ပယီၤသုးဖီၣ်ကိးသူ၀ဲလီၢ်က၀ီၤကမျၢၢ်(၉)ဂၤဒ်တၢ်ဒီသဒၢစုက၀ဲၤအသိး

လါစဲးပထ့ဘၢၣ် ၉ သီႇ ၂၀၂၂ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤ ဘံလ့ကီၣ်ဆၣ်အပူၤ ပယီၤသုးလၢအိၣ်လ့က့ၣ်သုးကလၢၤလၢအကဆီတလဲအသးအံၤတဖၣ် ဖဲလါစဲးပထ့ဘၢၣ် ၆ သီအနံၤန့ၣ် ဖီၣ်က့ၤကိးသူ၀ဲဒၣ်လီၢ်က၀ီၤကမျၢၢ်(၉)ဂၤဒ်တၢ်ဒီသဒၢစုက၀ဲၤအသိးအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲ ဖဲလါစဲးပထ့ဘၢၣ် ၇ သီအနံၤန့ၣ်လီၤႉ

ပယီၤသုးခီၣ်ချ့သုးရ့ၣ်(ခမရ–၄၁၀)လၢအိၣ်ဆီလီၤသးဖဲလ့က့ၣ်သုးကလၢၤအံၤတဖၣ်လၢကဆီတလဲသးအဂီၢ် ဖဲအ၀ဲသ့ၣ်က့ၤလၢတၤပီသုးကလၢၤအဆၢကတီၢ်ဖီၣ်က့ၤကိး၀ဲကါမဲသ၀ီႇတၤပီၤခံသ၀ီႇနီၣ်ကတိးခံႇကၠီၣ်တီၤဒီးနိၣ်တလၤအီသ၀ီဖိ(၉)ဂၤဒီးသူ၀ဲဒ်တၢ်ဒီသဒၢစုက၀ဲၤအသိးအဂ့ၢ်န့ၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ

လီၢ်က၀ီၤသ၀ီဖိလၢပယီၤသုးဖီၣ်က့ၤကိး၀ဲ(၉)ဂၤအံၤအကျါဖဲလါစဲးပထ့ဘၢၣ် ၆ သီအနံၤန့ၣ် တၢ်ပျၢ်လီၤက့ၤ၀ဲ(၆)ဂၤလံဘၣ်ဆၣ် သ၀ီဖိလၢအအိၣ်တ့ၢ်(၃)ဂၤန့ၣ်တၢ်တပျၢ်လီၤက့ၤ၀ဲဒံးဘၣ်ဒီး ဖဲလါစဲးပထ့ဘၢၣ် ၇ သီ မုၢ်နၤခီအဆၢကတီၢ်န့ၣ် က့ၤကိး၀ဲပှၤသ့ၣ်တဖၣ်အံၤတုၤလၢပနွဲၢ်ကျါသုးကလၢၤညါ အဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ

လီၢ်က၀ီၤဖိတဂၤစံး၀ဲ“တၢ်တနံၤန့ၣ်အ၀ဲသ့ၣ်၀ံထီၣ်ဃၤဒီးက့ၤ၀ဲတဒူၣ်မီၤနီၤႉဖဲအ၀ဲသ့ၣ်က့ၤလၢကျဲအခါန့ၣ်ပနၢ်ဟူလၢအဖီၣ်ၦၤလီၢ်က၀ီၤသ၀ီဖိတဖၣ်မီၤနီၤႉအ၀ဲသ့ၣ်မ့က့ၤန့ၣ်တက့ၤတဘျီဃီဘၣ်က့ၤနုာ်လီၤ၀ဲဒၣ်လၢအ၀ဲသ့ၣ်သုးကလၢၤလၢအိၣ်တၢ်ဘၢၣ်စၢၤအံၤဒီးမုၢ်ဟါမးအ၀ဲသ့ၣ်ဟးထီၣ်ႉၦၤလၢတၢ်ဖီၣ်အီၤတဖၣ်အံၤကဘၣ်မ့ၢ်ပယီၤသုးထံၣ်၀ဲလၢကျဲႇဖီၣ်၀ဲလၢဒဲပူၤတဖၣ်လီၤမီၤနီၤႉပယီၤသုးကရူၢ်လၢအဂၤနါက့အီသံးဆူၣ်မးႉမ့၀ံၤအ၀ဲသ့ၣ်အခိၣ်န့ၣ် အသးတထီဘၣ်” အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ

ဖဲအပူၤကွံာ်လါစဲးပထ့ဘၢၣ် ၄ သီအနံၤန့ၣ် ပယီၤသုးလၢအိၣ်လ့က့ၣ်သုးကလၢၤတဖၣ်အံၤမူၤထီၣ်သံးဒီး နုာ်လီၤလၢသ၀ီပူၤခးနါစိၤကျိႇဆိၣ်ထု၀ဲလီၢ်က၀ီၤသ၀ီဖိတဖၣ်အသိးခီဖျိအ၀ဲသ့ၣ်ခးတပျုာ်တပျီာ်ကျိအဃိဘၣ်၀ဲဒၣ်ၦၤဟံၣ်အိၣ်၀ဲအဂ့ၢ်န့ၣ် လီၢ်က၀ီၤဖိိတဖၣ်စံး၀ဲန့ၣ်လီၤႉ

ပယီၤသုးလၢအိၣ်ဆီလီၤသးဖဲလ့က့ၣ်သုးကလၢၤအံၤတဖၣ်ဖဲအပူၤကွံာ်လါစဲးပထ့ဘၢၣ် ၁ သီအနံၤစ့ၢ်ကီး ကိးထံၣ်၀ဲသူကဘံႇပယၢ်ရီသ၀ီၦၤဘၣ်မူဘၣ်ဒါတဖၣ်ဒီးမၢတၢ်ကျီန့ၢ်အ၀ဲသ့ၣ်လၢ၀ၣ်အဘိ(၁၀၀)ဒီးသ့ၣ်တဖၣ်အဂ့ၢ်န့ၣ်လီၢ်က၀ီၤဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ

လၢန့ၣ်အမဲာ်ညါကမၤမိၢ်ဒီးကတၢၢ်တံာ်ပယီၤသုးကလၢၤတဖၣ်အံၤစ့ၢ်ကီးခးလီၤကျိဖးဒိၣ်ဆူခ့ၣ်အဲၣ်ယူၣ်(သုးက့ ၁)ဟီၣ်က၀ီၤ ဘံလ့ကီၢ်ဆၣ်ပူၤတလီၢ်လီၢ်အိၣ်၀ဲအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ

ဖဲအပူၤကွံာ်လါအီကူး ၃၀ သီအနံၤစ့ၢ်ကီး ပယီၤသုးပၢဆှၢရဲၣ်ကျဲၤသုး၀ဲၢ်လီၢ်ခိၣ်သ့ၣ်(စကခ–၈)စုတီၤအဖီလာ်(ခမရ–၄၁၀)အၦၤတဖၣ်အံၤလၢကဆီတလဲသုးအဂီၢ်ဖဲအ၀ဲသ့ၣ်လဲၤဆူလ့က့ၣ်သုးကလၢၤ အခါတၢ်ခးလိာ်သးကဲထီၣ်၀ဲဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇကညီဒီကလုာ်ဂၢၤသးကရၢ(KNDO)ႇသိၣ်မှံၤတၢ်ပၢၢ်ဆၢကရူၢ်တဖၣ်ဒံးဒီးဖဲန့ၣ်ပယီၤသုးတကပၤသံ၀ဲ(၆)ဂၤႇဘၣ်ဒိ(၂)ဂၤအဂ့ၢ်န့ၣ် ခ့ၣ်အဲၣ်ယူၣ်ထုုးထီၣ်ပာ်ဖျါ၀ဲန့ၣ်လီၤႉ