ခီဖျိမ့ၣ်ပိၢ်ပိၢ်ဖးထီၣ်ဒီးတၢ်ထံၣ်န့ၢ်မ့ၣ်ပိၢ်လၢ၀့ၢ်ပူၤတလီၢ်လီၢ်အဃိတၢ်ဆိမိၣ်ဟဲအိၣ်ထီၣ်လၢကရူၢ်လၢမၤသကိးတၢ်ဒီးသုးမီၤစိရိၤတဖၣ်အဖီခိၣ်

လါအီးကထိဘၢၣ် ၂၀ သီႇ ၂၀၂၂ နံၣ်ႇ ခ့ၣ်အဲးစံၣ်

မၠၣ်၀တံၣ်–မဲၢ်ဆီးတိၤခိၣ်ထိးအံၤတၢ်ပာ်လီၤ၀ဲတၢ်ဘံၣ်တၢ်ဘၢဃံးဃီၣ်ဒီၣ်ဘၣ်ဆၣ် ခီဖျိမ့ၣ်ပိၢ်ပိၢ်ဖးထီၣ်ဒီးတၢ်ထံၣ်န့ၢ်၀ဲမ့ၣ်ပိၢ်ကဲထီၣ်သးတလီၢ်လီၢ်အဃိတၢ်ဆိမိၣ်ဆိမးဟဲအိၣ်ထီၣ်လၢပယီၤသုးဒီးသုးခိးကီၢ်ဆၢ(BGF)ကရူၢ်အဖီခိၣ်အိၣ်၀ဲအဂ့ၢ်န့ၣ်ကမျၢၢ်လၢအိၣ်၀့ၢ်ပူၤတဖၣ်ပဲာ်ထံနီၤဖးစံး၀ဲန့ၣ်လီၤႉ

ဖဲလါအီးကထိဘၢၣ် ၁၈ သီအနံၤန့ၣ် တၢ်ထံၣ်န့ၢ်၀ဲမ့ၣ်ပိၢ်လၢအတပိၢ်ဖးထီၣ်ဒံးဘၣ်အံၤလၢသိလ့ၣ်ပူၤ လၢမၠၣ်၀တံၣ်၀့ၢ် က၀ီၤဒ့(၄) ဘယ့ၣ်နီၤကျဲမုၢ် သုးခိးကီၢ်ဆၢ(BGF)သုးဟီၣ်က၀ီၤ(၃)အခိၣ် သုးခိၣ်ဒိၣ်ဖိ စီၤမိၣ်သိၤ အ(စတိ)စဲၢ်ကျးမဲာ်ညါအဂ့ၢ်န့ၣ်ၦၤလၢဘူးဒီးသုးမီၤစိရိၤတဖၣ်စံး၀ဲန့ၣ်လီၤႉ

ကမျၢၢ်လၢအိၣ်မၠၣ်၀တံၣ်၀့ၢ်ပူၤတဂၤစံး၀ဲ“တၢ်လီၢ်လၢၦၤထံၣ်န့ၢ်မ့ၣ်ပိၢ်လၢသိလ့ၣ်ပူၤန့ၣ်ပယီၤသုးဒီး(BGF)အိၣ်ခိးတၢ်ထီဘိလီၤႉခီဖျိၦၤထံၣ်န့ၢ်မ့ၣ်ပိၢ်လၢသိလ့ၣ်ပူၤကဲထီၣ်သးတလီၢ်လီၢ်အဃိတၢ်ဆိမိၣ်ဟဲအိၣ်ထီၣ်လၢကရူၢ်ကရၢလၢအဟးဆှၣ်တၢ်မုၢ်ဆါမုၢ်နၤလၢ၀့ၢ်ပူၤအံၤတဖၣ်အဖီခိၣ်မီၤနီၤႉမၠၣ်၀တံၣ်၀့ၢ်ပူၤအံၤခဲအံၤကဲထီၣ်ဒ်သိးလၢညါသုးပဒိၣ်ပၢတၢ်အစိၤအခါအသိးလံ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ

ကတီၢ်ခဲအံၤလၢကညီကီၢ်စဲၣ်အပူၤခီဖျိပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အဘၢၣ်စၢၤတၢ်ဒုးကဲထီၣ်ႇမ့ၣ်ပိၢ်ပိၢ်ဖးထီၣ်တလီၢ်တလီၢ်အဃိလၢစွ့ၤကိၣ်ကိၤမၠဲၤဟီၣ်က၀ီၤအပူၤစ့ၢ်ကီးသုးခိးကီၢ်ဆၢ(BGF)ကမၤဃံးထီၣ်တၢ်ဘံၣ်တၢ်ဘၢအဂ့ၢ်န့ၣ်(BGF)လီၢ်ခၢၣ်သးၦၤဟ့ၣ်ကူၣ်တၢ်ဒီးပၢဆှၢရဲၣ်ကျဲၤတၢ်ကရူၢ် သုးခိၣ်ဒိၣ်စိ စီၤခၠ့ၣ်သူၤ ထုးထီၣ်ပာ်ဖျါ၀ဲဖဲလါအီးကထိဘၢၣ် ၁၇ သီအနံၤန့ၣ်လီၤႉ

ဖဲအပူၤကွံာ်လါအ့ဖြ့ၣ်အခါစ့ၢ်ကီးမ့ၣ်ပိၢ်ပိၢ်ဖးထီၣ်လၢမၠၣ်၀တံၣ်နီၣ်ဂံၢ်(၁)တၢ်ရ့လိာ်မုာ်လိာ်တိၤခိၣ်ထံးဒံးအသိး လါအီးကထိဘၢၣ် ၁၅ သီအနံၤစ့ၢ်ကီး ခီဖျိမ့ၣ်ပိၢ်ပိၢ်ဖးထီၣ်လၢတိၤကပၤအံၤဒိၣ်ဒိၣ်မုၢ်မုၢ်အဃိ တိၤဒီးသိလ့ၣ်ဟံၣ်တနီၤမ့ၣ်အူအီၣ်ဟးဂီၤကွံာ်၀ဲန့ၣ်လီၤႉ

သုးဟံးန့ၢ်ထံကီၢ်တၢ်စိတၢ်ကမီၤ၀ံၤအလီၢ်ခံလၢမၠၣ်၀တံၣ်၀့ၢ်ပူၤမ့ၣ်ပိၢ်ပိၢ်ဖးထီၣ်လၢပယီၤသုးႇ(BGF)ဒီးသုးမီၤစိရိၤအ၀ဲၤကျိၤဘၣ်ထွဲတၢ်သူၣ်ထီၣ်အခိၣ်အဃၢၤအိၣ်၀ဲအဘျီ(၂၀)ဃၣ်ဃၣ်လံဘၣ်ဆၣ်ၦၤလၢမၤသကိးတၢ်ဒီးသုးမီၤစိရိၤတဖၣ်အံၤဘၣ်ဒိဘၣ်ထံးသံတအိၣ်ဒံး၀ဲဘၣ်အဂ့ၢ်န့ၣ် လီၢ်က၀ီၤထုးထီၣ်ပာ်ဖျါတၢ်ကစီၣ်တၢ်ဂ့ၢ်တၢ်ကျိၤအသိး သ့ၣ်ညါဘၣ်န့ၣ်လီၤႉ

ဖဲအပူၤကွံာ်လါအီးကထိဘၢၣ် ၁၁ သီအနံၤစ့ၢ်ကီး မ့ၣ်ပိၢ်ပိၢ်ဖးထီၣ်လၢမၠၣ်၀တံၣ်၀့ၢ်ပူၤ ကၠၤခ့က၀ီၤဒ့ မိကိၣ်ဖၠါကပၤ တၢ်အီၣ်ကျးစဲၢ်ပူၤအဃိ ကျးၦၤမၤတၢ်ဖိသံတဂၤကဲထီၣ်တ့ၢ်အသးစ့ၢ်ကီးန့ၣ်လီၤႉ
ဒ်န့ၣ်အသိးမၠၣ်၀တံၣ်၀့ၢ်ပူၤအံၤဖီၣ်စုက၀ဲၤကရူၢ်ကရၢအိၣ်ဆီလီၤသးဟူးဂဲၤ၀ဲတစှၤန့ၢ်(၅)ဒူၣ်ဘၣ်ညါဒီး မ့ၢ်စ့ၢ်ကီး၀့ၢ်တဖျၢၣ်လၢတၢ်ပာ်လီၤတၢ်ဘံၣ်တၢ်ဘၢဃံးဃီၣ်ဒီၣ်န့ၣ်လီၤႉ