တၢ်သဘံၣ်သဘုၣ်လၢအဟဲကဲထီၣ်၀ဲလၢကညီဖိကဒဲကဒဲအဘၢၣ်စၢၤအံၤ ကြၢးတၢ်ကပတု၁်ကွံာ်အီၤလံ
လါယူၤလံ ၃၀ သီႇ ၂၀၂၃ နံၣ်ႇ ခ့ၣ်အဲးစံၣ်
ဖီၣ်မူၤစှၣ်
ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤ ဘျံးဒ၀ဲၢ်ကီၢ်ရ့ၣ်(သုးက့ ၄)ဟီၣ်က၀ီၤအပူၤ တၢ်သဘံၣ်သဘုၣ်လၢအဟဲကဲထီၣ်၀ဲဒၣ်လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးသုးခိၣ်စီၤနၢၤဒါမၠးတီခိၣ်ရိၣ်မဲကီၢ်သူလ့ၤသုးမုၢ်ဒိၣ်(KTLA)အဘၢၣ်စၢၤသ့ၣ်တဖၣ်အံၤဟဲဒိၣ်ထီၣ်၀ဲဒၣ်ကွ့ၢ်ကွ့ၢ်အသိးတၢ်ကစီၣ်တခါအံၤကဲထီၣ်၀ဲဒၣ်တၢ်သူၣ်အုးသးအုးလၢၦၤကညီဖိအကျါန့ၣ်လီၤႉ
တၢ်ဘၣ်ဂံာ်ဂူ၁်တၢ်ဖ့ၣ်စၢလၢအဟဲကဲထီၣ်၀ဲဒၣ်လၢခံခီခံကပၤအဘၢၣ်စၢၤအံၤတမ့ၢ်တၢ်က့ၤဒုးက့ၤခီၣ်ဆၢကဒါက့ၤ ဒုၣ်ဒါသုးမီၤစိရိၤအံၤလၢၤဘၣ်ႇမ့မ့ၢ်တခီမ့ၢ်ဒၣ်ကညီဖိကဒဲကဒဲတၢ်က့ၤခးလီၤကဒါသးလီၤဒီးလီၢ်ခံကတၢၢ်ကဲထီၣ်ပၢၢ်တုၤလၢကညီဖီၣ်စုက၀ဲၤကဒဲကဒဲတၢ်ဂာ်သွံၣ်ဂာ်စိာ်တၢ်သံတၢ်ၦၢ်တစုညါန့ၣ်လီၤႉ
တၢ်ဂ့ၢ်စးထီၣ်ကဲထီၣ်န့ၣ်လၢဘျံးဒ၀ဲၢ်–ထံခံကီၢ်ဆၢကျဲ ခံခီခံကပၤအဘၢၣ်စၢၤတၢ်ဒုးကဲထီၣ်၀ဲဒီး ဘၣ်ဆၣ်ဖဲလါယူၤလံအတီၢ်ပူၤတၢ်ဘၣ်ဂံာ်ဂူာ်လၢအဟဲကဲထီၣ်၀ဲလၢခံခီခံကပၤအဘၢၣ်စၢၤအံၤ သူၣ်ထီၣ်က့ၤ တၢ်နာ်န့ၢ်လိာ်သးတန့ၢ်လၢၤ၀ဲဘၣ်ဒီးဖဲန့ၣ်တဆီတၢ်ဂ့ၢ်အံၤဒိၣ်ထီၣ်၀ဲဒၣ်ကွ့ၢ်ကွ့ၢ်န့ၣ်လီၤႉ
ဖဲလါယူၤလံ ၁၅ သီအနံၤန့ၣ် ခ့ၣ်အဲၣ်ယူၣ်(သုးက့ ၄)ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)စုတီၤဖီလာ် သုးရ့ၣ်(၁၀)လဲၤထီၣ်ခး၀ဲကီၢ်သူလ့ၤသုးမုၢ်ဒိၣ်(KTLA)ကရူၢ်လၢအိၣ်၀့ၢ်တၢ်အဲၣ်–ထံခံကျဲအံၤဒီး ဖဲန့ၣ်တၢ်ဒုးက့ၤကဲထီၣ် ကဒါအသီတဘျီကဒီးအဂ့ၢ်န့ၣ် ဂံၢ်ခီၣ်ထံးတၢ်ကစီၣ်တဖၣ်စံး၀ဲအသိးသ့ၣ်ညါဘၣ်န့ၣ်လီၤႉ
တၢ်ဒုးကဲထီၣ်တၢ်ဂ့ၢ်ခီန့ၣ်ဖဲလါယူၤလံ ၂၁ သီအနံၤ ဖဲခ့ၣ်အဲၣ်ယူၣ်ဆူၣ်ချ့မၤစၢၤ၀ဲၤကျိၤအံၤလဲၤဆှၢ၀ဲကသံၣ်ကသီဆူ ကီၢ်ဆၣ်၀ဲၤဒၢးအခါန့ၣ်(KTLA)သုးခိၣ်အဲၣ်ခွံအၦၤလၢအိၣ်၀့ၢ်တၢ်အဲၣ်–ထံခံကျဲသ့ၣ်တဖၣ်အံၤတပျဲလဲၤ၀ဲဘၣ်ဒီး ဖဲလါယူၤလံ ၁၃ သီအခါစ့ၢ်ကီး(KTLA)တပျဲလဲၤ၀ဲဒၣ်(ခ့ၣ်အဲၣ်ယူၣ်)ကစၢၢ်ဒိၣ်ကီၢ်ဆၣ် ဆူၣ်ချ့မၤစၢၤ၀ဲၤကျိၤ ၦၤဘၣ်မူဘၣ်ဒါအသိလ့ၣ်ဘၣ်ႇခး၀ဲသိလ့ၣ်ဘ့အဂ့ၢ်န့ၣ် ခ့ၣ်အဲၣ်ယူၣ် ဘျံးဒ၀ဲၢ်ကီၢ်ရ့ၣ်တကပၤ စံး၀ဲန့ၣ်လီၤႉ
ကီၣ်ရ့ၣ်ၦၤဘၣ်မူဘၣ်ဒါတဖၣ်စံး၀ဲလၢ ဖီၣ်စုက၀ဲၤကရူၢ်၀ဲအံၤလၢအတအိၣ်ဒီး(ခ့ၣ်အဲၣ်ယူၣ်)တၢ်ပျဲဘၣ် အိၣ်ခိးသမံသမိးႇမၤပျံၤမၤဖုးကမျၢၢ်လၢအဟးထီၣ်က့ၤလီၤဖဲ(ခ့ၣ်အဲၣ်ယူၣ်) ဟီၣ်က၀ီၤပူၤအံၤန့ၣ်လီၤႉ ခီဖျိအ၀ဲသ့ၣ်တၢ်ဖံးတၢ်မၤအံၤအဃိ(ခ့ၣ်အဲၣ်ယူၣ်)ဘျံးဒ၀ဲၢ်အံၤတတူၢ်လိာ်၀ဲဘၣ်တြီ၀ဲဘၣ်ဆၣ်ခီဖျိအ၀ဲသ့ၣ်ဆဲးမၤဒံး၀ဲ အဃိဘၣ်တၢ်လဲၤထီၣ်ခးအီၤဒ်အံၤလီၤအဂ့ၢ်န့ၣ် စံး၀ဲန့ၣ်လီၤႉ
KNLA (သုးက့ ၄)လဲၤခး(KTLA)ဘၣ်ဆၣ်မ့မ့ၢ်အ၀ဲသ့ၣ်ကရူၢ်တခီန့ၣ်က့ၤခးဆၢကဒါ၀ဲတအိၣ်ဘၣ်အဂ့ၢ် (KTLA)ထုးထီၣ်ပာ်ဖျါတ့ၢ်ဃာ်၀ဲအိၣ်အသိး ဘၣ်ဆၣ်မ့မ့ၢ်လၢခ့ၣ်အဲၣ်ယူၣ်(သုးက့ ၄)တကပၤထုးထီၣ်ပာ်ဖျါ၀ဲန့ၣ် ခီဖျိ(KTLA)ကရူၢ်က့ၤခးခီၣ်ဆၢကဒါအ၀ဲသ့ၣ်အဃိ လီၢ်က၀ီၤကမျၢၢ်ဘၣ်ဒိ(၂)ဂၤန့ၣ်လီၤႉ
တၢ်ဒုးကဲထီၣ်၀ံၤလီၢ်ခံဖဲလါယူၤလံ ၁၅ သီအနံၤန့ၣ် (KTLA)ဆၣ်ကဆီသုးတြိၤ ထုးထီၣ်လံာ်တၢ်ကလုၢ်လၢ စးထီၣ်လါယူၤလံ ၁၆ သီန့ၣ် ၀့ၢ်တၢ်အဲၣ်–ထံခံကျဲ ကမျၢၢ်တဘၣ်လ့ၢ်ထီၣ်လ့ၢ်လိၤဘၣ်ဒီး ကမျၢၢ်သ့ၣ်တဖၣ် ကလူၤပိာ်မၤထွဲဘၣ်တၢ်နဲၣ်လီၤအံၤကိးဂၤဒဲးတက့ၢ်အဂ့ၢ်န့ၣ် လံာ်တၢ်ပာ်ဖျါပူၤပာ်ဖျါ၀ဲန့ၣ်လီၤႉ
လံာ်တၢ်ပာ်ဖျါအပူၤစံး၀ဲလၢတၢ်ပာ်ပနီၣ်မုၢ်နံၤမုၢ်သီအတီၢ်ပူၤမ့ထံၣ်န့ၢ်တၢ်လီၤဆီလၢအဘၣ်ဃးဒီးသုးမီၤစိရိၤမ့အိၣ်တမံၤမံၤန့ၣ်ကမၤဆှဲလဲ၀ဲခဲလၢာ်တကးဒံးဘၣ်အမဲာ်ညါၦၤလၢအမ့တလူၤပိာ်မၤထွဲတၢ်သိၣ်တၢ်သီဘၣ်တၢ်ဂ့ၢ်မ့ကဲထီၣ်သးတမံၤဂ့ၤတမံၤဂ့ၤန့ၣ်တမ့ၢ်လၢကဟံမူဒါဘှါဆှဲ၀ဲဘၣ်အဂ့ၢ်န့ၣ် လံာ်တၢ်ပာ်ဖျါအပူၤ စံး၀ဲန့ၣ်လီၤႉ
ဖဲန့ၣ်၀ံၤလီၢ်ခံဖဲလါယူၤလံ ၁၉ သီအနံၤ လၢခ့ၣ်အဲၣ်ယူၣ် ကစၢၢ်ဒိၣ်ကီၢ်ဆၣ် ဖီၣ်တီၣ်သ၀ီ–မဲၤ(၄၀)ဘၢၣ်စၢၤန့ၣ် (KTLA)ခိးခး၀ဲ KNLA (သုးက့ ၄)အသိလ့ၣ် ၂ ခိၣ်လၢအပၣ်ဃုာ်၀ဲသုးဂ့ၢ်၀ီခိၣ်အံၤအဃိ (KNLA)သုးခိၣ်ဒိၣ်ဖိ စီၤဖိဆံးဒီးအၦၤသံ၀ဲတဂၤအသိး သုးရ့ၣ်(၁၂)ဒီး(သုးရ့ၣ် ၇)အၦၤဘၣ်ဒိ၀ဲ(၅)ဂၤဒံးန့ၣ်လီၤႉ
တၢ်လီၢ်၀ဲန့ၣ်မ့ၢ်၀ဲ KNLA (သုးက့ ၄) သုရ့ၣ်(၁၂)တၢ်ပၢဟီၣ်က၀ီၤဒီး ဒ်န့ၣ်အသိးဟီၣ်က၀ီၤပူၤဖဲန့ၣ် ကီၢ်သူလ့ၤသုးမုၢ်ဒိၣ်(KTLA) စီၤအဲၣ်ခွံ စုတီၤဖီလာ် သုးဒ့(၇)အၦၤစ့ၢ်ကီးဟူးဂဲၤ၀ဲဒၣ်န့ၣ်လီၤႉ ဖဲအပူၤကွံာ်လါယနူၤအါရံၤ ၂၃ သီအခါစ့ၢ်ကီး တၢ်ခးဒံး၀ဲ(KNLA)သုးရ့ၣ် ၁၂ အၦၤကဲထီၣ်အသးဒံးအဂ့ၢ်န့ၣ် (KNLA)လီၢ်ခၢၣ်သး၀ဲၤလီၢ်ခိၣ်သ့ၣ် ထုးထီၣ်ပာ်ဖျါ၀ဲဖဲလါယူၤလံ ၂၀ သီအနံၤန့ၣ်လီၤႉ
ဟီၣ်က၀ီၤတၢ်လီၢ်လၢခံခီခံကပၤအၦၤဟူးဂဲၤ၀ဲအံၤအပူၤကွံာ်န့ၣ်မ့ၢ်၀ဲဒၣ်(KNLA)သုးရ့ၣ် ၁၂ အတၢ်လီၢ်ဒီး ဘၣ်ဆၣ် ခီဖျိကီၢ်သူလ့ၤသုးမုၢ်ဒိၣ်ဆီလီၤသးဟူးဂဲၤ၀ဲအဃိတချုး(ခ့ၣ်အဲၣ်ယူၣ်)ဟီၣ်က၀ီၤၦၤဘၣ်မူဘၣ်ဒါလဲၤတၢ်ဒံးဘၣ်န့ၣ် ဒုးသ့ၣ်ညါစိဃာ်၀ဲကီၢ်သူလ့ၤသုးမုၢ်ဒိၣ်ဒီးတၢ်က့ၤစံးဆၢကဒါ၀ဲလၢလဲၤသ့အဃိ အ၀ဲသ့ၣ်ၦၤလဲၤ၀ဲဒီးဘၣ်တၢ်ခိး ခးလီၤအီၤလၢကျဲပူၤဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ် ဘျံးဒ၀ဲၢ်ကီၢ်ရ့ၣ်တကပၤ ထုးထီၣ်ပာ်ဖျါ၀ဲတၢ်ကစီၣ်န့ၣ်လီၤႉ
ဘၣ်ဃးတၢ်ခးသံ၀ဲ KNLA (သုးက့ ၄)သုးဂ့ၢ်၀ီခိၣ် သုးခိၣ်ဒိၣ်ဖိ စီၤဖိဆံးတၢ်ဂ့ၢ်အံၤ မ့မ့ၢ်(KTLA)တကပၤထုးထီၣ်ပာ်ဖျါလံာ် ဘှါဆှဲတၢ်ဂ့ၢ်တၢ်ကျိၤတအိၣ်နီတမံၤဒံးဘၣ်န့ၣ်လီၤႉ
(KTLA)ထုးထီၣ်တၢ်ကလုၢ်လၢကျဲ၀ဲအံၤတၢ်တဘၣ်လ့ၢ်ထီၣ်လ့ၢ်လိၤဘၣ်အိၣ်အဃိ အ၀ဲသ့ၣ်လဲၤတၢ်ခးအ၀ဲသ့ၣ်ဒ်အံၤ တမ့ၢ်တၢ်ဂ့ၤလၢၦၤကညီဖိအဂီၢ်ဘၣ်အဂ့ၢ်န့ၣ် (KTLA)သုးရိၣ်မဲခိၣ်ကျၢၢ် သုးခိၣ်ကျၢၢ် စီၤနၢၤဒါမၠး စံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ
အ၀ဲစံး၀ဲလၢ“ဒ်သိးယနၢ်ဟူန့ၣ်ၦၤတဲအီၤတဘၣ်လဲၤဒံးဘၣ်ႉယနၢ်ဟူလၢၦၤကဟဲခးအ၀ဲသ့ၣ်ႇအဃိန့ၣ်ၦၤတဲအီၤတဘၣ်လဲၤဒံးဘၣ်မီၤနီၤႉပတဲဒ်န့ၣ်၀ံၤတသီခံသီဘျီတၢ်ကဲထီၣ်သးလီၤႉတၢ်ကဲထီၣ်သးဒ်န့ၣ်တမ့ၢ်အဂ့ၤလၢၦၤကလုာ်အဂီၢ်ဘၣ်န့ၣ်ပသ့ၣ်ညါမီၤႉဘၣ်ပသးတမုာ်ဘၣ်နါက့ပကဘၣ်ကျဲၤဃူကျဲၤဖိးက့ၤလၢအဂ့ၤကတၢၢ်မီၤႉၦၤကညီဖိကဒဲကဒဲအ့ၣ်လိာ်သး၀ာ်လိာ်သးဒ်အံၤသ့၀ဲလဲၣ်ႉတၢ်ထံၣ်လိာ်အိၣ်သကိးဒုကဘၣ်အိၣ်၀ဲလီၤခါဆူမဲာ်ညါ”အဂ့ၢ်န့ၣ် စံး၀ဲန့ၣ် လီၤႉ
ဖဲတၢ်သဘံၣ်သဘုၣ်ကဲထီၣ်လၢကညီဖီၣ်စုက၀ဲၤကဒဲကဒဲဘၢၣ်စၢၤဒ်အံၤ၀ံၤလီၢ်ခံန့ၣ်(KTLA)သုးရိၣ်မဲခိၣ်ကျၢၢ် သုးခိၣ်ကျၢၢ် စီၤနၢၤဒါမၠး အတၢ်ဂီၤမူရၤလီၤသးလၢ(အီၤလါ)ပူၤတခါစံး၀ဲလၢတၢ်ဒုးစးထီၣ်ကဲထီၣ်လၢ(သုးက့ ၄) ဟီၣ်က၀ီၤပူၤလံ (KTLA)အၦၤလၢထံချၢကီၢ်ချၢတဖၣ်ကပာ်ဖှိၣ်ဆှၢလီၤသကိးစ့ဒီး ဖဲန့ၣ်၀ံၤလီၢ်ခံတၢ်အိၣ်သးအံၤလီၤဂာ်ဒ်သိးအဟဲနးဒိၣ် ထီၣ်၀ဲဒၣ်န့ၣ်လီၤႉ
ခ့ၣ်အဲၣ်ယူၣ် (သုးက့ ၄)ဟီၣ်က၀ီၤတၢ်လီၢ်လၢ(KTLA)ဟူးဂဲၤ၀ဲအံၤန့ၣ်တကီၢ်ခါခဲအံၤတၢ်ဒုးကဲထီၣ်၀ဲဒီးပယီၤသုး တအိၣ်ဘၣ်ႇမ့မ့ၢ်တခီတၢ်ဒုးအံၤကဲထီၣ်၀ဲဒၣ်ဒီး(KNLA)လီၤအဃိသုးခိၣ်စီၤနၢၤဒါမၠးအတၢ်တိၤလၢအရၤလီၤသးလၢ (အီၤလါ)ပူၤအံၤန့ၣ်တဖျါလၢအကဒုးဆၢကဒါက့ၤသုးမီၤစိရိၤအံၤဘၣ်အသိးတၢ်အံၤမ့ၢ်တၢ်က့ၤခးကဒါက့ၤ (ခ့ၣ်အဲၣ်ယူၣ်)ဘျံးဒ၀ဲၢ်ကီၢ်ရ့ၣ်လီၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၄)ထုးထီၣ်ပာ်ဖျါ၀ဲဖဲလါယူၤလံ ၁၄ သီအနံၤ န့ၣ်လီၤႉ
ခီဖျိ(KTLA)သုးခိၣ်အဲၣ်ခွံအံၤပာ်၀ဲဒၣ်(ခ့ၣ်အဲၣ်ယူၣ်)ဘျံးဒ၀ဲၢ်ကီၢ်ရ့ၣ်ဒ်ဒုၣ်ဒါအသိးအဃိလီၢ်ခံအံၤလၢကဟးဆှဲးအ၀ဲသ့ၣ် အဂီၢ်ကီခဲထီၣ်၀ဲဒီးကဲထီၣ်ဒုၣ်ဒါလၢကညီဒီကလုာ်စၢဖှိၣ်ကရၢဒီးကညီတၢ်ပၢၢ်ဆၢအဂီၢ်အဃိလၢတၢ်ဒီသဒၢတြီဆၢလီၤက့ၤတၢ်ကရၢကရိအံၤဒီးၦၤမၤသကိးတၢ်ဖိအဂီၢ်န့ၣ်ဘၣ်တၢ်က့ၤခးကဒါအ၀ဲသ့ၣ်လီၤအဂ့ၢ်န့ၣ် ခ့ၣ်အဲၣ်ယူၣ် ဘျံးဒ၀ဲၢ်ကီၢ်ရ့ၣ်(သုးက့ ၄) လံာ်တၢ်ပာ်ဖျါအပူၤစံး၀ဲန့ၣ်လီၤႉ
ဘၣ်ဃးဒီးတၢ်ဂ့ၢ်အံၤ(ခ့ၣ်အဲၣ်ယူၣ်)ဘျံးဒ၀ဲၢ်ကီၢ်ရ့ၣ် နဲၣ်ရွဲၣ် ပဒိၣ်စီၤအဲၣ်နၤစံး၀ဲလၢ “ကညီဖိလၢအအိၣ်လၢကီၢ်ပူၤ တဖၣ်လၢအသ့ၣ်ညါတၢ်အိၣ်သးတံၢ်နီၢ်ဒုအသ့ၣ်ညါ၀ဲလီၤႉသနါက့ကညီဖိလၢအိၣ်ကီၢ်ပူၤဒီးကီၢ်ဆၢတနီၤန့ၣ် အ၀ဲသ့ၣ်တနီၤန့ၣ်ဟဲပာ်ဖှိၣ်ထီၣ်သးမၤသကိးတၢ်ဒီးအဲၣ်ခွံႉအတၢ်ပညိၣ်န့ၣ်တမ့ၢ်လၢအကဒုးထီဒါကရၢမိၢ်ၦၢ်ဘၣ်ႉ လၢကဒုးလီၤၦီၢ်သုးမီၤစိရိၤလီၤႉသနါက့အဲၣ်ခွံခီန့ၣ်အသးတမ့ၢ်ဒ်န့ၣ်ဘၣ်ႉဒီးၦၤလၢအဒုးအိၣ်ထီၣ်တၢ်လီၤဖးခီန့ၣ် ၦၤအိၣ်လၢကီၢ်ချၢသ့ၣ်တဖၣ်ႇလီၤဆီဒၣ်တၢ်ၦၤလၢအဆီၣ်ထွဲ၀ဲဒၣ်(KTLA)တဖၣ်န့ၣ်လီၤႉအ၀ဲသ့ၣ်အဲၣ်ဒိးသူၣ်ထီၣ်၀ဲတၢ်စိတၢ်ကမီၤဒီးမၤလီၤၦီၢ်က့ၤ၀ဲဒၣ်(ခ့ၣ်အဲၣ်ယူၣ်)လီၤမီၤနီၤ”အဂ့ၢ်န့ၣ် စံး၀ဲန့ၣ်လီၤႉ
လၢန့ၣ်အမဲာ်ညါတအဲၣ်ဒိးတၢ်ဂာ်သွံၣ်ဂာ်စိာ်ကဲထီၣ်လၢကညီဖိကဒဲကဒဲအကျါဘၣ်ဘၣ်ဆၣ် ခီဖျိ(KTLA)အတၢ်ဖံးတၢ်မၤတၢ်ဟူးတၢ်ဂဲၤအံၤက့ၤထီဒါကဒါ၀ဲခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢအံၤ အဘျီတဖၣ်အဘျီအဃိ ကခီၣ်ဆၢဒီသဒၢတြီဆၢကဒါက့ၤ၀ဲလီၤအဂ့ၢ်န့ၣ် ပဒိၣ်စီၤအဲၣ်နၤ စံးအါထီၣ်၀ဲန့ၣ်လီၤႉ
“ခီဖျိပမ့ၢ်ကညီဖိကဒဲကဒဲအဃိပတအဲၣ်ဒိးလၢတၢ်ဂာ်သွံၣ်ဂာ်စိးဘၣ်ႉဒီးပလူၤကျဲၤဃူကျဲၤဖိးအဘျီဘျီဘၣ်ဆၣ်န့ၣ် အ၀ဲသ့ၣ်တဖၣ်န့ၣ်တတူၢ်လိာ်၀ဲဒၣ်ဘၣ်ႇအ၀ဲသ့ၣ်တဖၣ်န့ၣ်ကူၣ်သံကူၣ်အၢ၀ဲဒၣ်ပခိၣ်ပနၢ်ႇမၤထီဒါ(ခ့ၣ်အဲၣ်ယူၣ်)ကရၢအဃိလၢခံကတၢၢ်ပၢၢ်တုၤလၢအမၤသံ၀ဲဒၣ်ပ(ခ့ၣ်အဲၣ်ယူၣ်)သုးဂ့ၢ်၀ီခိၣ်တဂၤမီၤႉအဃိပအဲၣ်ဒိးဒုးသ့ၣ်ညါကမျၢၢ်လၢတမ့ၢ်ပတၢ်ဂံၢ်စၢ်ဘါစၢ်လၢၤဘၣ်ႉအဃိတုၤလၢအပတီၢ်ခဲအံၤန့ၣ်ပကဘၣ်တြီဆၢဒီသဒၢအီၤဒ်သိးတၢ်ဂ့ၢ်သုတကဲထီၣ်ဆူညါလၢၤတဂ့ၤအဂီၢ်လီၤမီၤနီၤ”အဂ့ၢ်န့ၣ် ပဒိၣ်စီၤအဲၣ်နၤ စံးအါထီၣ်၀ဲန့ၣ်လီၤ
ႉ
တကီၢ်ခါခဲအံၤ(KTLA)လိာ်ဘၢလိာ်ကွီၢ်၀ဲခ့ၣ်အဲၣ်ယူၣ်(သုးက့(၄)အံၤလၢအပာ်ဖှိၣ်မၤသကိးတၢ်ဒီးပယီၤသုး လၢမုၢ်ကျိၤ၀ဲၤကွာ်တၢ်ဖံးတၢ်မၤတကပၤန့ၣ်လီၤႉ ဒ်န့ၣ်အသိးမ့မ့ၢ် KNLA (သုးက့ ၄)တကပၤစ့ၢ်ကီး လိာ်ဘၢလိာ်ကွီၢ်က့ၤ(KTLA)လၢ (KTLA)ခးအ၀ဲသ့ၣ်အံၤခီဖျိအဲၣ်ဒိးပၢ၀ဲဒၣ်ဟီၣ်က၀ီၤအံၤန့ၣ်လီၤႉ
(ခ့ၣ်အဲၣ်ယူၣ်)ဘျံးဒ၀ဲၢ်ကီၢ်ရ့ၣ်အံၤ မ့ၢ်၀ဲ KNLA (သုးက့ ၄)စုတီၤဖီလာ် သုးရ့ၣ်(၇)ႇသုးရ့ၣ်(၁၀)ႇသုးရ့ၣ်(၁၁)ႇ သုးရ့ၣ်(၁၂)ဒီး သုးရ့ၣ်(၂၀၃)အၦၤအိၣ်ဆီလီၤသးဟူးဂဲၤ၀ဲတၢ်လီၢ်န့ၣ်လီၤႉ
(KTLA)အၦၤလၢအဟူးဂဲၤဖဲခ့ၣ်အဲၣ်ယူၣ်(သုးက့ ၄)ဟီၣ်က၀ီၤပူၤတဖၣ်အံၤ ဘၣ်တၢ်တီခိၣ်ရိၣ်မဲအီၤလၢ သုးခိၣ်အဲၣ်ခွံ(ကိး)ကီၤလၤဖိန့ၣ်လီၤႉ(KTLA)ကရူၢ်အံၤဟူးဂဲၤ၀ဲဒၣ်လၢ(ခ့ၣ်အဲၣ်ယူၣ်)ဘျံးဒ၀ဲၢ်ကီၢ်ရ့ၣ် (သုးက့ ၄) ဟီၣ်က၀ီၤတကးဒံးဘၣ်အမဲာ်ညါဟူးဂဲၤစ့ၢ်ကီး၀ဲဒၣ်လၢဒူပျာ်ယာ်ကီၢ်ရ့ၣ်(သုးက့ ၆)ဟီၣ်က၀ီၤပူၤန့ၣ်လီၤႉ
တၢ်သဘံၣ်သဘုၣ်လၢအဟဲကဲထီၣ်သးလၢကညီဖိကဒဲကဒဲအဘၢၣ်စၢၤအံၤတၢ်မ့ဘှါဆှဲအီၤလၢစုက၀ဲၤန့ၣ် ကဘၣ်ဒိက့ၤ၀ဲလီၢ်က၀ီၤကမျၢၢ်လီၤဒီးအလီၢ်အိၣ်လၢခံခီခံကပၤၦၤဘၣ်မူဘၣ်ဒါတဖၣ်ကဘှါဆှဲ၀ဲလၢအဆိအချ့အဂ့ၢ်န့ၣ် တနီသရံၣ်ကီၢ်ဒိၣ် ကညီကမျၢၢ် ဃ့ထီၣ်ထုးထီၣ်ပာ်ဖျါဒံးလံာ်ဖဲအပူၤကွံာ် လါဖ့ၤဘြူၤအါရံၤအခါစ့ၢ်ကီးန့ၣ်လီၤႉ
တၢ်ဘၣ်ဂံာ်ဂူာ်တၢ်သဘံၣ်သဘုၣ်လၢအကဲထီၣ်၀ဲလၢခံခီခံကပၤအဘၢၣ်စၢၤအံၤတမ့ၢ်တၢ်အဂ့ၤလၢကညီဖိအဂီၢ်ဘၣ် အသိးႇလံာ်လၢခံခီခံကပၤထုးထီၣ်ပာ်ဖျါ၀ဲအံၤစ့ၢ်ကီးပတထံၣ်လၢအမၤလီၤကဆှၣ်၀ဲတၢ်ဂ့ၢ်ကီအံၤဘၣ်ဒီး မ့မ့ၢ်တခီတၢ်ဂ့ၢ်အံၤနးဒိၣ်ထီၣ်၀ဲဒၣ်အဃိကဲထီၣ်၀ဲဒၣ်တၢ်လီၤသူၣ်အုးသးအုးလၢကီၢ်ပူၤကီၢ်ချၢကမျၢၢ်တဖၣ်အဂီၢ် အဂ့ၢ်န့ၣ် ဂံၢ်ခီၣ်ထံးကညီတၢ်ကရၢကရိခိၣ်နၢ်တဖၣ် စံး၀ဲန့ၣ်လီၤႉ
လၢတၢ်န့ၣ်အဃိတၢ်သဘံၣ်သဘုၣ်တၢ်ဘၣ်ဂံာ်ဂူာ်လၢအဟဲကဲထီၣ်လၢတကီၢ်ခါခဲအံၤသ့ၣ်တဖၣ် တၢ်ကြၢးဘှါဆှဲအီၤလၢ အဆိအချ့အဂ့ၢ်န့ၣ် ဂံၢ်ခီၣ်ထံးကညီတၢ်ကရၢကရိခိၣ်နၢ်လၢတအဲၣ်ဒိးပာ်ဖျါအမံၤတဂၤ ဆီၣ်တခူဟ့ၣ်ကူၣ်ဟ့ၣ်ဖး စံး၀ဲဒ်အံၤန့ၣ်လီၤႉ
“တၢ်သဘံၣ်သဘုၣ်ကဲထီၣ်၀ဲလၢခံခီခံကပၤအဘၢၣ်စၢၤအံၤယဲယထံၣ်လၢတၢ်ကဘၣ်ထိၣ်ကဆှၣ်လီၤအီၤထိၣ်ဃူထိၣ်ဖိးက့ၤအီၤလီၤႉဘၣ်မနုၤအဃိလဲၣ်န့ၣ်(KTLA)အံၤအတၢ်ပညိၣ်အိၣ်လၢကမၤလီၤၦီၢ်၀ဲဒုၣ်ဒါသုးမီၤစိရိၤႇ(ခ့ၣ်အဲၣ်ယူၣ်)စ့ၢ်ကီးအတၢ်ပညိၣ်အိၣ်ဒ်န့ၣ်လီၤမီၤနီၤႉအဃိတၢ်ပညိၣ်မ့ဒ်သိးလိာ်သးန့ၣ်တၢ်မၤသကိးတၢ်န့ၣ်ကဘၣ်သ့မီၤနီၤႉတၢ်ဂာ်သွံၣ်ဂာ်စိးမ့အိၣ်ထီၣ်ဘျီန့ၣ်ကဘၣ်ဒိ၀ဲကမျၢၢ်လီၤႉ(KNLA)န့ၣ်ကြၢးလၢဟံတၢ်တီခိၣ်ရိၣ်မဲဒီးလၢ(သ၀ခ)နါက့ကဘၣ်နုာ်လီၤမီၤနီၤႉမ့တနုာ်လီၤဘၣ်ဒုတညီဘၣ်ႉကြၢးလၢအ၀ဲသ့ၣ်ထံၣ်လိာ်သးတဲသကိးတၢ်၀ံၤဒီးပဒုၣ်ပဒါႇပတၢ်ပညိၣ်န့ၣ်မ့ၢ်မတၤလဲၣ်န့ၣ်မီၤနီၤႉခီဖျိလၢပဒုၣ်ပဒါအခိၣ်သ့ၣ်တကဲထီၣ်ပတၢ်ဂ့ၢ်မိၢ်ၦၢ်ဘၣ်ဘျီဒုဒုၣ်ဒါအပျၢ်ခိၣ်န့ၣ်လဲၤက့ၤလၢနၤအိၣ်ယၤအိၣ်အဃိကဲထီၣ်က့ၤတၢ်လၢအတဂ့ၤလၢၤဘၣ်မီၤနီၤ”အဂ့ၢ်န့ၣ် ဂံၢ်ခီၣ်ထံးတၢ်ကရၢကရိခိၣ်နၢ် ဆီၣ်တခူထီၣ်၀ဲန့ၣ် လီၤႉ
