ပယီၤသုးဟဲတ့ၢ်လီၤမ့ၣ်ပိၢ်ဒီးကဘီယူၤဒြိလၢလီၢ်က၀ီၤ(KPDF)တြဲၤအိၣ်ခိးသမံသမိးတၢ်လီၢ်

လါအီးကထိဘၢၣ် ၂၁ သီႇ ၂၀၂၂ နံၣ်ႇ ခ့ၣ်အဲးစံၣ်

လၢတနီသရံၣ်ကီၢ်ခီဒိၣ် ပလီကီၢ်ဆၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤအပူၤ ပယီၤသုးဟဲတ့ၢ်လီၤမ့ၣ်ပိၢ်ဒီးကဘီယူၤဒြိလၢကညီတၢ်ဒီသဒၢကမျၢၢ်သုး(KPDF)တြဲၤအိၣ်ခိးသမံသမိးတၢ်လီၢ်အဂ့ၢ်န့ၣ် (KPDF)ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ

(ပလီ)ကညီတၢ်ဒီသဒၢကမျၢၢ်သုး(KPDF)အံၤမ့ၢ်တြဲၤတဘ့ၣ်လၢအိၣ်ခိးသမံသမိး၀ဲကသံၣ်မူၤဘှီးဒီး ဒ်သိးပနံာ်တၢ်ဖိတၢ်လံၤလၢသုးမီၤစိရိၤထုးထီၣ်၀ဲတဖၣ်သုတဟဲနုာ်လီၤလၢဟီၣ်က၀ီၤပူၤတဂ့ၤအဂီၢ်န့ၣ်အိၣ်ခိးသမံသမိး၀ဲန့ၣ်လီၤႉဘၣ်ဆၣ်ဖဲမဟါလါအီးကထိဘၢၣ် ၂၀ သီ ဂီၤခီ ၁၀း၃၀ ဃၣ်ဃၣ်အဆၢကတီၢ်န့ၣ် ပယီၤသုးအံၤသူ၀ဲကဘီယူၤဒြိဟဲတ့ၢ်လီၤ၀ဲမ့ၣ်ပိၢ်(၄)ဖျၢၣ်လၢ(KPDF)တြဲၤအိၣ်ခိးတၢ်လီၢ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ

တၢ်ဟဲတ့ၢ်လီၤမ့ၣ်ပိၢ်အံၤအဖီခိၣ် ပလီ(Palaw KPDF)မူဒါခိၣ်တဂၤစံး၀ဲ “drone အကလုာ်ခီန့ၣ်ပတသ့ၣ်ညါဘၣ်ႉ အဂံၢ်လၢကမၤဘၣ်ဒိတၢ်ဒုတအိၣ်ဘၣ်ႉအကလုၢ်ဒုသီၣ်ဖးဒိၣ်ညါ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ခီဖျိပယီၤသုးဟဲတ့ၢ်လီၤမ့ၣ်ပိၢ်ဒီးကဘီယူၤဒြိအဃိဘၣ်ဟးဂီၤ၀ဲသုးကလၢၤပူၤမ့ၣ်အူပျံၤမ့ၣ်အူတၢၣ်တဆံးတက့ၢ်လီၤဒီးအ၀ဲသ့ၣ်မၤ၀ဲဒ်အံၤဒီးခဲအံၤတဘျီန့ၣ်အိၣ်၀ဲခံဘျီလံဒီးအခီၣ်ထံးတဘျီန့ၣ်ဘၣ်ဒိ၀ဲသုးဖိတဂၤအဂ့ၢ်န့ၣ် (KPDF)ထုးထီၣ်တ့ၢ်ဃာ်၀ဲလၢညါအသိးသ့ၣ်ညါဘၣ်န့ၣ်လီၤႉ