လါမးရှး ၇ သီႇ ၂၀၂၂ နံၣ်ႇ ခ့ၣ်အဲးစံၣ်
ဖဲလါမးရှး ၅ သီ ဟါခီအဆၢကတီၢ် ခီဖျိပယီၤသုးလၢအအိၣ်ဖဲဖၣ်ပူၣ်၀့ၢ်အံၤခးလီၤကျိဖးဒိၣ်အဃိ မုၢ်တြီၢ်ကီၢ်ရ့ၣ် ဘုသိၣ်ကီၢ်ဆၣ် မဲးကျီသ၀ီသရူၢ် ကျီၢ်ဒ့သ၀ီဖိသံ၀ဲ(၇)ဂၤအကျါပၣ်ဃုာ်၀ဲဖိသၣ်(၂)နံၣ်ဒီးၦၤမိၢ်ဒၢတဖၣ်အဂ့ၢ်န့ၣ် တၢ်တိစၢၤမၤစၢၤကညီတၢ်မုာ်တၢ်ခုၣ်ၦာ်ဘျးစဲ(KPSN)ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ
ဖဲလါမးရှး ၅ သီ ဟါခီ(၇း၂၀)မံးနံးဃၣ်ဃၣ်အဆၢကတီၢ် ခီဖျိပယီၤသုးခးလီၤကျိဖးဒိၣ်ဆူကျီၢ်ဒ့သ၀ီတကပၤအဃိ လီၢ်က၀ီၤသ၀ီဖိသံ၀ဲ(၇)ဂၤအကျါ ပၣ်ဃုာ်၀ဲဖိသၣ်(၂)နံၣ်တဂၤႇ(၅)နံၣ်တဂၤႇၦၤမိၢ်ဒၢတဂၤဒီး ဘၣ်ဒိဘၣ်ထံး၀ဲနးနးကလဲာ်(၄)ဂၤအဂ့ၢ်န့ၣ် (KPSN)ၦၤကတိၤတၢ်ပၢနီၢ်၀ါခုၣ်ရှံစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ဖဲသ၀ီဖိတဖၣ်ဟဲက့ၤမံလၢအဟံၣ်အဆၢကတီၢ်န့ၣ်ပယီၤသုးကလၢၤလၢအအိၣ်ဖဲဖၣ်ပူၣ်အံၤခးလီၤကျိဖးဒိၣ်အဃိ ဖဲန့ၣ်သံ၀ဲ(၇)ဂၤႇဘၣ်ဒိဘၣ်ထံး၀ဲနးနးန့ၣ်(၄)ဂၤလီၤႉ ၦၤဘၣ်ဒိဘၣ်ထံးတဖၣ်အကျါပၣ်ဃုာ်၀ဲဖိသၣ်(၃)နံၣ်တဂၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
လၢန့ၣ်အမဲာ်ညါပယီၤသုးအံၤပညိၣ်ထီၣ်ဒုး၀ဲကမျၢၢ်ဒ်အံၤတမ့ၢ်ထဲအဆိကတၢၢ်တဘျီဘၣ်မၤ၀ဲဒ်အံၤထီဘိလီၤဒီး တၢ်ဖံးတၢ်မၤဒ်အံၤသ့ၣ်တဖၣ်မၤကမၣ်၀ဲထံဂုၤကီၢ်ဂၤတၢ်သိၣ်တၢ်သီအဃိ အပူၤကွံာ်လၢညါလံၤလံၤပဃ့ထီၣ်ထံဂုၤကီၢ်ဂၤလၢဟံးန့ၢ်ဂ့ၢ်၀ီဒီးကဒီၣ်တဲာ်ကွံာ်အ၀ဲသ့ၣ်မုၢ်ကျိၤ၀ဲၤကွာ်သ့ၣ်တဖၣ်အဂ့ၢ်န့ၣ် နီၢ်၀ါခုၣ်ရှံစံးအါထီၣ်၀ဲန့ၣ်လီၤႉ
ၦၤလၢအသံတဖၣ်န့ၣ်မ့ၢ်၀ဲကျီၢ်ဒ့သ၀ီဖိနီၢ်တလူၢ်(၂)နံၣ်ႇနီၣ်ထူဖီ(၅)နံၣ်ႇနီၢ်တ့ၤနံၤလၤ၀့(၁၄)နံၣ်ႇစီၤဒ့ဖိ(၁၉)နံၣ်ႇစီၤက့ၣ်(၄၀)နံၣ်ႇနီၢ်အဲၣ်မူ(၂၂)နံၣ်ႇနီၢ်ဖီ၀ါ(၃၂)နံၣ်သ့ၣ်တဖၣ်ဒီး ၦၤလၢအဘၣ်ဒိဘၣ်ထံးသ့ၣ်တဖၣ်န့ၣ်မ့ၢ်၀ဲစီၤကၠီၤဘံၣ်(၃)နံၣ်ႇနီၢ်စဘီ(၁၇)နံၣ်ႇနီၢ်ကရံဆၢ(၂၈)နံၣ်ဒီးမီၤညိၣ်ထူ(၂၈)နံၣ်သ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဖဲအပူၤကွံာ်လါဖ့ၤဘြူၤအါရံၤ ၄ သီအနံၤစ့ၢ်ကီး ခီဖျိပယီၤသုးကဘီယူၤဟဲကွံာ်လီၤမ့ၣ်ပိၢ်(၂)ဖျၢၣ်အဃိ မုၢ်တြီၢ်ကီၢ်ရ့ၣ် ဒွဲၣ်လိကီၢ်ဆၣ် မးထီကရူၢ် တဒွံခိၣ်သ၀ီဖိသံ၀ဲ(၂)ဂၤဒီး ဘၣ်ဒိဘၣ်ထံး၀ဲ(၆)ဂၤအကျါပၣ်ဃုာ်၀ဲဒီးဖိသၣ်စ့ၢ်ကီးန့ၣ်လီၤႉ
ဒ်န့ၣ်အသိးဖဲအပူၤကွံာ်လါယနူၤအါရံၤ ၂၉ သီအနံၤစ့ၢ်ကီး ခီဖျိပယီၤသုးဒီးသုးခိးကီၢ်ဆၢ(BGF)သုးလၢအအိၣ်ဖဲကစၢၢ်သၢဖျၢၣ်သုးကလၢၤအံၤခးလီၤကျိဖးဒိၣ်ဆူထံလီၤသံးထၣ်သ၀ီပူၤအဃိ ဖိသၣ်(၃)လါတဂၤဒီးဖိသၣ်ပိာ်မုၣ်ဖိ(၂၀)နံၣ်တဂၤသံ၀ဲဒီး ဘၣ်ဒိဘၣ်ထံး၀ဲ(၅)ဂၤကဲထီၣ်သးဒံးန့ၣ်လီၤႉ
