လါအီးကထိဘၢၣ် ၂၄ သီႇ ၂၀၂၂ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤ ကၠဲၣ်ထိၤကီၢ်ဆၣ်အပူၤ ဖဲအပူၤကွံာ်လါအီးကထိဘၢၣ် ၁၉ သီအနံၤန့ၣ် ပယီၤသုးနုာ်လီၤဒွဲၣ်အူအီၣ်ကွံာ်(ပျဥ်းကတိုးကုန်း)သ၀ီကရူၢ် ပနွဲၢ်ကျါသ၀ီပူၤဟံၣ်(၆)ဖျၢၣ်ဒီးလီၢ်က၀ီၤကမျၢၢ်(၈၀၀၀)ဘျဲၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ
တချုးလၢပယီၤသုးနုာ်လီၤဒွဲၣ်အူအီၣ်ပနွဲၢ်ကျါသ၀ီပူၤဟံၣ်ဃီတဖၣ်ဒံးဘၣ်အခါန့ၣ် အ၀ဲသ့ၣ်ခးလီၤ၀ဲကျိဖးဒိၣ်ကျိဖိတဖၣ်ဆူသ၀ီပူၤ၀ံၤဒွဲၣ်အူအီၣ်၀ဲသ၀ီပူၤဟံၣ်ဖးဒိၣ်(၆)ဖျၢၣ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
လၢန့ၣ်အမဲာ်ညါပယီၤသုးတဖၣ်အံၤဖီၣ်ဒုးဃာ်၀ဲပနွဲၢ်ကျါသ၀ီဖိ(၂)ဂၤအသိးနုာ်လီၤမၤဟးဂီၤသ၀ီဖိလၢအဘၣ်စံၣ်သ့ၣ်တဖၣ်အံၤအဟံၣ်အဃီဟံးန့ၢ်၀ဲတၢ်ဖိတၢ်လံၤလုၢ်ဒိၣ်ၦ့ၤဒိၣ်လၢအိၣ်ဟံၣ်ပူၤတဖၣ်တကးဒံးဘၣ်အမဲာ်ညါ နုာ်လီၤအိၣ်ဆီလီၤသးလၢသီခါဖၠၣ်ကရၢၢ်ပူၤအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ
“တၢ်ခးလိာ်သးကဲထီၣ်လၢကၠဲၣ်ထံယိကစၢၢ်ခီၣ်ထံး၀ံၤအလီၢ်ခံန့ၣ်ပယီၤသုးဟူးဂဲၤအါထီၣ်လၢကၠဲၣ်ထိၤမီၤနီၤႉပယီၤသုးခးလီၤကျိဖးဒိၣ်လၢသ၀ီပူၤႉဖဲအ၀ဲတနံၤန့ၣ်ပယီၤသုးနုာ်လီၤဒွဲၣ်အူအီၣ်ပနွဲၢ်ကျါသ၀ီပူၤဟံၣ်ဃီဒံးမီၤနီၤႉၦၤလၢအိၣ်ကၠဲၣ်ထံယိကစၢၢ်ခီၣ်ထံးတဖၣ်အါဒၣ်တက့ၢ်န့ၣ်ဘၣ်ဃ့ၢ်ထီၣ်ႉကဘီယူၤနါက့ဟဲခးလီၤတၢ်တလီၢ်လီၢ်လီၤႉတၢ်ခးလိာ်သးနါက့အိၣ်ဒံး၀ဲ”အဂ့ၢ်န့ၣ်ကၠဲၣ်ထိၤကီၢ်ဆၣ် လီၢ်က၀ီၤကမျၢၢ်တဂၤစံးဘၣ်ခ့ၣ်အဲးစံၣ်န့ၣ်လီၤႉ
ခီဖျိပယီၤသုးနုာ်လီၤမၤဒုးယၤတၢ်ဟူးတၢ်ဂဲၤအဃိပနွဲၢ်ကျါသ၀ီႇပျဥ်းကတိုးကုန်းႇအ့ၤကၣ်ဘိၤႇကဒိုင်ဒွတ်‚ေရွှဂဲရိုး‚ဂူးကူးႇလၢၢ်ချီၣ်ႇသ၀ီသီ ဇီးေပြာင်း သ၀ီခဲလၢာ်အဖျၢၣ်(၂၀)ဃၣ်ဃၣ်ဘၣ်ဃ့ၢ်ထီၣ်၀ဲဒီး ၦၤသ့ၣ်တဖၣ်အံၤလိၣ်ဘၣ်၀ဲ တၢ်ဆီၣ်ထွဲမၤစၢၤတဖၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ
ပယီၤသုးဂံၢ်ဘါအဂၤ(၅၀၀)ဃၣ်ဃၣ်လၢအနုာ်လီၤဟူးဂဲၤလၢကၠဲၣ်ထိၤကီၢ်ဆၣ်ပူၤတဖၣ်မ့ၢ်၀ဲ(စကခ–၁၃)‚(ခမရ–၅၅၉)‚(သုးတြိၤ–၇၇)ႇ(သုးတြိၤ–၄၄)‚(ခမရ–၂၀၇)‚(ခမရ–၂)သ့ၣ်တဖၣ်ဒီး ပယီၤသုးကျိၤနုာ်လီၤ၀ဲဒၣ်လၢ (အ့ၤကၣ်ဘိၤ)သ၀ီတကျိၤႇလၢကၠဲၣ်ထံယိကစၢၢ်လူၢ်(၀့ၣ်စၤ)ကစၢၢ်တကျိၤဒီးဖဲန့ၣ်ဖီၣ်သူ၀ဲအ့ၤကၣ်ဘိၤသ၀ီဖိ(၄)ဂၤဒ် တၢ်ဒီသဒၢစုက၀ဲၤအသိးအဂ့ၢ်န့ၣ်ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
လၢခ့ၣ်အဲၣ်ယူၣ် ကၠဲၣ်ထိၤကီၢ်အပူၤ ဖဲအပူၤကွံာ်လါအီးကထိဘၢၣ် ၁၂ သီအနံၤန့ၣ် တၢ်ဒုးကဲထီၣ်ဖဲထီၣ်ကၠဲၣ်ထံယိကစၢၢ်တြဲၤအိၣ်ခိးတၢ်လီၢ်အဃိၦၤလဲၤဘါဃိၣ်ဖိသံ၀ဲ(၃)ဂၤကဲထီၣ်သး၀ံၤအလီၢ်ခံ ပယီၤသုးနုာ်လီၤဟူးဂဲၤအါထီၣ်လၢခ့ၣ်အဲၣ်ယူၣ် ကၠဲၣ်ထိၤကီၢ်ဆၣ် ကၠဲၣ်ထံယိကစၢၢ်ခီၣ်ထံးအဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲအသိးသ့ၣ်ညါဘၣ်န့ၣ်လီၤႉ
