လါအ့ဖြ့ၣ် ၃၀ သီႇ ၂၀၂၃ နံၣ်ႇ ခ့ၣ်အဲးစံၣ်
လၢတလၢၤကီၢ်စဲၣ် ဒူသထူၣ်ကီၢ်ရ့ၣ် ကၠဲၣ်ထိၤကီၢ်ဆၣ်အပူၤ ဖဲလါအ့ဖြ့ၣ် ၂၇ သီဒီး ၂၉ သီအနံၤန့ၣ် ကညီဒီကလုာ် တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်လဲၤတ့ၢ်လီၤမ့ၣ်ပိၢ်လၢ(ကင်မွန်း)ဟီၣ်က၀ီၤပၢၤကီၢ်၀ဲၤလီၢ်အံၤလၢဒြိအဂ့ၢ်န့ၣ် သ့ၣ်ညါဘၣ်လၢတၢ်ဒီသဒၢကမျၢၢ်သုးအအိၣ်န့ၣ်လီၤႉ
ဖဲအပူၤကွံာ်လါအ့ဖြ့ၣ် ၂၇ သီအနံၤ တၢ်လဲၤတ့ၢ်လီၤ၀ဲမ့ၣ်ပိၢ်အဖျၢၣ်(၁၀)ဃၣ်ဃၣ်အံၤဆူပၢၤကီၢ်၀ဲၤလီၢ်ကရၢၢ်ပူၤအဃိ ပၢၤကီၢ်ဘၣ်ဒိ၀ဲ(၃)ဂၤဒီးမ့ၣ်အူအီၣ်၀ဲဟးဂီၤ၀ဲပၢၤကီၢ်၀ဲၤလီၢ်တၢ်သူၣ်ထီၣ်တနီၤအဂ့ၢ်န့ၣ် သထူၣ်ကီၢ်ဆၣ် တၢ်ဒီသဒၢကမျၢၢ်သုး(TPDF)တၢ်ဘိးဘၣ်ရၤလီၤမူဒါခိၣ် စံး၀ဲန့ၣ်လီၤႉ
အ၀ဲစံး၀ဲလၢ“အခိၣ်တီတဘျီန့ၣ်ပသ့ၣ်ညါဘၣ်လၢပၢၤကီၢ်ဘၣ်ဒိ(၃)ဂၤႉလၢပၢၤကီၢ်၀ဲၤလီၢ်န့ၣ်ပနၢ်ဟူလၢၦၤခိၣ်ၦၤနၢ်ဟဲတုၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤ
ႉ
တၢ်လဲၤတ့ၢ်လီၤပၢၤကီၢ်၀ဲၤလီၢ်အံၤလၢဒြိမ့ၣ်ပိၢ်၀ံၤလီၢ်ခံအ၀ဲသ့ၣ်မၤအါထီၣ်တၢ်ဘံၣ်တၢ်ဘၢလၢပၢၤကီၢ်၀ဲၤလီၢ်ကရၢၢ်ပူၤဒီး ခီဖျိအ၀ဲသ့ၣ်မၤအါထီၣ်ကဒီးသုးဂံၢ်ဘါအဃိဖဲမဟါမုၢ်ထူၣ်န့ၣ်လဲၤတ့ၢ်လီၤကဒီးမ့ၣ်ပိၢ်အဖျၢၣ်(၁၀)လၢဒြိအဂ့ၢ်န့ၣ် (TPDF)ထုးထီၣ်ပာ်ဖျါထီၣ်၀ဲဖဲလါအ့ဖြ့ၣ် ၂၉ သီအနံၤန့ၣ်လီၤႉ
တၢ်ဟဲတ့ၢ်လီၤမ့ၣ်ပိၢ်လၢပၢၤကီၢ်၀ဲၤလီၢ်အံၤအဖီခိၣ်ဘၣ်ယိၣ်လၢပယီၤသုးကခးလီၤကျိဖးဒိၣ်အဃိ လီၢ်က၀ီၤကမျၢၢ်လၢအိၣ်(က့ၤမိ)ပၢၤကီၢ်၀ဲၤလီၢ်အခိၣ်အဃၢၤတဖၣ်အံၤဟးပလဲးသးလၢတၢ်လီၢ်အဂၤအိၣ်၀ဲအဂ့ၢ်န့ၣ် ကမျၢၢ်လၢအိၣ်ကၠဲၣ်ထိၤ၀့ၢ်ပူၤတဂၤ စံး၀ဲဒ်အံၤန့ၣ်လီၤႉ
“လၢညါနါက့ၦၤဟဲခး(က့ၤမိ)ပၢၤကီၢ်၀ဲၤလီၢ်အံၤစ့ၢ်မီၤနီၤႉတၢ်တဘျီန့ၣ်ခီဖျိ(မောင်းတောင်)ပယီၤသုးကလၢၤအံၤ ခးလီၤကျိဖးဒိၣ်အဃိပဘၣ်စံၣ်ဒံးႉခဲအံၤနါက့ၦၤဘၣ်ယိၣ်လၢကကဲထီၣ်သးဒ်န့ၣ်အဃိၦၤဟးစံၣ်ပလဲာ်သးတနီၤလံ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
တၢ်လဲၤထီၣ်ခးပၢၤကီၢ်၀ဲၤလီၢ်အံၤန့ၣ်မ့ၢ်၀ဲကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA (သုးက့ ၁)ဒီး ကၠဲၣ်ထိၤတၢ်ဒီသဒၢကမျၢၢ်သုးႇဘံလ့တၢ်ဒီသဒၢကမျၢၢ်သုးႇကၠဲၣ်ထိၤတၢ်ပၢၢ်ဆၢကရူၢ်(KRF)ႇ ပအိၣ်တၢ်ဒီသဒၢကမျၢၢ်သုး(PPDF-KD)တဖၣ်ဒီးတၢ်ပၢၢ်ဆၢသုးပာ်ဖှိၣ်တကပၤတၢ်ဘၣ်ဒိဘၣ်ထံးတအိၣ်၀ဲဘၣ်အဂ့ၢ်န့ၣ် တၢ်ပၢၢ်ဆၢသုးပာ်ဖှိၣ်ထုးထီၣ်ပာ်ဖျါ၀ဲန့ၣ်လီၤႉ
ဒ်န့ၣ်အသိးဖဲအပူၤကွံာ်လါအ့ဖြ့ၣ်(၂၅)သီအနံၤစ့ၢ်ကီး ခီဖျိတၢ်ပၢၢ်ဆၢသုးပာ်ဖှိၣ်လဲၤထီၣ်ခး၀ဲပယီၤသုး(မုပ္ပလင်) တၢ်သမံသမိးတြဲၤလီၢ်အံၤအဃိ ပယီၤသုးသံ၀ဲ(၃)ဂၤအသိး ဖဲလါအ့ဖြ့ၣ် ၂၆ သီအနံၤ ခီဖျိပယီၤသုးရ့ၣ်လၢအိၣ်(သိမ်ဇရပ်)တဖၣ်အံၤခးလီၤကျိဖးဒိၣ်ဆူ(သုံးခွ)သ၀ီကပၤအဃိ သီခါဘၣ်ဒိ၀ဲ(၁)ပါအဂ့ၢ်န့ၣ် ဟီၣ်က၀ီၤဂံၢ်ခီၣ်ထံးတၢ်ကစီၣ်တဖၣ်ပာ်ဖျါ၀ဲန့ၣ်လီၤႉ
