Home တၢ်ကစီၣ် တၢ်ဒုးဆူၣ်ထီၣ်လၢ(ကြုၢ်တု)၀့ၢ်ခိၣ်၀့ၢ်ဃၢၤဒူသ၀ီတဖၣ်အပူၤဒီးသုးမီၤစိရိၤကဘီယူၤဟဲခးလီၤစၢၤတၢ်

တၢ်ဒုးဆူၣ်ထီၣ်လၢ(ကြုၢ်တု)၀့ၢ်ခိၣ်၀့ၢ်ဃၢၤဒူသ၀ီတဖၣ်အပူၤဒီးသုးမီၤစိရိၤကဘီယူၤဟဲခးလီၤစၢၤတၢ်

345
0
Photo: Crd.

လါယနူၤအါရံၤ ၂၆ သီႇ ၂၀၂၃ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် ကီးတရံးကီၢ်ဆၣ် ကြုၢ်တု၀့ၢ်ခိၣ်၀့ၢ်ဃၢၤဒူသ၀ီတဖၣ်အပူၤန့ၣ် တုၤလၢလါယနူၤအါရံၤ ၂၅ သီအနံၤ တၢ်ဒုးဆူၣ်ထီၣ်၀ဲကွ့ၢ်ကွ့ၢ်လၢပယီၤသုးဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤအံၤဒီး ခီဖျိပယီၤသုးတကပၤသံဘၣ်ဒိဘၣ်ထံးအါအဃိကဘီယူၤဟဲတ့ၢ်လီၤစၢၤ၀ဲမ့ၣ်ပိၢ်အဂ့ၢ်န့ၣ် ကမျၢၢ်လၢအိၣ်ကြုၢ်တု၀့ၢ်ပူၤတဂၤစံး၀ဲန့ၣ်လီၤႉ

ဖဲအပူၤကွံာ်လါယနူၤအါရံၤ ၁၆ သီအနံၤန့ၣ် တၢ်နုာ်လီၤခး(ကီၣ်ဘ့)ပၢၤကီၢ်တၢ်လီၢ်ကဲထီၣ်၀ံၤအလီၢ်ခံ ဒုးယၤတၢ်ဖ့ၣ်စၢကဲထီၣ်၀ဲဒိၣ်ဒိၣ်မုၢ်မုၢ်ဒီးတုၤလၢလါယနူၤအါရံၤ ၂၅ သီန့ၣ် သုးမီၤစိရိၤကဘီယူၤ ဟဲတ့ၢ်လီၤစၢၤ၀ဲမ့ၣ်ပိၢ်အဂ့ၢ်န့ၣ် ကြုၢ်တုလီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ

ကမျၢၢ်လၢအိၣ်ကြုၢ်တု၀့ၢ်ပူၤတဂၤစံး၀ဲလၢ“ဖဲမုၢ်ဃ့ၢ်လီၤအံၤနါက့တၢ်ဒုးကဲထီၣ်၀ဲဒိၣ်ဒိၣ်မုၢ်မုၢ်လီၤႉ လၢကါနံၤႇကီၣ်ကၤတကပၤန့ၣ်ကဘီယူၤဟဲခးလီၤတၢ်လီၤပျံၤဒိၣ်မးလီၤႉတၢ်ဒုးကဲထီၣ်အံၤန့ၢ်၀ဲ(၃)သီလံႉ ပယီၤသုးမၤ၀ဲတနၢၤလၢၤဘၣ်အဃိပာ်ဂံၢ်ပာ်ဘါက့ၤ၀ဲကဘီယူၤန့ၣ်လီၤမီၤနီၤႉကျိဖးဒိၣ်နါက့ခးလီၤ၀ဲတပယူာ်ဃီလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲမဟါလါယနူၤအါရံၤ ၂၅ သီအနံၤန့ၣ်လီၤႉ

ခီဖျိတၢ်ဒုးဆူၣ်ထီၣ်အဃိပယီၤသုးခးလီၤကျိဖးဒိၣ်တပယူာ်ဃီဒီးကဘီယူၤစ့ၢ်ကီးဟဲခးလီၤတၢ်အဃိ မ့ၣ်အူအီၣ်၀ဲလီၢ်က၀ီၤကမျၢၢ်အဟံၣ်အဃီအိၣ်၀ဲအဂ့ၢ်န့ၣ် လီၢ်က၀ီၤသ၀ီဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ

Photo: Crd.

“လၢ(ကြုၢ်တု)တကပၤန့ၣ်နါက့ခးလီၤစိတၢ်စ့ၢ်ႉလီၤတဲာ်လၢသ၀ီပူၤအါအဃိပအိၣ်လၢသ၀ီပူၤတဘူၣ်လၢၤဘၣ်ႉ လၢ(ကါနံၤ)ဆၢခိၣ်တကပၤန့ၣ်မ့ၣ်အူအီၣ်ၦၤဟံၣ်ဒီတဂ့ၢ်ညါႉအအူအီၣ်တုၤလၢၦဲၤဖျၢၣ်လံလဲၣ်ဒုပတသ့ၣ်ညါဘၣ်” အဂ့ၢ်န့ၣ် ကါနံၤ လီၢ်က၀ီၤကမျၢၢ်တဂၤစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

တၢ်ဒုးကဲထီၣ်လၢ(ကြုၢ်တု)အခါန့ၣ်ပယီၤသံကအိၣ်လၢအဂၤ(၄၀)ဆူဖီခိၣ်ညါဒီးခီဖျိပယီၤသုးခးလီၤကျိဖးဒိၣ်အဃိမ့ၣ်အူအီၣ်လီၢ်က၀ီၤကမျၢၢ်အဟံၣ်အဃီတကးဒံးဘၣ်ကဘီယူၤစ့ၢ်ကီးဟဲခးလီၤစၢၤတၢ်အဂ့ၢ်န့ၣ် (Lion Battalion Commando)ဒုးယၤသုးကျိၤ ထုးထီၣ်ပာ်ဖျါ၀ဲန့ၣ်လီၤႉ

ခီဖျိတၢ်ဒုးဆဲးကဲထီၣ်ဒံး၀ဲတပယူာ်ဃီတုၤလၢလါယနူၤအါရံၤ ၂၅ သီ မုၢ်နၤခီတစုညါအဃိ ကြုၢ်တု၀့ၢ်ခိၣ်၀့ၢ်ဃၢၤဒူသ၀ီတဖၣ်လၢအမ့ၢ်ကါနံၤႇကီၣ်ကၠဲၣ်ႇကီၣ်လါႇကီၣ်ကၤသ၀ီဖိတဖၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ