တၢ်ခးလိာ်သးကဲထီၣ်လၢကီးတရံး၀့ၢ်ပူၤ၀ံၤအလီၢ်ခံပယီၤသုးခးလီၤကဒါကျိဖးဒိၣ်အဃိလီၢ်က၀ီၤဖိဘၣ်ဒိ(၃)ဂၤ

လါအီကူး ၁၅ သီႇ ၂၀၂၂ နံၣ်ႇ ခ့ၣ်အဲးစံၣ်

ဖဲတနံၤလါအီကူး ၁၅ သီအနံၤတၢ်ခးလိာ်သးကဲထီၣ်လၢကီးတရံး၀့ၢ်ပူၤ၀ံၤအလီၢ်ခံ ခီဖျိပယီၤသုးလၢအိၣ်(လဲၤ၀ၣ်)သုးကလၢၤအံၤခးလီၤကဒါကျိဖဒိၣ်ဆူကီးတရံးကလံၤထံးဒီးကလံၤစိးသ၀ီတဖၣ်အပူၤအပူၤအဃိလီၢ်က၀ီၤကမျၢၢ်ဘၣ်ဒိ၀ဲ(၃)ဂၤအကျါပၣ်ဃုာ်၀ဲဖိသၣ်ခံဂၤအဂ့ၢ်န့ၣ်လီၢ်က၀ီၤဖိပာ်ဂၢၢ်ပာ်ကျၢၤစံး၀ဲန့ၣ်လီၤႉ

ဖဲတနံၤအံၤဂီၤခီ ၁၀ နၣ်ရံၣ်ဘျဲၣ်အဆၢကတီၢ်န့ၣ်တၢ်ပၢၢ်ဆၢသုးပာ်ဖှိၣ်ကရူၢ်နုာ်လီၤခး၀ဲကီးတရံး၀့ၢ်ပူၤ ကီၢ်ရ့ၣ်ႇ (မၠိၣ်မၣ်)ပၢၤကီၢ်၀ဲၤလီၢ်ဒီးဘံၣ်ဘၢတၢ်လီၢ်ကဲထီၣ်သး၀ံၤအလီၢ်ခံပယီၤသုးက့ၤခးလီၤကဒါကျိဖးဒိၣ်ဆူကီးတရံး၀့ၢ်ခိၣ်၀့ၢ်ဃၢၤသ၀ီတဖၣ်အပူၤန့ၣ်လီၤႉ

လီၢ်က၀ီၤကမျၢၢ်တဂၤစံး၀ဲ“ခး၀ဲတုၤလၢအခဲအံၤလီၤႉခးလီၤ၀ဲလိၤလိၤလၢ(ကီၢ်မူ)တကပၤန့ၣ်ႉအိၣ်ခးလီၤစိ၀ဲလၢ(လဲ၀ၣ်)တကပၤမီၤနီၤႉလီၤတဲာ်၀ဲဒၣ်လၢ(ယၤကိၣ်)တကပၤန့ၣ်ခံဖျၢၣ်ဘၣ်၀ဲလီၢ်က၀ီၤကမျၢၢ်(၃)ဂၤႉဖိသၣ်ခံဂၤဒီးပိာ်မုၣ်တဂၤႉမ့မ့ၢ်ကျိဖိဒုပတုာ်သးလံႉခးလီၤ၀ဲကအိၣ်လၢ(၆)ဖျၢၣ်ညါ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ

တၢ်ခးလီၤကျိဖးဒိၣ်ဘျီ၀ဲအံၤခးလီၤ၀ဲ(၅)မံးနံးတဘျီဒီးကီးတရံး၀့ၢ်ကလံၤထံး(အၤကီၤ)သ၀ီဖိဘၣ်ဒိစ့ၢ်ကီး(၁)ဂၤအဂ့ၢ်န့ၣ် လီၢ်က၀ီၤၦၤဟ့ၣ်တၢ်ကစီၣ်ဖိတဖၣ်စံး၀ဲန့ၣ်လီၤႉ

ခီဖျိပယီၤသုးခးလီၤကျိဖးဒိၣ်အဃိကတီၢ်ခဲအံၤတၢ်ပာ်လီၤ၀ဲတၢ်ဘံၣ်တၢ်ဘၢဟဲအါထီၣ်လၢကီးတရံး၀့ၢ်ပူၤဒီး ဒူသ၀ီလီၢ်က၀ီၤကမျၢၢ်လၢအိၣ်ဘူးဖဲန့ၣ်သ့ၣ်တဖၣ်စ့ၢ်ကီးဟးထီၣ်က့ၤလီၤတအိၣ်၀ဲလၢၤဘၣ်အဂ့ၢ်န့ၣ်သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ

တၢ်ခးလိာ်သးကဲထီၣ်ဖဲတနံၤအံၤဂီၤခီအတီၢ်ပူၤန့ၣ်ကီၢ်ရ့ၣ်ပၢၤကီၢ်ခိၣ်ဃုာ်ဒီးပၢၤကီၢ်သုးသံကွံာ်(၁၂)ဂၤအသိး ဖီၣ်သမူန့ၢ်၀ဲ၀ဲၤဒၢးၦၤမၤတၢ်ဖိတဂၤဒီးမၤန့ၢ်ဃုာ်၀ဲကျိ(၆)ခိၣ်ဃုာ်ဒီးကျိချံၦာ်သၣ်တနီၤအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ဘိးဘၣ်ရၤလီၤ၀ဲတၢ်ကစီၣ်န့ၣ်လီၤႉ