ပယီၤသုးခးနါစိၤကျိလၢဖၣ်အၣ်–စၤသပၠ့ၤကျဲဒီတဘိအဃိကမျၢၢ်ဘၣ်ဒိဘၣ်ထံးအိၣ်

လါအီးကထိဘၢၣ် ၁၂ သီႇ ၂၀၂၂ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် ဖၣ်အၣ်ကီၢ်ဆၣ်အပူၤ ဖဲတနံၤအံၤလါအီးကထိဘၢၣ် ၁၂ သီ ဂီၤခီ ၁၀း၃၀ အဆၢကတီၢ်န့ၣ် သိလ့ၣ်(၆)ခိၣ်လၢအတီၣ်ပယီၤသုးအိၣ်လၢ(စၤသပၠ့ၤ)သ၀ီကက့ၤထီၣ်ဆူဖၣ်အၣ်အံၤန့ၣ် ဖဲအ၀ဲသ့ၣ်ဟဲက့ၤလၢကျဲဒီးခးနါစိၤကျိဖးဒိၣ်ကျိဖိလၢကျဲဒီတဘိအဃိလီၢ်က၀ီၤကမျၢၢ်ဘၣ်ဒိဘၣ်ထံးအိၣ်၀ဲတနီၤဒီးဟံၣ်ဃီတၢ်သူၣ်ထီၣ်ဟးဂီၤအိၣ်၀ဲတနီၤစ့ၢ်ကီးအဂ့ၢ်န့ၣ်သ့ၣ်ညါဘၣ်လၢလီၢ်က၀ီၤဖိတဖၣ်အအိၣ်န့ၣ်လီၤႉ

လီၢ်က၀ီၤဖိတဂၤစံး၀ဲ“အ၀ဲသ့ၣ်ဟဲက့ၤထီၣ်ကျဲဒီတဘိန့ၣ်ဟးခးနါစိၤတၢ်လၢအံၤလၢန့ၣ်မီၤနီၤႉဘၣ်မနုၤအဃိခး၀ဲလဲၣ်န့ၣ်တသ့ၣ်ညါဘၣ်ႉပနၢ်ဟူသီသီခါန့ၣ်ပဆိမိၣ်လၢၦၤခးပိၢ်ထီၣ်မ့ၣ်အူလၢဘူၣ်(ကထ့ၣ်)အပူၤလီၤမီၤနီၤႉမ့၀ံၤမးဘူးထီၣ်ဘူးထီၣ်ဘျီဒုၦၤအိၣ်လၢ(ဘူၣ်ကထ့ၣ်)ပူၤတဖၣ်နါက့ပျံၤတၢ်စံၣ်ခဲလၢာ်ႉမ့၀ံၤဟံၣ်နါက့ဟးဂီၤႉပနၢ်ဟူလၢၦၤကညီနါက့ဘၣ်ဒိအိၣ်မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ

ခီဖျိပယီၤသုးခးနါစိၤကျိဖးဒိၣ်ကျိဖိတဖၣ်အဃိ(မူၤက၀ၤ)သ၀ီဖိ ၦၤမုၢ်ၦၢ်ဘၣ်ဒိ၀ဲ(၁)ဂၤဒီးသ၀ီလၢအဂၤဖိသၣ်ဘၣ်ဒိစ့ၢ်ကီး(၁)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ခီဖျိပယီၤသုးခးနါစိၤတၢ်အဃိလီၢ်က၀ီၤသ၀ီဖိလၢအိၣ်ကျဲကပၤတနီၤန့ၣ်ဘၣ်စံၣ်ထီၣ်စ့ၢ်ကီး၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

ဖၣ်အၣ်–စၤသပၠ့ၤကျဲအံၤမ့ၢ်စ့ၢ်ကီးကျဲတဘိလၢသုးမီၤစိရိၤလုၢ်ဘၢဒိၣ်စိ၀ဲအသိး ဟီၣ်က၀ီၤအံၤအပူၤကညီတၢ်မုာ်တၢ်ခုၣ်ကီၣ်ကး(KNU/KNLA-PC)ကရူၢ်ဟူးဂဲၤ၀ဲအိၣ်စ့ၢ်ကီးန့ၣ်လီၤႉ