လါမ့ၤ ၂၉ သီ, ၂၀၂၆နံၣ်, ခ့ၣ်အဲးစံၣ်,
တၢ်ကအိးထီၣ်က့ၤဝဲကီၢ်ကၠီၣ်တဲၣ်-ကီၢ်ပယီၤကီၢ်ဆၢ,ရၤမတံမဲၢ်ဆီးဝ့ၢ်တၢ်ရ့လိၥ်မုၥ်လိၥ်တိၤနီၢ်ဂံၢ်(၂)ဒ်ညီနုၢ်အသိး,မဲၢ်ဆီးကၠီၣ်တဲၣ်ပှၤဘၣ်မူဘၣ်ဒါတဖၣ်အံၤအိၣ်ကတီၤပၥ်သးလၢပှဲၤလံအဃိတနံၤအံၤလါမ့ၤ(၂၉)သီအနံၤဂီၤခီအပူၤစးထီၣ်ပျၢ်လီၤဆိဝဲသိလ့ၣ်တနီၤလၢတၢ်ကမၤကွၢ်တၢ်အိၣ်သးအဂီၢ်အဂ့ၢ်,သ့ၣ်ညါဘၣ်န့ၣ်လီၤ.
တၢ်ကအိးထီၣ်ဝဲတိၤအံၤဒ်အပူၤကွံၥ်ညီနုၢ်အသိးအဂီၢ်,ကီၢ်ပယီၤတကပၤထုးထီၣ်ပၥ်ဖျါဝဲဒၣ်လံၥ်လဲၢ်တအိၣ်ဝဲနီတမံၤဘၣ်ဆၣ်,တနံၤအံၤဂီၤခီအပူၤကၠီၣ်တဲၣ်တကပၤပျၢ်လီၤဝဲသိလ့ၣ်(၂)ခိၣ်ဆူကလဲၤခီဃီၤလၢကီၢ်ပယီၤတကပၤအိၣ်ဝဲအဂ့ၢ်,ကၠီၣ်တဲၣ်ပှၤမၤတၢ်ကစီၣ်ဖိတဖၣ်ရၤလီၤဝဲဒၣ်တၢ်ဂီၤဒီးတၢ်ဂီၤမူတဖၣ်လၢစိၤရှၢၣ်မံးဒံးယၢၣ်အပူၤအိၣ်ဝဲဒၣ်န့ၣ်လီၤ.
ဒီးလၢကၠီၣ်တဲၣ်ပှၤမၤတၢ်ကစီၣ်ဖိတဖၣ်အတၢ်ရၤလီၤအပူၤန့ၣ်ကၠီၣ်တဲၣ်ခိၣ်နၢ်တဂၤစံးဝဲဒၣ်လၢ“တနံၤအံၤပကပၥ်ဖျါထီၣ်ဝဲတၢ်ကစီၣ်အမုၥ်န့ၣ်လီၤ.ပအိးထီၣ်ဝဲတိၤအံၤလံဘၣ်ဆၣ်တမ့ၢ်လၢလၢပှဲၤပှဲၤဒံးဘၣ်.လၢတၢ်မၤကွၢ်အဂီၢ်ပပျၢ်လီၤသိလ့ၣ်ဂီၤတဝီဟါတဝီန့ၣ်လီၤ.ပအိးထီၣ်လၢပှဲၤတန့ၢ်ဒံးဘၣ်န့ၣ်ခီဖျိလၢပခံခီခံကပၤတၢ်လိၣ်ဘၣ်အိၣ်ဒံးဝဲအဃိန့ၣ်လီၤ.ပအိးထီၣ်သီအခါဘၣ်သ့ၣ်သ့ၣ်တၢ်ဘၣ်ဘျီးဘၣ်ဒါဘၣ်ကအိၣ်ဘၣ်ဆၣ်လီၢ်ခံပကမၤကယီကယီတုၤအဘၣ်ဘျီးဘၣ်ဒါဒ်လၢညါအသိးန့ၣ်လီၤ”အဂ့ၢ်ကတိၤပၥ်ဖျါထီၣ်ဝဲဒၣ်န့ၣ်လီၤ.
လၢန့ၣ်မဲၥ်ညါ,တၢ်အိးထီၣ်ဝဲတိၤသီသီအပူၤတၢ်ပျၢ်လီၤဝဲသိလ့ၣ်သ့ၣ်တဖၣ်အံၤမ့ၢ်ကဟဲက့ၤစိၥ်ဝဲတၢ်မနုၤကန့ၢ်လဲၣ်အဂ့ၢ်န့ၣ်,ကအိၣ်ခိးကွၢ်ဘၣ်သကိးအဂ့ၢ်ကၠီၣ်တဲၣ်ပှၤဘၣ်မူဘၣ်ဒါတဂၤလီၢ်လီၢ်အံၤစံးစ့ၢ်ကီးဝဲဒၣ်န့ၣ်လီၤ.
တၢ်အိးထီၣ်က့ၤဝဲတၢ်ရ့လိၥ်မုၥ်လိၥ်တိၤနီၢ်ဂံၢ်(၂)အံၤ,ကၠီၣ်တဲၣ်တကပၤအသိလ့ၣ်ကလဲၤဃီၤဝဲဆူကီၢ်ပယီၤတကပၤအဂီၢ်တနံၤအံၤဖဲဂီၤခီအဆၢကတီၢ်လၢကီၢ်ပယီၤတကပၤအိးထီၣ်န့ၣ်ဝဲကျဲဘၣ်ဆၣ်,တၢ်ဒုးသ့ၣ်ညါဝဲကမျၢၢ်ထံဖိကီၢ်ဖိတဖၣ်တအိၣ်ဝဲဒံးဘၣ်အဂ့ၢ်,ရၤမတံဝ့ၢ်လီၢ်ကဝီၤကမျၢၢ်တဂၤစံးဝဲဒၣ်န့ၣ်လီၤ.
ဒီးကီၢ်ပယီၤတကပၤအတၢ်အိၣ်သးအဖီခိၣ်ရၤမတံလီၢ်ကဝီၤဖိတဂၤစံးဝဲဒၣ်လၢ“တဂီၤအံၤလၢကီၢ်ပယီၤတကပၤနါက့အိးထီၣ်ဝဲလီၤ.ဘၣ်ဆၣ်အိၣ်ထီၣ်ခူသူၣ်ဝဲဒၣ်လီၤ.ကၠီၣ်တဲၣ်တကပၤအသိလ့ၣ်ကဟဲ(၃)ခိၣ်လီၤ.ပနၢ်ဟူလၢကဟဲလီၤတီဝဲဘုခ့န့ၣ်လီၤ.မ့မ့ၢ်လၢကၠီၣ်တဲၣ်တၢ်ဖိတၢ်လံၤတဖၣ်တခီတၢ်ဟဲလီၤတီဝဲတအိၣ်ဒံးဘၣ်”အဂ့ၢ်စံးဝဲဒၣ်န့ၣ်လီၤ.
ရၤမတံ-မဲၢ်ဆီးတၢ်ရ့လိၥ်မုၥ်လိၥ်တိၤနီၢ်ဂံၢ်(၂)အံၤလၢတၢ်ကသမံသမိးက့ၤဝဲကီၢ်ဆၢဂ့ၢ်ဝီဒီးထၢတၢ်ခိတၢ်သွဲသနူလၢအသီအဂီၢ်အပူၤကွံၥ်(၂၀၂၅)နံၣ်လါအီးကူးအပူၤသုးကရူၢ်တကပၤပံးကွံၥ်ဝဲဒီးတၢ်ပံးကွံၥ်ဝဲကတီၢ်တၢ်ခးလိၥ်သးလၢပယီၤသုးကရူၢ်ဒီးကညီဒီကလုၥ်တၢ်ထူးဖျဲးသုးမုၢ်ဒိၣ်(KNLA)အဘၢၣ်စၢၤကဲထီၣ်တ့ၢ်ဝဲဒၣ်စ့ၢ်ကီးန့ၣ်လီၤ.
ဒီးတၢ်ပံးဃၥ်ဝဲဒၣ်အယံၥ်ဘူးထီၣ်လၢတနံၣ်ဃၣ်ဃၣ်အလီၢ်ခံ,လၢတၢ်ကအိးထီၣ်ဘၣ်က့ၤဝဲအဂီၢ်ပယီၤသုးကရူၢ်ဒီးကၠီၣ်တဲၣ်ပှၤဘၣ်မူဘၣ်ဒါသ့ၣ်တဖၣ်အံၤဂုၥ်ကျဲးစၢးထံၣ်လိၥ်ကတိၤတ့ၢ်ဝဲဒၣ်လၢအပူၤကွံၥ်လါအ့ဖြ့ၣ်ပူၤအခါလံၤလံၤအိၣ်ဝဲအဂ့ၢ်,တၢ်ကစီၣ်ဟူထီၣ်သါလီၤအိၣ်ဝဲဒၣ်န့ၣ်လီၤ.
ဒ်န့ၣ်အသိးရၤမတံ-မဲၢ်ဆီးတၢ်ရ့လိၥ်မုၥ်လိၥ်တိၤအံၤလၢကီၢ်ကၠီၣ်တဲၣ်ဒီးကီၢ်ပယီၤကီၢ်ဆၢတၢ်စိၥ်ဆှၢပနံၥ်တၢ်ကၤအဂီၢ်မ့ၢ်ဝဲကျဲတဘိလၢအရ့ဒိၣ်အသိးမ့ၢ်စ့ၢ်ကီးဝဲတၢ်လီၢ်လၢအလီၢ်ဘၣ်တတီၤအဂ့ၢ်,သ့ၣ်ညါဘၣ်န့ၣ်လီၤ.
