လါယနူၤအါရံၤ ၁၃ သီႇ ၂၀၂၂ နံၣ်ႇ ခ့ၣ်အဲးစံၣ်
ဖဲတနံၤအံၤလါယနူၤအါရံၤ ၁၃ သီ ဂီၤခီ ၁း၁၀ မံးနံးအဆၢကတီၢ် ခီဖျိပယီၤသုးမီၤစိရိၤအကဘီယူၤဟဲကွံာ်လီၤကဒီးမ့ၣ်ပိၢ်လၢခ့ၣ်အဲၣ်ယူၣ်တၢ်ပၢဟီၣ်က၀ီၤ မုၢ်တြီၢ်ကီၢ်ရ့ၣ် သုးက့(၅) ဒွဲၣ်လိကီၢ်ဆၣ် ၀ီၢ်မုၢ်သ၀ီကရူၢ် စွ့ၤညီၤပ့ၤသ၀ီပူၤအဃိ လီၢ်က၀ီၤဖိသံ၀ဲ(၁)ဂၤႇဘၣ်ဒိ၀ဲ(၃)ဂၤအဂ့ၢ်န့ၣ် လီၢ်က၀ီၤခ့ၣ်အဲၣ်ယူၣ်(သုးက့ ၅)ၦၤဘၣ်မူဘၣ်ဒါစံး၀ဲန့ၣ်လီၤႉ
တၢ်လီၢ်လၢပယီၤသုးမီၤစိရိၤဟဲကွံာ်လီၤမ့ၣ်ပိၢ်အလီၢ်န့ၣ် မ့ၢ်၀ဲဒၣ်ခ့ၣ်အဲၣ်ယူၣ်(သုးက့ ၃)ဟီၣ်က၀ီၤဆၢဒီး ခီဖျိကွံာ်လီၤ၀ဲလိၤလိၤဆူဒူသ၀ီပူၤအဃိ လီၢ်က၀ီၤသ၀ီဖိတဖၣ်သံဘၣ်ဒိဘၣ်ထံးအိၣ်၀ဲအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)ဒုးယၤဒိၣ် သုးခိၣ်ဒိၣ်စိ စီၤထူကဆှီ စံးဘၣ်ခ့ၣ်အဲးစံၣ်န့ၣ်လီၤႉ
အ၀ဲစံး၀ဲလၢ“တဂီၤညါအံၤအ၀ဲသ့ၣ်ဟဲကွံာ်လီၤ၀ဲဖဲ(သုးက့ ၃)စွ့ၣ်ကၠ့ၣ်ကီၢ်ဆၣ်အဆၢမီၤနီၤႉ ဘၣ်ဆၣ်ဖဲ(သုးက့ ၅)ဟီၣ်က၀ီၤအပူၤလီၤႉ ၦၤကိး၀ဲဒၣ်လၢစွ့ၣ်ညီၤပ့ၤမီၤနီၤႉ ၦၤဘၣ်ဒိဘၣ်ထံးန့ၣ်ထဲသ၀ီဖိတဖၣ်လီၤ”အဂ့ၢ်န့ၣ် သုးခိၣ်ဒိၣ်စိ စီၤထူကဆှီ စံး၀ဲန့ၣ်လီၤႉ
ခီဖျိပယီၤသုးမီၤစိရိၤအကယူၤ(၂)ဘ့ၣ်ဟဲကွံာ်လီၤမ့ၣ်ပိၢ်(၄)ဖျၢၣ်အဃိ လီၢ်က၀ီၤသံဘၣ်ဒိဘၣ်ထံးအိၣ်၀ဲတကးဒံးဘၣ်အမဲာ်ညါ တၢ်သူၣ်ထီၣ်ဟးဂီၤစ့ၢ်ကီး(၅)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ်တၢ်ကစီၣ်ဒီးတၢ်ဘိးဘၣ်ရၤလီၤ၀ဲၤကျိၤ ထုးထီၣ်ပာ်ဖျါ၀ဲဖဲတနံၤအံၤဂီၤခီအဆၢကတီၢ်န့ၣ်လီၤႉ
ခ့ၣ်အဲၣ်ယူၣ်(သုးက့ ၅)ဟီၣ်က၀ီၤ ဒွဲၣ်လိကီၢ်ဆၣ်အပူၤ စးထီၣ်ဖဲတလါအံၤပယီၤသုးမီၤစိရိၤဟဲကွံာ်လီၤမ့ၣ်ပိၢ်တလီၢ်လီၢ်ဒီးဟဲကွံာ်လီၤမ့ၣ်ပိၢ်အိၣ်၀ဲ(၃)ဘျီလံန့ၣ်လီၤႉ ဟဲကွံာ်လီၤ၀ဲလၢညါခံဘျီန့ၣ် လီၢ်က၀ီၤကမျၢၢ်ဘၣ်ဒိဘၣ်ထံးတအိၣ်၀ဲဘၣ်ဆၣ် တၢ်ဆါဟံၣ်ဒီးတၢ်ဟ့ၣ်ကသံၣ်ဒၢးတၢ်သူၣ်ထီၣ်တဖၣ်ဟးဂီၤ၀ဲဒၣ်အိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
လၢန့ၣ်အမဲာ်ညါပယီၤသုးမီၤစိရိၤဟဲကွံာ်လီၤမ့ၣ်ပိၢ်ဒီးကဘီယူၤ(၃)ဘျီအကျါ ခံဘျီန့ၣ်ဟဲကွံာ်လီၤ၀ဲလၢမုၢ်နၤခီအဂ့ၢ်န့ၣ် သ့ၣ်ညါဘၣ်န့ၣ်လီၤႉ
