ပယီၤသုးဒွဲၣ်အူအီၣ်ကီးတရံး၀့ၢ်ကပၤသ၀ီဖိအဟံၣ်အဃီ

လါဒံၣ်စ့ဘၢၣ် ၂၈ သီႇ ၂၀၂၂ နံၣ်ႇ ခ့ၣ်အဲးစံၣ်

ဖဲမဟါလါဒံၣ်စ့ဘၢၣ် ၂၇ သီ မုၢ်ထူၣ်အဆၢကတီၢ်န့ၣ် လၢကီးတရံး၀့ၢ် ကီးနွဲၣ်က၀ီအပူၤ ပယီၤသုးဒွဲၣ်အူအီၣ်သ၀ီဖိအဟံၣ်အဃီတစှၤန့ၢ်(၃)ဖျၢၣ်ညါဘၣ်အဂ့ၢ်န့ၣ်လီၢ်က၀ီၤကမျၢၢ်လၢအထံၣ်တၢ်ကဲထီၣ်သးဒီးအမဲာ်တဖၣ်အံၤစံး၀ဲန့ၣ်လီၤႉ

ဖဲမဟါလါဒံၣ်စ့ဘၢၣ် ၂၇ သီအနံၤန့ၣ် ပယီၤသုးလၢအဟဲထီၣ်ဆူကီးတရံး၀့ၢ်ကပၤ(ကီးနွဲၣ်)သ၀ီပူၤတဖၣ်အံၤဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤတၢ်ဒုးကဲထီၣ်၀ံၤအလီၢ်ခံပယီၤသုးဒွဲၣ်အူအီၣ်၀ဲလီၢ်က၀ီၤသ၀ီဖိတဖၣ်အဟံၣ်အဃီအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤစံး၀ဲ“လီလီစဲၤခဲအံၤပထံၣ်မ့ၣ်အူအီၣ်ၦၤဟံၣ်(၃)ဖျၢၣ်ႉပတဟးကွၢ်ဘၣ်သ၀ီဒီတဖျၢၣ်ဒံးဘၣ်ႉမ့ၢ်တၢ်လီၢ်လၢအဂၤအိၣ်စ့ၢ်ဧါတသ့ၣ်ညါဘၣ်ႉလၢသ၀ီပူၤဒုပတထံၣ်ပယီၤသုးလၢၤဘၣ်ႉအဒွဲၣ်အူအီၣ်ၦၤဟံၣ်၀ံၤဘျီအဟးထီၣ်လီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

တၢ်ဒုးကဲထီၣ်ဖဲမဟါအခါန့ၣ်ခီဖျိပယီၤသုးအံၤခးလီၤကျိဖးဒိၣ်ႇကဘီယူၤစ့ၢ်ကီးဟဲခးလီၤတၢ်တပယူာ်ဃီအဃိသ၀ီပူၤဟံၣ်ဃီတၢ်သူၣ်ထီၣ်ဒီးတၢ်ဖံးအီၣ်မၤအီၣ်လီၢ်ကျဲဟးဂီၤ၀ဲအါမးအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

ကီးနွဲၣ်သ၀ီဖိလၢတအဲၣ်ဒိးပာ်ဖျါအမံၤတဂၤစံး၀ဲ“တၢ်ဖံးတၢ်မၤႇတၢ်လၢပပၢဘၣ်တအိၣ်နီတမံၤဘၣ်ႉကျိဖးဒိၣ်လီၤတဲာ်လၢသ၀ီပူၤထီဘိလီၤႉဘၣ်၀ဲဒၣ်ၦၤဟံၣ်ဒီးဆၣ်ဖိကီၢ်ဖိဒီဒူၣ်ညါႉမ့ၢ်အဘၣ်မတဂၤအတၢ်လဲၣ်ဒုတသ့ၣ်ညါဘၣ်ႉပနၢ်ဟူလၢပယီၤသုးဒွဲၣ်အူအီၣ်ၦၤဟံၣ်လၢသ၀ီပူၤမီၤနီၤႉလၢတၢ်တအိၣ်ဘၣ်အပူၤအံၤဟံၣ်ဃီမ့ဟးဂီၤဒုမ့ၢ်ပကဘၣ်ဖံးအီၣ်မၤအီၣ်အိၣ်မူက့ၤဒ်လဲၣ်မးတသ့ၣ်ညါလၢၤဘၣ်”အဂ့ၢ်န့ၣ်စံး၀ဲန့ၣ်လီၤႉ

ဖဲမဟါလါဒံၣ်စ့ဘၢၣ် ၂၇ သီအနံၤ လၢကီးတရံး၀့ၢ်ကပၤ(မီမၣ်)သ၀ီသီဒီးကီးနွဲၣ်သ၀ီတကပၤန့ၣ် တၢ်ဒုးဆူၣ်ထီၣ်၀ဲလၢပယီၤသုးဒီး(KNLA)သုးပာ်ဖှိၣ်အဘၢၣ်စၢၤဒီးခီဖျိပယီၤသုးခးလီၤကျိဖးဒိၣ်တကးဒံးဘၣ်ကဘီယူၤစ့ၢ်ကီးဟဲခးလီၤတၢ်ဒီတနံၤကျၢၤညါအဃိကီးနွဲၣ်သ၀ီပူၤဟံၣ်ဃီတၢ်သူၣ်ထီၣ်ဟးဂီၤ၀ဲအါမးအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ