လါဒံၣ်စ့ဘၢၣ် ၂၉ သီႇ ၂၀၂၂ နံၣ်ႇ ခ့ၣ်အဲးစံၣ်
ဖီၣ်စုက၀ဲၤတၢ်ပၢၢ်ဆၢကရူၢ်ကရၢလၢအထီဒါပၢၢ်ဆၢသုးမီၤစိရိၤတဖၣ်အံၤအဂီၢ် ဟ့ၣ်ဆီၣ်ထွဲမၤၦဲၤစၢၤကျိဂံၢ်ဘါန့ၢ်အါဒိၣ်ထီၣ်လံအဂ့ၢ်န့ၣ် ဒီကလု၁်ဃူဖိး(NUG)ပဒိၣ်အၦၤကတိၤတၢ်ပၢ အူန့ၤဘိလၣ် စံး၀ဲန့ၣ်လီၤႉ
ဖဲအပူၤကွံာ်လါဒံၣ်စ့ဘၢၣ် ၂၅ သီ တၢ်မၤ၀ဲသုးတၢ်သိၣ်လိစံၣ်လီၤမူးတၢ်ရဲၣ်တၢ်ကျဲၤတခါအပူၤန့ၣ် ဒီကလုာ်ဃူဖိး(NUG)ပဒိၣ် ကီၢ်စၢဖှိၣ်ကိတိာ်ခိၣ်ကျၢၢ် မါ၀့ခဲၤသါ ဟ့ၣ်လီၤဆီၣ်ထွဲမၤစၢၤ၀ဲကျိအခိၣ်(၅၀)ဆူ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ် ၂၇ Cobra သုးကျိၤအအိၣ်န့ၣ်လီၤႉ
အူန့ၤဘိလၣ်စံး၀ဲလၢ“ကျိတဖၣ်န့ၣ်တၢ်ၦ့ၤ၀ဲအိၣ်အသိးတၢ်ဒုးအိၣ်ထီၣ်တ့အီၤလၢနီၢ်ကစၢ်စ့ၢ်ကီးအိၣ်၀ဲဒီး လၢတၢ်အိၣ်သးတခါအဖီခိၣ်ပဆီၣ်ထွဲမၤၦဲၤစၢၤန့ၢ်အါထီၣ်လံလီၤႉတကးဒံးဘၣ်လၢ(PDF)ဒီးကလုာ်ဒူၣ်ဖီၣ်စုက၀ဲၤတဖၣ်အဂီၢ် သုးလၢအလဲၤလၢ Chain Of Command အဖီလာ်သ့ၣ်တဖၣ်န့ၣ် ပဆီၣ်ထွဲမၤစၢၤတၢ်အီၣ်တၢ်အီနါက့အိၣ် လီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ပဖီၣ်စုက၀ဲၤဂဲၤဆၢထၢၣ်ထီဒါပၢၢ်ဆၢတၢ်အံၤတသ့တဘၣ်အဃိပဘၣ်ဟံးထီၣ်ဖီၣ်မၤအီၤဒီး တဘၣ်မ့ၢ်ထဲလၢၦၤနီၣ်ဂံၢ်လၢၦဲၤလံဘၣ်အလီၢ်အိၣ်လၢပကဘၣ်သိၣ်လိနဲၣ်လိအီၤလၢလၢၦဲၤၦဲၤအသိး လၢတၢ်ထီထီၣ်ကျိချံၦာ်သၣ်အဂီၢ်အံၤစ့ၢ်ကီးအရ့ဒိၣ်၀ဲအဃိပမၤစၢၤ၀ဲဒ်အံၤလီၤအဂ့ၢ်န့ၣ် အူန့ၤဘိလဲၣ် စံးအါထီၣ်၀ဲန့ၣ်လီၤႉ
တကးဒံးဘၣ်လၢန့ၣ်အမဲာ်ညါ(NUG)ကဂုာ်ကျဲးစၢးမၤစၢၤကျိတုၤအလၢအၦဲၤလၢတၢ်ဒီသဒၢကမျၢၢ်သုးအနီၣ်ဂံၢ်တစုဒီး(drone)သုးကရူၢ်တဖၣ်ဒုးအိၣ်ထီၣ်၀ဲတၢ်သ့တၢ်ဘၣ်အသီအိၣ်အဃိတကီၢ်ခါခဲအံၤနုာ်လီၤဒုးပၢၢ်ဆၢတၢ်လံဒီးႇ မ့တအိၣ်(၁၀၀)မျးကယၤလၢလၢၦဲၤၦဲၤဒံး၀ဲဘၣ်ဆၣ်ၦၤနီၣ်ဂံၢ်လၢအနုာ်လီၤဒုးတၢ်ႇအိၣ်ကတဲၤကတီၤမၤလိသးဒီးတၢ်ထီထီၣ်ကျိချံၦာ်သၣ်တဖၣ်အံၤစးထီၣ်(၂၀၂၃)ထီၣ်သီန့ၣ်ပကဟ့ၣ်မၤစၢၤဒီဒူၣ်ညါအဂ့ၢ်န့ၣ်(NUG)ၦၤကတိၤတၢ်ပၢစံး၀ဲန့ၣ်လီၤႉ
အပူၤကွံာ်လၢညါခါ(NUG)ဆီၣ်ထွဲမၤစၢၤကျိချံၦာ်သၣ်တအိၣ်၀ဲဘၣ်ဆၣ်ဟ့ၣ်လီၤဆီၣ်ထွဲမၤစၢၤကျိလၢတၢ်ရဲၣ်တၢ်ကျဲၤပူၤဒ်အံၤမ့ၢ်၀ဲအဆိကတၢၢ်တဘျီဒီးအပူၤကွံာ်တၢ်လီၢ်လၢတၢ်ဒုးကဲထီၣ်အလီၢ်တဖၣ်စ့ၢ်ကီးအ၀ဲသ့ၣ်ဆီၣ်ထွဲဟ့ၣ်မၤစၢၤ၀ဲကျိတၢခိၣ်ခံခိၣ်အိၣ်တုၤလၢအခိၣ်(၁၀)ညါအဂ့ၢ်န့ၣ် ခ့ၣ်အဲၣ်ယူၣ်(သုးက့ ၆) Cobra သုးကျိၤခိၣ်ခံ စီၤကီၢ် စံး၀ဲဒ်အံၤ န့ၣ်လီၤႉ
“တၢ်ဒုးကဲထီၣ်လၢလ့က့ၣ်ကိာ်အခါန့ၣ်အ၀ဲသ့ၣ်မၤစၢၤၦၤကျိဒ်န့ၣ်အိၣ်မီၤနီၤႉ (NUG)အ၀ဲၤဒၢးတဖၣ်ဒ်အ၀ဲသ့ၣ်ဘုး၀ဲဖီၣ်၀ဲတုၤန့ၣ်ဟ့ၣ်၀ဲမီၤနီၤႉအပူၤကွံာ်လၢညါန့ၣ်အ၀ဲသ့ၣ်မၤစၢၤၦၤကျိႇတၢ်အီၣ်တၢ်အီၣ်အိၣ်လီၤႉ
(PDF)ခီဒုအိၣ်အါမီၤနီၤႉမ့မ့ၢ်ပ(ခ့ၣ်အဲၣ်ယူၣ်)ခီန့ၣ်က့ၤဆီၣ်ထွဲမၤစၢၤက့ၤပသုးရ့ၣ်ႇသုးက့ႇသုးဒ့ဒ်န့ၣ်မီၤနီၤႉပကပာ်ဖှိၣ်မၤသကိးတၢ်ဒီးအ၀ဲသ့ၣ်ဒီးပကတီခိၣ်ရိၣ်မဲလၢအတၢ်ဆီၣ်ထွဲမၤစၢၤအ၀ဲသ့ၣ်ၦၤတကပၤမီၤနီၤ” အဂ့ၢ်န့ၣ် စံး၀ဲန့ၣ်လီၤႉ
ဒ်(NUG)ပဒိၣ်အတၢ်ကွဲးလီၤပာ်လီၤလၢတနံၣ်အတီၢ်ပူၤတၢ်တိာ်ကျဲၤအသိး စးထီၣ်(၂၀၂၃)လါယနူၤ အါရံၤန့ၣ် ကဟူးဂဲၤဆူၣ်ထီၣ်ဒုးယၤတၢ်ဟူးတၢ်ဂဲၤတၢ်ဖံးတၢ်မၤတဖၣ်အဂ့ၢ်န့ၣ် အူန့ၤဘိလၣ် စံး၀ဲန့ၣ်လီၤႉ
