လါအီးကထိဘၢၣ် ၁၉ သီႇ ၂၀၂၂ နံၣ်ႇ ခ့ၣ်အဲးစံၣ်
ဖဲတနံၤလါအီးကထိဘၢၣ် ၁၉ သီ ဂီၤခီအဆၢကတီၢ်န့ၣ် ပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA)သုးပာ်ဖှိၣ်အဘၢၣ်စၢၤတၢ်ဒုးကဲထီၣ်၀ဲဖဲမၠၣ်၀တံၣ်–ဂီၤလ့ၤကျဲ(ကၠီးခဲး)သ၀ီဆၢခိၣ် ညီၤခၠီ(ဖယါကိ)တၢ်လီၢ်ကပၤအဃိ ပယီၤသုးဒုးယၤခိၣ်သံ၀ဲ(၁)ဂၤအဂ့ၢ်န့ၣ် ပျီပူၤၦၤဟ့ၣ်တၢ်ကစီၣ်ဖိစံး၀ဲအသိး သ့ၣ်ညါဘၣ်န့ၣ်လီၤႉ
“အ၀ဲသ့ၣ်သုးကျိၤန့ၣ်မ့ၢ်၀ဲဒၣ်သုးတြိၤ(၄၄)အဟဲထီၣ်န့ၣ်ပၣ်ဃုာ်ဒုးယၤခိၣ်ႇဘၣ်ဒီး(စနဲၤဖၢၤ)ကျိအဟၢဖၢဖျိးထီၣ်ဒီးၦၤက့ၤစိာ်လီၤအီၤလၢဖလူတကပၤမီၤနီၤႉခဲအံၤပသ့ၣ်ညါလၢအသံလံႉၦၤသံအမံၤခီန့ၣ်ပတသ့ၣ်ညါလီၤတံၢ်လီၤဆဲးဒံးဘၣ်ႉပသမံသမိးမ့၀ံၤန့ၣ်ပကထုးထီၣ်ပာ်ဖျါတၢ်ကစီၣ်မီၤနီၤ”အဂ့ၢ်န့ၣ်(KNLA)ပျီပူၤၦၤဟ့ၣ်တၢ်ကစီၣ်ဖိစံး၀ဲန့ၣ်လီၤႉ
ဒ်ဂံၢ်ခီၣ်ထံးၦၤဟ့ၣ်တၢ်ကစီၣ်လၢအဘူးဒီးပယီၤသုးတဖၣ်စံး၀ဲအသိးန့ၣ်ဒုးယၤခိၣ်လၢအသံအံၤမ့ၢ်၀ဲသုးတြိၤ(၄၄)ဒုးယၤခိၣ် သုးခိၣ်ဒိၣ်စိ ၀့မ့ထိဒီး ဘၣ်ဆၣ်ခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ်ပာ်ဂၢၢ်ပာ်ကျၢၤအီၤ လီၤလီၤဆီဆီတန့ၢ်ဒံး၀ဲဘၣ်န့ၣ်လီၤႉ
ဒ်န့ၣ်အသိးတၢ်ဒုးကဲထီၣ်ဖဲတဂီၤညါအံၤအကတီၢ်န့ၣ်ပယီၤသုးကျိဖးဒိၣ်လူၢ်ခးလီစၢၤကျိဖးဒိၣ်ဆူညီၤခၠီ(ဖယါကိ)တၢ်ဒုးကဲထီၣ်အလီၢ်ဒီးမၠၣ်၀တံၣ်–ဂီၤလ့ၤကျဲ(ကၠီးခဲး)သ၀ီ လ့ဂီၤႇသ့ၣ်ဘီဘိသ၀ီပူၤအဂ့ၢ်န့ၣ် (KNLA)သုးပာ်ဖှိၣ်သုးကျိၤ စံး၀ဲန့ၣ်လီၤႉ
ကတီၢ်ခဲအံၤလၢမၠၣ်၀တံၣ်–ဂီၤလ့ၤကျဲစ့ၢ်ကီးပယီၤသုးဒီး(KNLA)သုးပာ်ဖှိၣ်အဘၢၣ်စၢၤ တၢ်ခးလိာ်သးကဲထီၣ်၀ဲအသိးႇလၢမၠၣ်၀တံၣ်–ကီးတရံးအ့ရှါကျဲသီ တီနီၢ်ထံလီၤဆှူကျဲစ့ၢ်ကီး တၢ်ခးလိာ်သးကဲထီၣ်၀ဲလၢပယီၤသုးႇသုးခိးကီၢ်ဆၢ(BGF)သုးပာ်ဖှိၣ်ဒီး(KNLA)အဘၢၣ်စၢၤန့ၣ်လီၤႉ
ခီဖျိတၢ်ဒုးကဲထီၣ်အဃိတၢ်ကးတံၢ်ကွံာ်၀ဲမၠၣ်၀တံၣ်–ကီးတရံးခံကပၤလၢာ်သိလ့ၣ်တၢ်ဟးထီၣ်က့ၤလီၤအဃိ သိလ့ၣ်ကတာ်ထီသးလၢကျဲမုၢ်ခိၣ်လၢအကယၤညါအသိးကမျၢၢ်လၢအလဲၤက့ၤတၢ်တဖၣ်စ့ၢ်ကီးဘၣ်အိၣ်ခိးတၢ်လၢကျဲပူၤဒ်န့ၣ်လီၤအဂ့ၢ်န့ၣ်သ့ၣ်ညါဘၣ်န့ၣ်လီၤႉ
