ပယီၤသုးခးပိၢ်ထီၣ်ကျိလၢကီးတရံး၀့ၢ်ပူၤဒီးနုာ်လီၤသမံသမိးၦၤတမှံၤစရီလၢဟံၣ်တဖျၢၣ်၀ံၤတဖျၢၣ်

လါအီကူး ၁၈ သီႇ ၂၀၂၂ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် ကီးတရံး၀့ၢ်ပူၤ တၢ်ခးလိာ်သးကဲထီၣ်၀ံၤအလီၢ်ခံ ပယီၤသုးနုာ်လီၤသမံသမိးၦၤတမှံၤစရီ(ဧည့်စရင်း)လၢၦၤဟံၣ်တဖျၢၣ်၀ံၤတဖျၢၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ

ဖဲမဟါလါအီကူး ၁၇ သီ မုၢ်ဃ့ၢ်လီၤအဆၢကတီၢ်န့ၣ် သိလ့ၣ်ခံခိၣ်လၢပယီၤသုးနီၣ်ဂံၢ်ကအိၣ်အဂၤ(၂၀)ဘျဲၣ်အံၤ နုာ်လီၤ၀ဲဒၣ်လၢကီးတရံး၀့ၢ်ပူၤဒီးခးပိၢ်ထီၣ်ကျိလၢတၢ်ဖးဖီအဂ့ၢ်န့ၣ် လီၢ်က၀ီၤကမျၢၢ်လၢအိၣ်၀့ၢ်ပူၤတဂၤစံး၀ဲ ဒ်အံၤန့ၣ်လီၤႉ

“ဟဲနုာ်လီၤန့ၣ်ကဘၣ်ဖဲဟါခီ ၄ နၣ်ရံၣ်ဘျဲၣ်ႇ ၦၤနီၣ်ဂံၢ်ကအိၣ်လၢအဂၤ(၂၀)ဘျဲၣ်ညါႉ မ့၀ံၤထုးထီၣ်၀ဲဒၣ်ကျိခးပိၢ်ထီၣ်၀ဲလီၤႉဒီတ၀့ၢ်စံၣ်ပြံပြါခဲလၢာ်ႉၦၤက့ၤစံၣ်နုာ်လီၤလၢဟံၣ်ပူၤကးတံၢ်က့ၤပဲတြီအိၣ်ဘှ့ၣ်ဘှီၣ်ဒီတ၀့ၢ်လီၤႉအ၀ဲသ့ၣ်ဟးကိးပသူဆိၣ်တၢ်ခးကျိႇလူၤခးဒံးၦၤခံဂၤဒီးကျိကိညၢ်တဘၣ်ဘၣ်ႉ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ

တၢ်ကဲထီၣ်သး၀ံၤအလီၢ်ခံဖဲဟါခီ ၈ နၣ်ရံၣ်ဃၣ်ဃၣ်အဆၢကတီၢ်န့ၣ် က၀ီၤဒ့ၦၤဘၣ်မူဘၣ်ဒါႇ ၦၤဟ့ၣ်တၢ်ကစီၣ်လၢက၀ီၤဒ့ပူၤ(တၢ်မဲာ်ချံ)တဖၣ်ႇပၢၤကီၢ်ဒီးပယီၤသုးတဖၣ်နုာ်လီၤလၢကမျၢၢ်အဟံၣ်ပူၤဃုာ်ဒီးစုက၀ဲၤလၢလၢၦဲၤၦဲၤဒီးလူၤသမံသမိး၀ဲတၢ်အဂ့ၢ်န့ၣ် ၦၤအိၣ်၀့ၢ်ပူၤတဖၣ်စံး၀ဲန့ၣ်လီၤႉ

ဖဲအပူၤကွံာ်လါအီကူး ၁၅ သီ ဂီၤခီ ၁၁ နၣ်ရံၣ်ဃၣ်ဃၣ်အဆၢကတီၢ်န့ၣ် တၢ်ပၢဆၢသုးပာ်ဖှိၣ်ကရူၢ်နုာ်လီၤခး၀ဲ ကီးတရံး၀့ၢ်ပူၤပၢၤကီၢ်၀ဲၤလီၢ်(၂)ဖျၢၣ်ဒီးသုးမီၤစိရိၤတၢ်ဘံၣ်တၢ်ဘၢလီၢ်ကဲထီၣ်တ့ၢ်အသးဒံးန့ၣ်လီၤႉ

တၢ်ခးလိာ်သးကဲထီၣ်ဘျီ၀ဲန့ၣ်၀ံၤအလီၢ်ခံခီဖျိပယီၤသုးခီၣ်သုးရ့ၣ်(၉၇)ခးလီၤ(၁၃၀)ကျိဖးဒိၣ်လၢ တၢ်ခိၣ်တၢ်ဃၢၤဖဲန့ၣ်အဃိဘၣ်ဟးဂီၤ၀ဲလီၢ်က၀ီၤဖိအဟံၣ်(၂)ဖျၢၣ်ႇသိလ့ၣ်ယီၢ်(၂)ခိၣ်ဒီးကမျၢၢ်ဘၣ်ဒိဘၣ်ထံးတစှၤန့ၢ်(၅)ဂၤဘၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ