ပယီၤသုးမီၤစိရိၤနီဟးထီၣ်ကွံာ်မူကီၢ်ဆၣ်ပူၤသ၀ီ(၃)ဖျၢၣ်လီၢ်က၀ီၤဖိတဖၣ်လၢသ၀ီပူၤ

လါစဲးပထ့ဘၢၣ် ၁၄ သီႇ ၂၀၂၂ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ်(သုးက့ ၃) မူကီၢ်ဆၣ်အပူၤန့ၣ် ခီဖျိပယီၤသုးမီၤစိရိၤနီဟးထီၣ်ကွံာ်သ၀ီ(၃)ဖျၢၣ်လီၢ်က၀ီၤဖိတဖၣ်လၢသ၀ီပူၤအဃိ လီၢ်က၀ီၤသ၀ီဖိတဖၣ်ဘၣ်ဟးထီၣ်၀ဲအဂ့ၢ်န့ၣ်သ့ၣ်ညါဘၣ်န့ၣ်လီၤႉ

ဖဲအပူၤကွံာ်လါစဲးပထ့ဘၢၣ် ၁၁ သီအခါ ပယီၤသုးမီၤစိရိၤ သုးခိၣ်စိ စ့ၤယၤလ့လၢအနုာ်လီၤအိၣ်ဆီလီၤသးဖဲ ဟီၣ်က၀ီၤဖဲန့ၣ်အပူၤအံၤကိးဖှိၣ်၀ဲဒူသ၀ီသူၣ်က့သးၦၢ်တဖၣ်ဒီးမၢဆူၣ်၀ဲ(တမၤခီ)သ၀ီဒီး(တီၤစူၣ်)သ၀ီဖိတဖၣ်လၢဟးထီၣ်ကွံာ်လၢသ၀ီပူၤအသိး ဖဲလါစဲးပထ့ဘၢၣ် ၁၃ သီအနံၤစ့ၢ်ကီးမၢဆူၣ်ကဒီး(နီၤကိ)သ၀ီဖိတဖၣ် လၢကဟးထီၣ်ကွံာ်လၢသ၀ီပူၤအဃိ လီၢ်က၀ီၤဖိတဖၣ်ဘၣ်ဟးထီၣ်သုးအလီၢ်အဂ့ၢ်န့ၣ် ချၢၣ်လွံၢ်ထူၣ်ကီၢ်ရ့ၣ် လီၢ်က၀ီၤကညီၦၤဂ့ၢ်၀ီကရူၢ် ၦၤဘၣ်မူဘၣ်ဒါတဂၤစံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“ဘၣ်မနုၤအဃိလၢဘၣ်သုးလီၢ်လဲၣ်န့ၣ်တသ့ၣ်ညါဘၣ်ႉဖဲလါထီၣ် ၁၁ သီအနံၤန့ၣ် မၢၦၤသုးလီၢ်အဃိ လီၢ်က၀ီၤဖိတဖၣ်ဖဲ ၁၂ သီအနံၤန့ၣ် သုးလီၢ်ခဲလၢာ်လီၤႉ မ့၀ံၤဖဲမဟါဟါခီနါက့ပယီၤသုးနုာ်လီၤလၢ(နီၤကိ)သ၀ီပူၤ နီဟးထီၣ်ၦၤခဲလၢာ်လီၤႉပံးဃာ်၀ဲကျဲလၢအံၤတကပၤဒီးမၢလဲၤ၀ဲလၢကျဲမုၢ်ခိၣ်လၢန့ၣ်တကပၤန့ၣ်မီၤနီၤႉမၢလီၢ်က၀ီၤကမျၢၢ်လဲၤဟးပလဲာ်လၢလၢၢ်ဒိၣ်တကပၤန့ၣ်မီၤနီၤႉမ့၀ံၤလၢတၢ်ကနုာ်လီၤလၢၢ်ဒိၣ်ႇဆ့းကၠံနါက့ကယဲၢ်မ့ၢ်ၦၤစိာ်လီတဲစိန့ၣ်ဟံသမံသမိး၀ဲဒီးဟံးဃာ်၀ဲခဲလၢာ်လီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ

တမၤခီသ၀ီလီၢ်က၀ီၤဖိလၢအဘၣ်သုးလီၢ်တဖၣ်ဟံၣ်ခိၣ်အိၣ်၀ဲ(၆၁)ဖျၢၣ်ႇၦၤနီၣ်ဂံၢ်အိၣ်၀ဲ(၃၃၄)ဂၤဒီး ၦၤသ့ၣ်တဖၣ်အံၤသုးအလီၢ်လဲၤအိၣ်၀ဲလၢစ့ၣ်တီကျိမုၢ်နုာ်နိၤဘိခံသ၀ီဒီးဒူသ၀ီလၢအိၣ်ဘူးဖဲန့ၣ်တဖၣ်အပူၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ

နီၤကိသ၀ီလၢပယီၤသုးမၢအသုးလီၢ်သုးကျဲအံၤဖဲအပူၤကွံာ်လါအီကူးအခါစ့ၢ်ကီးသ၀ီဖိတဖၣ်သုးအလီၢ်အကျဲဒီးခီဖျိသ၀ီဖိတနီၤလၢတၢ်လုၢ်အီၣ်နီၢ်ခိသးသမူအဂီၢ်ဖဲအ၀ဲသ့ၣ်ဟဲက့ၤအိၣ်ကဒါလၢသ၀ီပူၤအကတီၢ်ဖဲမဟါလါစဲးပထ့ဘၢၣ် ၁၃ သီ ဟါခီ ၃ နၣ်ရံၣ်ဃၣ်ဃၣ်အဆၢကတီၢ်န့ၣ် ပယီၤသုးနုာ်လီၤ၀ဲဒၣ်လၢသ၀ီပူၤအဂၤ(၂၀)ဃၣ်ဃၣ်ဒီးနီ ဟးထီၣ်ကဒီး၀ဲလီၢ်က၀ီၤသ၀ီဖိလၢအဟဲက့ၤအိၣ်ကဒါလၢသ၀ီပူၤတဖၣ်အဂ့ၢ်န့ၣ်လီၢ်က၀ီၤဖိိတဖၣ်စံး၀ဲန့ၣ်လီၤႉ

လၢန့ၣ်အမဲာ်ညါလၢမိကီၢ်ဆၣ်အပူၤလီၢ်က၀ီၤကမျၢၢ်လၢအဘၣ်ဃ့ၢ်မှံဟးဖျိးတဖၣ်တနီၤန့ၣ်ဖဲပယီၤသုးတၢ်ဟူးတၢ်ဂဲၤတအိၣ်ဘၣ်အကတီၢ်အ၀ဲသ့ၣ်က့ၤဘုၣ်လီၤ၀ဲအဆၣ်ဖိကီၢ်ဖိအဆၣ်လၢသ၀ီပူၤအိၣ်၀ဲဒီးဖဲအပူၤကွံာ်လါစဲးပထ့ဘၢၣ် ၁၂ သီအနံၤန့ၣ်ဖဲသ၀ီဖိတဂၤက့ၤလၢသ၀ီပူၤအခါတိနိၣ်၀ဲဒီးပယီၤသုးတၢ်ခးသံကွံာ်အီၤအဂ့ၢ်န့ၣ် သ့ၣ်ညါဘၣ်လၢကညီၦၤဂ့ၢ်၀ီကရူၢ်အအိၣ်န့ၣ်လီၤႉ

လၢန့ၣ်အမဲာ်ညါဖဲလါစဲးပထ့ဘၢၣ် ၉ သီအနံၤစ့ၢ်ကီး လၢလၢၢ်ဒိၣ်ကီၢ်ဆၣ်အပူၤ ပယီၤသုးလၢအအိၣ်ဟဲက့ၤလီၤလၢခ့ၣ်အဲၣ်ယူၣ်(သုးက့ ၅)တဖၣ်ဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်(၃)အဘၢၣ်စၢၤတၢ်ဒုးကဲထီၣ်အဃိသ၀ီ(၉)ဖျၢၣ်လီၢ်က၀ီၤဖိအဂၤ(၁၀၀၀)ဘျဲၣ်ဘၣ်ဃ့ၢ်မှံဟးဖျိး၀ဲအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲလါစဲးပထ့ဘၢၣ် ၁၀ သီအနံၤန့ၣ်လီၤႉ

လၢခ့ၣ်အဲၣ်ယူၣ်(သုးက့ ၃)ဟီၣ်က၀ီၤအပူၤ တချုးလၢသုးဟံးန့ၢ်တၢ်စိတၢ်ကမီၤကဲထီၣ်သးဒံးဘၣ်အခါန့ၣ် ဟီၣ်က၀ီၤပူၤကမျၢၢ်ၦၤဃ့ၢ်မှံဟးဖျိးအနီၣ်ဂံၢ်အိၣ်၀ဲ(၆၀၀၀)ဘျဲၣ်လီၤဒီးစးထီၣ်လၢသုးဟံးန့ၢ်တၢ်စိတၢ်ကမီၤကဲထီၣ်သး၀ံၤအလီၢ်ခံတုၤလၢတနံၣ်အံၤ(၂၀၂၂)လါအီကူးန့ၣ်ကမျၢၢ်ၦၤဃ့ၢ်မှံဟးဖျိးအနီၣ်ဂံၢ်အိၣ်၀ဲ(၈၀ႇ၀၀၀)ဘျဲၣ်ဒီးခီဖျိကမျၢၢ်လၢအဘၣ်ဃ့ၢ်မှံဟးဖျိးတဖၣ်အနီၣ်ဂ့ၢ်ဟဲအါထီၣ်၀ဲကိးမုၢ်နံၤဒဲးအဃိလိၣ်ဘၣ်၀ဲဒၣ်ၦၤဂ့ၢ်၀ီတၢ်တိစၢၤမၤစၢၤတဖၣ်အဂ့ၢ်န့ၣ် လီၢ်က၀ီၤၦၤလၢမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ