တၢ်ဆဲးကျိးသံကွၢ် KNU ဒူပျ၁်ယ၁်ကီၢ်ရ့ၣ်ခိၣ် ပဒိၣ်စီၤရွှ့ၣ်မီ ဘၣ်ဃးအတၢ်လဲၤထံၣ်လိ၁်သးဒီး သုးကီၣ်ကးအခိၣ် မ့အီၣ်လဲၣ်
ဖဲအပူၤကွံာ်လါစဲးပထ့ဘၢၣ် ၃၀ သီအနံၤန့ၣ် ခ့ၣ်အဲၣ်ယူၣ် ကရၢခိၣ်လီၢ်လံၤ သုးခိၣ်ကျၢၢ်ဒိၣ်စိ စီၤမူထူစ့ဖိ, တၢ်ဒီသဒၢဝဲၤကျိၤခိၣ်လီၢ်လံၤ ပဒိၣ်စီၤရီကၠၢၣ်ခ့ၣ်ဒီး ဒူပျာ်ယာ်ကီၢ်ရ့ၣ်ခိၣ် စီၤရွှ့ၣ်မီသ့ၣ်တဖၣ် မၤဝဲဒၣ်တၢ်ထံၣ်လိ၁်သးဒီး သုးကီၣ်ကးအခိၣ် သုးခိၣ်ကျၢၢ်ဒိၣ်စိ မ့အီၣ်လဲၣ်န့ၣ်လီၤ. လၢအဝဲသ့ၣ်အတၢ်လဲၤထံၣ်လိ၁်သးတဘျီညါအံၤ ခံခီခံကပၤတဲသကိးဘၣ်ဃးတၢ်ဂ့ၢ်မနုၤသ့ၣ်တဖၣ်လဲၣ်ဒီးလဲၤဝဲဒၣ်လၢမနုာ်အခၢၣ်စးလဲၣ်န့ၣ် ပဆဲးကျိးသံကွၢ်ဝဲ ဒူပျာ်ယာ်ကီၢ်ရ့ၣ်ခိၣ် စီၤရွှ့ၣ်မီ ဒ်အံၤန့ၣ်လီၤ
သံကွၢ်–ဘၣ်ဃးတၢ်လဲၤထံၣ်လိာ်သးဒီးသုးကီၣ်ကးအခိၣ်ဘျီ၀ဲအံၤ ၀ံသးစူၤဆှဲပၠးပှၤတၢ်ဂ့ၢ်တၢ်ကျိၤတစဲး.
စံးဆၢ–ယအိၣ်ဂဲၤဆၢထၢၣ်ဒ်လဲၣ်န့ၣ်ကမျၢၢ်သ့ၣ်ညါဝဲခဲလၢ၁်န့ၣ်လီၤ.ဘၣ်တဘၣ်လၢသုဝဲဒၣ်လီၤသုတသ့ၣ်ညါ ယတၢ်ဂဲၤဆၢထၢၣ်ဘၣ်.ပအိၣ်ဂဲၤဆၢထၢၣ်ဒၣ်ဒ်အပူၤကွံာ်လၢညါဒ်ထံရူၢ်ကီၢ်သဲးအဖီခိၣ်ဒီး ပဂဲၤဆၢထၢၣ်ဒီး ပလဲၤအီၤလၢထံရူၢ်ကီၢ်သဲးအတၢ်လဲၤကျဲန့ၣ်မနုၤလဲၣ်ပလဲၤအီဒ်သိးပပာ်လီၤဃာ်တၢ်အိၣ်ဆၢထၢၣ်ဒီးတၢ်ဆၢတဲာ်အဖီခိၣ် ပလဲၤအီၤလီၤ.ယတက့ၤအလီၢ်ခံဘၣ်ယကလဲၤအမဲာ်ညါလီၤ.ၦၤလၢလဲၤကဒါအလီၢ်ခံန့ၣ်ယတပိာ်အခံဘၣ် ယလဲၤဆူညါလီၤအိၣ်ဒၣ်အဝဲန့ၣ်လီၤ.
သံကွၢ်–လၢတၢ်လဲၤထံၣ်လိာ်သးတဘျီညါအံၤ နလဲၤထံၣ်လိာ်သးလၢကညီခၢၣ်စးကလုာ်ခၢၣ်စးဧါ.
စံးဆၢ–ပတၢ်လဲၤထံၣ်လိာ်သးတဘျီညါအံၤ လၢအပူၤကွံာလၢညါပ(ခ့ၣ်အဲၣ်ယူၣ်)ကရၢအတၢ်အၢၣ်လီၤလိာ်အသးဒီး ကသူၣ်ထီၣ်က့ၤထံလီၢ်ကီၢ်ပူၤတၢ်မုာ်တၢ်ခုၣ်အဂီၢ် ကလဲၤသကိးဒ်လဲၣ်အဖီခိၣ် တၢ်အိၣ်သးအဖီခိၣ်န့ၣ် လဲၤဒံးဧါ တလဲၤဒံးဧါန့ၣ် ထံၣ်လိာ်တဲလိာ်သးသူၣ်လီၤထံကီၢ်တၢ်မုာ်တၢ်ခုၣ် ပကလဲၤသကိးဒ်အပူၤကွံာ်လၢညါ ပ(ခ့ၣ်အဲၣ်ယူၣ်)ထံရူၢ်ကီၢ်သဲး တၢ်လဲၤကျဲအဖီခိၣ်လီၤအဂၤတအိၣ်ဘၣ်.
သံကွၢ်–လၢတၢ်လဲၤထံၣ်လိ၁်သးတဘျီညါအံၤတၢ်ဆၢကတီၢ်တံာ်တာ်ဖးယံၤညါဧါ.
စံးဆၢ–ပထံၣ်လိာ်သးန့ၣ်အိၣ်ဝဲ ၂ နၣ်ရံၣ်ဒီး ၁ဝ မံးနံး လီၤမီၤနီၤ.
သံကွၢ်– ပယီၤသုးကီၣ်ကးတကပၤန့ၣ် လၢသုတၢ်လဲၤဘျီညါအံၤအဃ့ထီၣ်မနုၤအိၣ်လဲၣ်.
စံးဆၢ–ယကတဲနၤတီတီန့ၣ်ပယီၤသုးန့ၣ်အိၣ်ဆၢထၢၣ်လၢ(NCA)အကျဲဖီခိၣ်လီၤ.လၢပဝဲဒၣ်တခီလီၤ လ့ၤဂီၤတၢ်ဒုး တကူၣ်တၢၣ်တၢ်ဒုး လိၣ်ၡါတၢ်ဒုး ပဝဲဒၣ်တကပၤပမ့ၢ်တခးၦၤဘၣ်န့ၣ် ၦၤတခးၦၤဘၣ်.ယအိၣ်ဒီတကတီၢ်ဖဲန့ၣ်လီၤ ၦၤတနီၤနီၤတဲဝဲလၢကမျၢၢ်ဃ့ထီၣ်ဝဲလၢပကဘၣ်ဒုးလီၤအဖီခိၣ်ဒီး မၤထွဲကမျၢၢ်အတၢ်ဘၣ်သးအတၢ်အဲၣ်ဒိးန့ၣ် ယဒွးက့ၤတဘၣ်လၢၤဘၣ်.တၢ်အဝဲန့ၣ်ပဝဲဒၣ်ကဒဲဒဲပကဘၣ်တဲလိာ်ပသးလီၤ.
သံကွၢ်–နတဲလၢပယီၤသုးအိၣ်ဆၢထၢၣ်လၢ(NCA)အဖီခိၣ်ပမ့ၢ်ဘၣ်ကွၢ်က့ၤ(ခ့ၣ်အဲၣ်ယူၣ်)ခီကရဲးဝံၤအလီၢ်ခံ ပၢဆှၢတၢ်ကမံးတံာ်ထီၣ်ခဲအံၤတဖၣ်တဲဝဲလၢ NCA အံၤပယီၤသုးမၤဟးဂီၤဝဲလံ,တလိၣ်ပလူၤပိာ်ထွဲလၢၤဘၣ် လၢတၢ်ဂ့ၢ်ဝဲအံၤအဖီခိၣ်န့ၣ်နထံၣ်ဒ်လဲၣ်.
စံးဆၢ–တၢ်အဝဲန့ၣ်တၢ်ထံၣ်တလီၤပလိာ်ဝဲဒၣ်လၢာ်လၢာ်ဆ့ဆ့ဘၣ်. ၦၤထံၣ်ဝဲဒၣ်ပယီၤသုးဟံးန့ၣ်ဆူၣ်တၢ်စိတၢ်ကမီၤ ဖီခိၣ်န့ၣ် ပ(NCA)အံၤဟးဂီၤလံ ပယီၤသုးအပဒိၣ်န့ၣ်မၤဟးဂီၤကွံာ်လံ.ယဲယတထံၣ်ဒ်န့ၣ်ဘၣ်. အဝဲသ့ၣ်အတၢ်ကီအဝဲသ့ၣ်ကဒဲကဒဲန့ၣ် ကဘှါၡဲက့ၤဝဲလၢအဝဲသ့ၣ်ဖိးမံ. လၢအဝဲသ့ၣ်အိၣ်ဒီးအတၢ်သိၣ်တၢ်သီ လၢကျဲအဖီခိၣ်လၢ(အူၣ်ပဒ့ၣ်)အဖီခိၣ် အဝဲသ့ၣ်ကလဲၤလၢအ(အူၣ်ပဒ့ၣ်)အဖီခိၣ် ကဘှါၡဲဝဲလီၤ. လၢပဝဲပ(ခ့ၣ်အဲၣ်ယူၣ်)ပဘၣ်ဂဲၤဆၢထၢၣ်လၢတၢ်အၢၣ်လီၤလိာ်သးအဖီခိၣ်ဒီး ထံကီၢ်ဝဲအံၤကမုာ်ကခုၣ်အဂီၢ်န့ၣ် ပကမၤသကိးအီဒ်လဲၣ် ပတဲလိာ်သးဝံၤအလီၢ်ခံဒၢး ပကအိၣ်ဂဲၤဆၢထၢၣ်လၢပကျဲဒၣ်ပကစၢ်မီၤ. အဝဲသ့ၣ်အတၢ်ဂ့ၢ်ကီ အဝဲသ့ၣ်ကဒဲကဒဲအမၤလိာ်သးတခါန့ၣ်ပတဘၣ်ပာ်ဃု၁်ပၣ်ဂီၢ်ဘၣ်မီၤ.ပတဘၣ်ပာ်ဃုၣ်ပာ်ဂီၢ်ဘၣ်ဒီး ပကလဲၤလၢ ပကျဲဒၣ်ပကစၢ်ယအဲၣ်ဒိးတဲဒ်န့ၣ်လီၤ.
သံကွၢ်–တကီၢ်ခါထံရူၢ်ကီၢ်သဲးတၢ်အိၣ်သးခဲအံၤ နအဲၣ်ဒိးတဲအါထီၣ်ထံဖိကီၢ်ဖိကမျၢၢ်ဒ်လဲၣ်.
စံးဆၢ–အခဲအံၤဖုအဲၣ်ဒိးတဲအါထီၣ်ထံဖိကီၢ်ဖိလၢတၢ်အိၣ်သးတဖၣ်န့ၣ်သုအိၣ်ဂဲၤဆၢထၢၣ်လၢကမျၢၢ်အတၢ်အဲၣ်ဒိးအဖီခိၣ် ယမၤထွဲကမျၢၢ်အတၢ်ဘၣ်သးဒီတကတီၢ်လီၤ.ယဒုးတၢ်အခါလံၤလံၤကမျၢၢ်အတၢ်ဃ့ထီၣ်အတၢ်အဲၣ်ဒိးအဖီခိၣ် ပဒုးတၢ်လီၤ.အခဲအံၤနါနာ်တၢ်ဒုးတခါစ့ၢ်ကီးလီၤ.အပူၤကွံာ်လၢညါန့ၣ်ပဒုးအီၤလၢတၢ်စုကဝဲၤ အခဲအံၤပဒုးကဒါက့ၤလၢ ထံရူၢ်ကီၢ်သဲး တၢ်ဒုးလၢတၢ်ထံၣ်လိာ်သ့ကတိၤတၢ်အကျဲပဒုးတၢ် ပဆီတလဲက့ၤပတၢ်ဒုးအကျဲလီၤ. ပတၢ်ပညိၣ်န့ၢ်မ့ၢ်ဒၣ်လၢ ပၦၤကလုာ်ကအိၣ်မုာ်ဆိးပၢၤဘၣ်အဂီၢ်လီၤ. အဃိယအဲၣ်ဒိးတဲဘၣ်သးလၢ ပတၢ်ဂုာ်ကျဲးစၢး ဝဲအံၤန့ၣ် လၢကမျၢၢ်ထံဖိကီၢ်ဖိသ့ၣ်တဖၣ်ကအိၣ်ဂၢၢ်ဆိးကျၢၤဘၣ်အဂီၢ် ပတၢ်ဂုာ်ကျဲးစၢးအိၣ်ဒၣ်အဝဲန့ၣ်လီၤ.
သံကွၢ်–ပမ့ၢ်ကွၢ်လၢ(ခ့ၣ်အဲၣ်ယူၣ်)ခိၣ်နၢ်ထီၣ်သီခဲအံၤတဖၣ်တဲဝဲဒၣ်တၢ်လၢ ကီၢ်ပယီၤခဲအံၤပဒိၣ်လၢအဖိးသဲစး တအိၣ်ဘၣ်အဃိမၤတၢ်ထံၣ်လိာ်တဲသကိးထံရူၢ်ကီၢ်သဲးတသ့ဘၣ်.လၢတၢ်ဂ့ၢ်၀ဲအံၤအဖီခိၣ်န့ၣ်နထံၣ်ဒ်လဲၣ်.
စံးဆၢ–ပအိၣ်သကိးလၢထံကီၢ်တဘ့ၣ်ဃီအပူၤဘျီၣ်ဒိၣ်(လိၣ်တီၤ)မ့ၢ်တအိၣ် ဒ်သိးကအိၣ်ထီၣ်အဂီၢ် ပဘၣ်မၤသကိး ပဘၣ်ဒုးအိၣ်ထီၣ်သကိးအီလီၤ.တၢ်အိၣ်သးဒ်အံၤအဖီခိၣ် ဒ်သိးပတဲကသ့အဂီၢ် ပကဘၣ်ဂုာ်ကျဲးစၢးန့ၢ်အီၤလီၤ အဝဲအံၤမ့ၢ်ယတၢ်ထံၣ်.
သံကွၢ်–လၢသုတၢ်လဲၤထံၣ်လိာ်သးတဘျီအံၤန့ၣ် သုလဲၤဒ်သိးလၢကညီခိၣ်နၢ်အခၢၣ်စးအသိးလီၣ်ဧါ.
စံးဆၢ–ယတၢ်လဲၤဘျီဝဲအံၤန့ၣ်ယလဲၤဒ်သိးကညီဖိတဂၤ,ကညီကလုာ်မူဒါတၢ်ဖံးတၢ်မၤအဖီခိၣ်ဒီး ယမ့ၢ်ကညီဖိတဂၤအဃိန့ၣ် ယၦၤကလုာ်အဂီၢ်တၢ်လၢအလိၣ်တဖၣ်ယကမၤအဃိယမၤထွဲမူဒါတၢ်မၤအဝဲန့ၣ်လီၤ. အဂၤတအိၣ်ဘၣ်.
သံကွၢ်–လၢတၢ်လဲၤထံၣ်လိာ်သးတဘျီအံၤအဖီခိၣ်န့ၣ် ခါဆူညါကကဲထီၣ်တၢ်လၢအဂ့ၤနီၢ်နီၢ်လီၣ်ဧါန့ၣ်ပတဲသ့ဧါ.
ယအဲၣ်ဒိးတဲသးလၢအနီၢ်ကီၢ်ပတၢ်လဲၤကျဲအဝဲအံၤန့ၣ် မ့ဝဲဒၣ်(ခ့ၣ်အဲၣ်ယူၣ်)ဒီကလုာ်စၢဖှိၣ်ကရၢအတၢ်လဲၤကျဲအဂီၢ်လီၤ. အဝဲအံၤမ့ၢ်ပကီၢ်ခိၣ်စီၤဘးအူကၠံအတၢ်အဲၣ်ဒိးဘၣ်သးလဲၤကျဲလၢ အပူၤကွံာ်ဆၢကတီၢ်အခါန့ၣ်လီၤ. ခီဖျိလၢၦၤသူၣ်ဘီၣ်သးစၢ်လၢအဲၣ်ဒိးဘၣ်သးဒုးဟံထံကီၢ်အံၤပကဘၣ်ဒုးန့ၣ်လီၤအဝဲသ့ၣ်လဲၤဝဲအဖီခိၣ်ဒီး တၢ်ကဲထီၣ်အသးဒီတကတီၢ်လံ အခဲအံၤန့ၣ်တၢ်ကဲထီၣ်အသးအဃိ အခဲအံၤန့ၣ်ပက့ၤကဒါက့ၤလၢ ပကီၢ်ခိၣ်စီၤဘးအူကၠံလၢအဝဲအတၢ်ပာ်သးကမၤန့ၢ်ကညီထံကီၢ်လၢကညီအသွံၣ်တဘၣ်လီၤစီၤနီတတိၣ်ဘၣ်အဃိန့ၣ်ဒီး နၢ်ပၢၢ်ၦၤတက့ၢ်.ၦၤမၤသကိးတၢ်တဖၣ်နၢ်ပၢၢ်ထွဲယၤတက့ၢ် ယအဲၣ်ဒိးဃ့ဝံသးစူၤအဝဲသ့ၣ်ဒံးန့ၣ်လီၤ. ပတအဲၣ်ဒိးလဲၤလီၤလၢတၢ်သွံၣ်လီၤလူလီၤဘျၢၣ်အဃိ ယက့ၤလၢယသဝီယက့ၤဃုကျဲ ယအိၣ်ယမၤဒီး ယထံၣ်န့ၣ်ကြၢးလၢပဘၣ်မၤအီၤဒံးအံၤအဖီခိၣ်ဒီး အခဲအံၤပမၤအီၤလီၤ. ယအဲၣ်ဒိးဒုးသ့ၣ်ညါက့ၤ ယၦၤကမျၢၢ် ၦၤမၤသကိးတၢ်ဖိခဲလၢာ် ပဝဲဒၣ်ပတအဲၣ်ဒိးတၢ်ဒုးတၢ်ယၤဘၣ်.ပတအဲၣ်ဒိးလၢပထံဖိကီၢ်ဖိကဘၣ် ဃ့ၣ်မှံဟးဖျိးဘၣ် .ပတအဲၣ်ဒိးပၦၤထံဖိကီၢ်ဖိအသွံၣ်ကလီၤလူညၣ်ကဘၣ်လီၤတဲာ် ကဘၣ်လုၢ်ထီၣ်အသးသမူတဖၣ် ပတအဲၣ်ဒိးလၢၤဘၣ်. တၢ်လၢလုၢ်တ့ၢ်ဃာ်လံဒီးမုၣ်ကမဲဖိၣ်ဃဲပဘၣ်ကွၢ်ထွဲတဖၣ်န့ၣ်ပကွၢ်ထွဲတတုၤ ပမူပဒါပတမၤလၢၦဲၤဘၣ်န့ၣ် အိၣ်တပူလံအဃိပတမၤအါထီမုၣ်ကမဲလၢၤဘၣ် ၦၤဖှိၣ်ဃဲလၢၤဘၣ်.ပတမၤအါထီၣ်ၦၤအက့ၢ်အဂီၤတလၢၦဲၤလၢၤဘၣ် ဘၣ်မနုၤလဲၣ် စုတူာ်ခီၣ်တဲာ်ဘၣ်လုၢ်လီၤအီၣ်အသးသမူဖှီၣ်ဖှီၣ်နးနးတဖၣ်န့ၣ်ပတအဲၣ်ဒိးထံၣ်လၢၤဘၣ်.အဃိ ပဃုထီၣ် ကျဲဒီးပမၤအီၤလီၤန့ၣ် ပအဲၣ်ဒိးဒုးသ့ၣ်ညါက့ၤပၦၤမၤသကိးတၢ်ဖိတဖၣ်ဒီး ကမျၢၢ်ထံဖိကီၢ်ဖိတဖၣ်စ့ၢ်ကီးလီၤ. ပတၢ်လဲၤအံၤတမ့ၢ်တၢ်တူၢ်ဃၣ်သးဘၣ်.ပၦၤကလုာ်အတၢ်အဲၣ်ဒိးဘၣ်သးကလၢထီၣ်ၦဲၤထီၣ်အဂီၢ်ပမၤအီၤလၢတၢ်မုာ်တၢ်ခုၣ်လၢသွံၣ်တဘၣ်လီၤစီၤ သးသမူတဘၣ်ယူၤထီၣ်ဘၣ်အကျဲလီၤန့ၣ် ယအဲၣ်ဒိးဒုးသ့ၣ်ညါက့ၤလီၤ.ပတၢ်လဲၤကျဲအံၤန့ၣ် ၦၤတသးလီဘၣ်. ပတၢ်ပညိၣ်ဖီတၢၣ်န့ၣ်ဒ်သိးသိးလီၤ.တၢ်ပညိၣ်ဖီတၢၣ်ကတုၤအဂီၢ် ကူၣ်ထီၣ်ဖးလီၤက့ၤကျဲတဒ်သိးဘၣ် အဖီခိၣ် နမ့ၢ်ပာ်ဖှိၣ်မၤသကိးက့ၤလိာ်သးကျဲလၢမ့ၢ်တဒ်သိးဒၣ်လဲၣ် တၢ်ပညိၣ်မ့ၢ်ဒ်သိးသိးအဖီခိၣ် ပမ့ၢ်လဲၤက့ၤအၤန့ၣ် ပမ့ၢ်ဖီၣ်လီၤက့ၤစုမၤသကိးတၢ်န့ၣ် ကကဲဘျုးလၢပၦၤဒီတကလုာ်တကးဘၣ် လၢထံကီၢ်အဂီၢ်ယဆိမိၣ်ဒံးန့ၣ်လီၤ.
သံကွၢ်–ခါဆူညါတၢ်ရဲၣ်တၢ်ကျဲၤအိၣ်စ့ၢ်ဧါလၢကလဲၤထံၣ်လိာ်သးဒီးသုးကီၣ်ကးလၢအသီတဘျီကဒီးန့ၣ်.
စံးဆၢ–ဆူညါတၢ်လၢတၢ်ထံၣ်လိာ်သးန့ၣ်တဘျီတဝံၤဘၣ်.ပမ့ၢ်ကွၢ်ကဒါက့ၤလၢအပူၤကွံာ် ဒ်သိးတၢ်ပတုာ်တၢ်ခး တၢ်အၢၣ်လီၤလိာ်သးလံာ်ဃံးဃာ်ကန့ၢ်အဂီၢ်န့ၣ် ပဘၣ်ထံၣ်လိာ်သးအဘျီတဖၣ်အဘျီ,တဘျုးလၢအနံၣ်ဒံးညါ အဃိဒီးတၢ်မၤအသးလၢလီၢ်ကဝီၤဒ်အံၤအဖီခိၣ် နလဲၤထံၣ်တဘျီအံၤကဝံၤဝဲလဲၣ်. ကဘၣ်ထံၣ်ဝဲတပတီၢ်ဘၣ်တပတီၢ် အဘျီဒုပတဲတသ့ဘၣ်.ဒ်ကြၢးဝဲဒီးအလီၢ်အိၣ်အသိးပကဘၣ်ထံၣ်အီၤအိၣ်ဝဲလီၤ.
