သုးမီၤစိရိၤကဘီယူၤဟဲတ့ၢ်လီၤကဒီးမ့ၣ်ပိၢ်လၢ မဲၢ်ကသၤ တၢ်ခူၣ်စၢၢ်ထးလီၢ်

လါယနူၤအါရံၤ ၂၆ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်အပူၤ ဖဲလါယနူၤအါရံၤ ၂၅ သီ ဂီၤခီ ၂ နၣ်ရံၣ်ဘျဲၣ် အဆၢကတီၢ်န့ၣ် သုးမိၤစိရိၤကဘီယူၤဟဲတ့ၢ်လီၤကဒီးမ့ၣ်ပိၢ်လၢဃိၣ်သၢဖျၢၣ်၀့ၢ်ကလံၤစိး မဲၢ်ကသၤသ၀ီ တၢ်ခူၣ်စၢၢ်ထးလီၢ်အဃိ တၢ်သူၣ်ထီၣ်လီၢ်တဖၣ်ဟးဂီၤ၀ဲအဂ့ၢ်န့ၣ် သ့ၣ်ညါဘၣ်လၢၦၤခူၣ်စၢၢ်ထးဖိတဖၣ်အအိၣ် န့ၣ်လီၤႉ

ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢ(မဲၢ်ကသၤ)သ၀ီမုၢ်ထီၣ်ကလံၤစိး နီၣ်ဂံၢ်(၅)တၢ်ခူၣ်စၢၢ်ထးလီၢ်အံၤအဃိ ၦၤကညီဘၣ်ဒိဘၣ်ထံးတအိၣ်၀ဲဘၣ်ဆၣ် မ့မ့ၢ်စဲးဖီကဟၣ်လၢတၢ်သူအီၤလၢတၢ်ဖံးတၢ်မၤပူၤအံၤဒီး တၢ်သူၣ်ထီၣ်တဖၣ်ဟးဂီၤ၀ဲအိၣ်အဂ့ၢ်န့ၣ် ၦၤခူၣ်စၢၢ်ထးဖိတဖၣ်စံး၀ဲန့ၣ်လီၤႉ

“ဖဲမနၤ ၂ နၣ်ရံၣ်ဃၣ်ဃၣ်အခါန့ၣ်သုးမီၤစိရိၤကဘီယူၤကၠဲးတဘ့ၣ်ဟဲတ့ၢ်လီၤမ့ၣ်ပိၢ်မီၤနီၤႉ ဘၣ်၀ဲဒၣ်တၢ်သူၣ်ထီၣ်တဖၣ်ႉမ့မ့ၢ်ၦၤကညီဒုတဘၣ်ဘၣ်ႉခီဖျိကဘီယူၤဟဲတ့ၢ်လီၤတၢ်တလီၢ်လီၢ်အဃိန့ၣ် မတဂၤမးတအိၣ်လၢတၢ်ဖံးတၢ်မၤလီၢ်လၢၤဘၣ်” အဂ့ၢ်န့ၣ် လီၢ်က၀ီၤကမျၢၢ်လၢအိၣ်ဘူးဖဲန့ၣ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါယနူၤအါရံၤ ၂၅ သီအနံၤန့ၣ်လီၤႉ

တၢ်ခူၣ်စၢၢ်ထးလီၢ်လၢအအိၣ်(မဲၢ်ကသၤ)သ၀ီကပၤအံၤဒ်ခ့ၣ်အဲၣ်ယူၣ်–ဒူပျာ်ယာ်ကီၢ်ရ့ၣ် စၢၢ်ထး၀ဲၤကျိၤ တၢ်သိၣ်တၢ်သီတၢ်ဘျၢအသိးန့ၣ်တၢ်ဟ့ၣ်အခွဲးလၢကမျၢၢ်ထံဖိကီၢ်ဖိကဖံးကမၤ၀ဲဘၣ်ဆၣ် မ့မ့ၢ်သုးမီၤစိရိၤအၦၤကတိၤတၢ်ပၢ သုးခိၣ်ကျၢၢ်ဖိ စီၣ်မ့ထိ တခီစံး၀ဲလၢ စၢၢ်ထးလီၢ်သ့ၣ်တဖၣ်အံၤ တၢ်တဟ့ၣ်အခွဲးလၢကမၤ၀ဲဘၣ်အဂ့ၢ်န့ၣ် စံးလီၤ၀ဲဖဲအပူၤကွံာ်(၂၀၂၂)တၢ်မၤဆှဲလဲတၢ်ကစီၣ်မူးအခါန့ၣ်လီၤႉ

ဖဲအပူၤကွံာ်(၂၀၂၂)လါနိၣ်၀့ဘၢၣ်ဒီးလါဒံၣ်စ့ဘၢၣ်အခါန့ၣ် လၢနီၣ်ဂံၢ်(၁)‚နီၣ်ဂံၢ်(၂)တၢ်ခူၣ်စၢၢ်ထးလီၢ်အံၤစ့ၢ်ကီး သုးမီၤစိရိၤကဘီယူၤဟဲတ့ၢ်လီၤ၀ဲမ့ၣ်ပိၢ်အဃိၦၤမၤတၢ်ဖိဘၣ်ဒိ၀ဲ(၅)ဒံးန့ၣ်လီၤႉ သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢနီၣ်ဂံၢ်(၅)တၢ်ခူၣ်စၢၢ်ထးလီၢ်ဒီးခဲအံၤတဘျီအိၣ်၀ဲ(၂)ဘျီလံန့ၣ်လီၤႉ

ဖဲအပူၤကွံာ်လါယနူၤအါရံၤ ၂၂ သီအနံၤစ့ၢ်ကီး သုးမီၤစိရိၤကဘီယူၤဟဲတ့ၢ်လီၤဒံးမ့ၣ်ပိၢ်လၢ(လ့၀ါဖျိ)သ၀ီ တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)သုး၀ဲၤလီၢ်တၢ်လီၢ်တတီၤဒံးန့ၣ်လီၤႉ

တၢ်ခူၣ်စၢၢ်ထးလီၢ်လၢအိၣ်ဖဲသပၠူၤႇမဲၢ်ကသၤသ၀ီအံၤတဖၣ်န့ၣ်လီၢ်က၀ီၤကမျၢၢ်ၦၤထူလံၤဖိဖံးအီၣ်မၤအီၣ်၀ဲလၢတၢ်လုၢ်အီၣ်နီၢ်ခိသးသမူအဂီၢ်ဒီးစၢၢ်ထးလီၢ်သ့ၣ်တဖၣ်အံၤတၢ်စးထီၣ်မၤအီၤလၢကီၤလၤ၀ါပဒိၣ်အစိၤအခါလံဒီးတၢ်မၤအီၤကအိၣ်အနံၣ်(ခံကယၤ)ဘျဲၣ်လံအဂ့ၢ်န့ၣ် သ့ၣ်ညါဘၣ်လၢကမျၢၢ်ၦၤထူလံၤဖိတဖၣ်အအိၣ်န့ၣ်လီၤႉ