဖးထီိၣ်၀ဲလၢမုၢ်ဟါခါၦၤဟးထီၣ်ဟးလီၤအါအဆၢကတီၢ်အဃိ သုးမီၤစိရိၤအသိလ့ၣ်သ့ၣ်တဖၣ်ဟးဆှၣ်တၢ်အိၣ်၀ဲအဂ့ၢ်န့ၣ် ၦၤအိၣ်၀့ၢ်ပူၤတဖၣ်စံး၀ဲန့ၣ်လီၤႉ
ဒ်န့ၣ်အသိးဖဲအပူၤကွံာ်လါဒံၣ်စ့ဘၢၣ် ၄ သီအနံၤစ့ၢ်ကီး မ့ၣ်ပိၢ်ပိၢ်ဖးထီၣ်လၢဖၣ်အၣ်၀့ၢ်နီၣ်ဂံၢ်(၃)တီၤထီကၠိအမဲာ်ညါဒီးတၢ်ဘၣ်ဒိဘၣ်ထံးတအိၣ်၀ဲနီတမံၤဘၣ်န့ၣ်လီၤႉ
