လါစဲးပထ့ဘၢၣ် ၁ သီႇ ၂၀၂၂ နံၣ်ႇ ခ့ၣ်အဲးစံၣ်
ကညီကီၢ်စဲၣ်ပဒိၣ်လၢအပူၤကွံာ်ကိတိာ်လီၢ်လံၤ(၃)ဂၤလၢအလီၤဘၣ်ဃိာ်(၂)နံၣ်လၢတၢ်ဘျၢသဲစး(၅၀၅)သ့ၣ်တဖၣ်အံၤ ဖဲတနံၤအံၤလါစဲးပထ့ဘၢၣ် ၁ သီ ဂီၤခီအဆၢကတီၢ်န့ၣ် တၢ်ပျၢ်လီၤက့ၤအ၀ဲသ့ၣ်လၢဖၣ်အၣ်(တီၤကလ့)ဃိာ်ပူၤလံအဂ့ၢ်န့ၣ် ကိတိာ်လီၢ်လံၤအသကိးတဖၣ် ပာ်ဂၢၢ်ပာ်ကျၢၤစံး၀ဲန့ၣ်လီၤႉ
“ဖဲတဂီၤအံၤဂီၤခီ ၈း၃၀ န့ၣ်တၢ်ပျၢ်လီၤက့ၤအ၀ဲသ့ၣ်အဃိပလဲၤအိၣ်စိၢ်အ၀ဲသ့ၣ်မီၤနီၤႉ ဃိာ်တၢ်ခိၣ်ထိးတဲ၀ဲလၢမုၢ်နံၤမုၢ်သီၦဲၤလံအဃိတၢ်ပျၢ်လီၤအ၀ဲသ့ၣ်လီၤႉအ၀ဲသ့ၣ်န့ၣ်ဘၣ်လီၤလၢဃိာ်ပူၤတဂၤန့ၣ်(၂)နံၣ်ဒီးခဲအံၤဟဲက့ၤထူၣ်ဖျဲးထီၣ်လံမီၤနီၤႉခဲအံၤအ၀ဲသ့ၣ်ဟဲက့ၤတုၤလၢဟံၣ်လံ”အဂ့ၢ်န့ၣ်ကိတိာ်လီၢ်လံၤအသကိးလၢအလဲၤအိၣ်စိၢ်တၢ်တဂၤစံးဘၣ်ခ့ၣ်အဲးစံၣ်န့ၣ်လီၤႉ
ကညီကီၢ်စဲၣ်ပဒိၣ်လၢအပူၤကွံာ်စိၤအခါပဒိၣ်ကရၢဖိကိတိာ်ခိၣ်ကျၢၢ်နါခ့ၤထွ့မၠ့ၣ်ဃုာ်ဒီး၀ဲၤကျိၤဘၣ်ထွဲကိတိာ်တဖၣ်အံၤကီၢ်စဲၣ်သုးမီၤစိရိၤတကပၤစံၣ်ညီၣ်လီၤလၢကဘၣ်လီၤလၢဃိာ်ပူၤန့ၣ်လီၤႉ ခဲအံၤကိတိာ်လီၢ်လံၤလၢတၢ်ပျၢ်လီၤက့ၤအီၤ(၃)ဂၤအံၤမ့ၢ်၀ဲအူဘိၤဘိၤ၀့ၤမီၤ(ကညီကီၢ်စဲၣ်ၦၤဂ့ၢ်၀ီကိတိာ်)ႇခိၤမၠိတ့ၣ်(ပအိၣ်ကလုာ်ဒူၣ်ဂ့ၢ်၀ီကိတိာ်)ႇအူမ့ကိၤခဲၤ(ထံလီၢ်ကီၢ်ပူၤတၢ်နုာ်လီၤဟးထီၣ်ဒီး ကမျၢၢ်ဂံၢ်ဘါကိတိာ်)သ့ၣ်တဖၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ
