လါယူၤ ၃ သီႇ ၂၀၂၂ နံၣ်ႇ ခ့ၣ်အဲးစံၣ်
တရံးဖိကွံတီၤခၢၣ်သးကၠိလၢအအိၣ်ဖဲခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤ ဖၣ်အၣ်ကီၢ်ရ့ၣ် လူၢ်ပျဲၢ်ကီၢ်ဆၣ်အပူၤအံၤအပူၤကွံာ်အိၣ်၀ဲလၢကီၢ်ပယီၤပဒိၣ်ကူၣ်သ့၀ဲၤကျိၤအဖီလာ်ဒီးဘၣ်ဆၣ်တနံၣ်အံၤတၢ်ဆီတလဲက့ၤအိးထီၣ်ကဒါအီၤဒ်ကီၢ်သူလ့ၤပဒိၣ်ကူၣ်သ့၀ဲၤကျိၤအဖီလာ်ကၠိအသိးလံအဂ့ၢ်န့ၣ် သ့ၣ်ညါဘၣ်န့ၣ်လီၤႉ
တရံးဖိတီၤခၢၣ်သးကၠိအံၤအပူၤကွံာ်န့ၣ်သိၣ်လိမၤဒိး၀ဲကီၢ်ပယီၤပဒိၣ်အလံာ်ညိၣ်သိၣ်ဒိၣ်ဒီး ကတီၢ်ခဲအံၤဆီတလဲသူက့ၤ၀ဲဒၣ်လၢကီၢ်သူလ့ၤပဒိၣ်ကညီကူၣ်သ့ဆဲးလၤ၀ဲၤကျိၤ(KECD)အလံာ်ညိၣ်သိၣ်ဒိၣ်လံအဂ့ၢ်န့ၣ် လူၢ်ပျဲၢ်ကီၢ်ဆၣ်(KECD)ကူၣ်သ့မူဒါခိၣ်ပဒိၣ်စီၤလဲၣ်စလံးည့စံး၀ဲန့ၣ်လီၤႉ
အ၀ဲစံး၀ဲလၢ“လၢညါခါန့ၣ်ကၠိအံၤမ့ၢ်၀ဲဒၣ်ခ့ၣ်အဲၣ်ယူၣ်အကၠိလီၤႉဘၣ်ဆၣ်ဖဲအပူၤကွံာ်လွံၢ်နံၣ်ယဲၢ်နံၣ်အခါန့ၣ်ကဲထီၣ်က့ၤလၢကီၢ်ပယီၤပဒိၣ်အကၠိမီၤနီၤႉမ့၀ံၤခီဖျိခိ၀ံၣ်တၢ်အိၣ်သးဒီးသုးဟံးန့ၢ်တၢ်စိတၢ်ကမီၤတၢ်အိၣ်သးအဃိဖိသၣ်သ့ၣ်တဖၣ်တထီၣ်ဘၣ်ကၠိန့ၢ်(၂)နံၣ်လံမီၤနီၤႉၦၤကၠိဖိသ့ၣ်တဖၣ်တထီၣ်ဘၣ်ကၠိယံၤဘျီလီၢ်က၀ီၤဖိဒီးပ၀ဲဒၣ်သ့ၣ်တဖၣ်ပက့ၤတၢၣ်ပီၣ်တဲသကိးတၢ်၀ံၤပက့ၤဟံးကဒါဒ်ကီၢ်သူလ့ၤကၠိအသိးဒီးပက့ၤအိးထီၣ်ကဒါ၀ဲဒ်အံၤလီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
ခီဖျိကၠိလၢအိၣ်ကီၢ်သူလ့ၤပဒိၣ်ကူၣ်သ့ဆဲးလၤ၀ဲၤကျိၤအဖီလာ်တဖၣ်က့ၤအိးထီၣ်ကဒါလံအဃိ လံာ်လၢတၢ်သိၣ်လိ၀ဲခဲလၢာ်အကျါလံာ်ပယီၤအံၤတၢ်ကသိၣ်လိအီၤလၢပယီၤကျိာ်ဒီးမ့မ့ၢ်လံာ်ဟီၣ်ခိၣ်ဂီၤႇလံာ်တၢ်ဒွးႇလံာ်တၢ်စံၣ်စိၤတဲစိၤႇလံာ်စဲအ့ၣ်သ့ၣ်တဖၣ်အံၤတၢ်ကသိၣ်လိအီၤလၢကညီဒီးကိၤလၤ၀ါကျိာ်အဂ့ၢ်န့ၣ် ပဒိၣ်စီၤလဲၣ်စလံးည့စံးအါထီၣ်၀ဲန့ၣ်လီၤႉ
တရံးဖိကွံတီၤခၢၣ်သးကၠိလၢအဘၣ်တၢ်က့ၤအိးထီၣ်၀ဲဖဲတနံၣ်အံၤန့ၣ် ကၠိဖိအနီၣ်ဂံၢ်ခဲလၢာ်အိၣ်၀ဲ(၁၄၇)ဂၤႇကၠိသရၣ်(၂)ဂၤဒီးကၠိသရၣ်မုၣ်(၇)ဂၤန့ၣ်လီၤႉ ကၠိအံၤတရံးဖိကွံသ၀ီအမဲာ်ညါသ၀ီလၢအိၣ်တရံးဖိကွံသ၀ီအခိၣ်အဃၢၤကၠိဖိတဖၣ်ဟဲထီၣ်မၤလိမၤဒိးတၢ်စ့ၢ်ကီးအိၣ်၀ဲအဂ့ၢ်န့ၣ် လူၢ်ပျဲၢ်ကီၢ်ဆၣ်ကူၣ်သ့မူဒါခိၣ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ
တနံၣ်အံၤ(၂၀၂၂–၂၀၂၃)တၢ်သိၣ်လိနံၣ်အပူၤ ကၠိလၢအိၣ်ခ့ၣ်အဲၣ်ယူၣ်လူၢ်ပျဲၢ်ကီၢ်ဆၣ်ကညီကူၣ်သ့ဆဲးလၤ၀ဲၤကျိၤအစုတီၤဖီလာ်ခဲလၢာ်အိၣ်၀ဲ(၃၈)ဖျၢၣ်ဒီးတနံၣ်အံၤကၠိကိးဖျၢၣ်ဒဲးဃၣ်ဃၣ်ၦၤကၠိဖိနီၣ်ဂံၢ်ဟဲအါထီၣ်၀ဲအဂ့ၢ်န့ၣ် သ့ၣ်ညါဘၣ်လၢကီၢ်ဆၣ်ဘၣ်ထွဲကူၣ်သ့၀ဲၤကျိၤၦၤဘၣ်မူဘၣ်ဒါအအိၣ်န့ၣ်လီၤႉ
ဖဲမဟါလါယူၤ ၂ သီအနံၤန့ၣ် တၢ်မၤ၀ဲတၢ်အိးထီၣ်တရံးဖိကွံကၠိမူးတၢ်ရဲၣ်တၢ်ကျဲၤဒီး တၢ်ရဲၣ်တၢ်ကျဲၤဘျီ၀ဲအံၤအပူၤခ့ၣ်အဲၣ်ယူၣ်လူၢ်ပျဲၢ်ကီၢ်ဆၣ်အနဲၣ်ရွဲၣ်ႇဖၣ်အၣ်ကီၢ်ရ့ၣ်ကူၣ်သ့၀ဲၤကျိၤအနဲၣ်ရွဲၣ်ႇလူၢ်ပျဲၢ်ကီၢ်ဆၣ်ကူၣ်သ့၀ဲၤကျိၤမူဒါခိၣ်ႇဒူသ၀ီသူၣ်က့သးၦၢ်ဒီးကၠိဖိမိၢ်ပၢ်တဖၣ်ဟဲထီၣ်၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
