လါယနူၤအါရံၤ ၂၆ သီႇ ၂၀၂၃ နံၣ်ႇ ခ့ၣ်အဲးစံၣ်
ဖဲလါယနူၤအါရံၤ ၂၃ သီအနံၤန့ၣ် ကီၢ်သူလ့ၤသုးမုၢ်ဒိၣ်(KTLA)အၦၤ ခိးခး၀ဲ ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ (သုးက့ ၄) ကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA(သုးရ့ၣ်–၁၂)သုးရ့ၣ်ခိၣ်–၂ ဒီး ကစၢၢ်ဒိၣ်ကီၢ်ဆၣ် ထီဘိကမံးတံာ်ဖိ(၂)ဂၤအံၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၄) ထုးထီၣ်ပာ်ဖျါ၀ဲဖဲ ၂၄ သီအနံၤန့ၣ်လီၤႉ
တၢ်ဂ့ၢ်ကဲထီၣ်သးခီန့ၣ်ဖဲလါယနူၤအါရံၤ ၂၃ သီ ဟါခီ ၇ နၣ်ရံၣ်အဆၢကတီၢ် ကီၢ်သူလ့ၤသုးမုၢ်ဒိၣ်(KTLA) စီၤကျ့ကျ့တီခိၣ်ရိၣ်မဲအၦၤအိၣ်ခိးခး၀ဲ(KNLA)သုးရ့ၣ်(၁၂)သးရ့ၣ်ခိၣ်–၂ သုးခိၣ်ဒိၣ်ဖိ စီၤတၢ်အဲၣ်အဲၣ်ဃုာ်ဒီး ကစၢၢ်ဒိၣ်ကီၢ်ဆၣ် ထီဘိကမံးတံာ်ပဒိၣ် စီၤကၤလံၤလါ(၂)ဂၤအံၤ ဖဲဖီၣ်တီၣ်သ၀ီဒီး(မံးလး ၄၀)သ၀ီဘၢၣ်စၢၤ လၢတၢ်ဂ့ၢ်တအိၣ်နီတမံၤဘၣ်အဃိ ဘၣ်ဒိ၀ဲခံဂၤလၢာ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
ဘၣ်ဃးဒီးလံာ်တၢ်ထုးထီၣ်ပာ်ဖျါအံၤ(သုးက့ ၄)သုးက့သုးဂ့ၢ်၀ီခိၣ်ကျၢၢ် သုးခိၣ်ဒိၣ်ဖိ စီၤဖိဆံး စံး၀ဲလၢ “KTLA အၦၤခးပၦၤဒုအမ့ၢ်လီၤမီၤနီၤႉခဲအံၤနါက့ပတသ့ၣ်ညါလီၤတံၢ်ဒံးဘၣ်ႉအဃိန့ၣ်ပဘၣ်လူၤဆဲးကျိးက့ၤ(သုးရ့ၣ်–၁၂) သုးရ့ၣ်ခိၣ်–၂ ဒီး ကီၢ်ဆၣ် ဟီၣ်က၀ီၤမူဒါခိၣ်အံၤ၀ံၤမးပကသ့ၣ်ညါလီၤတံၢ်တၢ်ဂ့ၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ဘၣ်ဃးတၢ်ကဲထီၣ်သးအံၤခ့ၣ်အဲၣ်ယူၣ်(သုးက့ ၄)ထုးထီၣ်ပာ်ဖျါ၀ဲလၢမ့ၢ်ဒၣ်(KTLA)အၦၤအိၣ်ခိးခး၀ဲလီၤဘၣ်ဆၣ် ခီဖျိတၢ်ဟးထီၣ်က့ၤလီၤအံၤတအိၣ်ဒီးတၢ်ဒုးသ့ၣ်ညါလိာ်သးဘၣ်အသိးသိလ့ၣ်အံၤတအိၣ်ပတုာ်နီဃ့ၢ်ထီၣ်၀ဲအဃိ တၢ်ခး၀ဲလီၤအဂ့ၢ်န့ၣ် ကီၢ်သူလ့ၤသုးမုၢ်ဒိၣ်(KTLA)တကပၤစံး၀ဲန့ၣ်လီၤႉ
(KTLA)ဆၣ်ကဆီသုးက့ ၦၤဘၣ်မူဘၣ်ဒါတဂၤစံး၀ဲလၢ “ပကီၢ်သူလ့ၤသုးမုၢ်ဒိၣ်ဘိးဘၣ်ရၤလီၤဃာ်တၢ်ကစီၣ်လၢ တဘၣ်ဟးထီၣ်က့ၤလီၤလၢကျဲအံၤဘၣ်ႉတၢ်ကဲထီၣ်သးန့ၣ်မုၢ်နၤယိာ်လံမီၤႉအသိလ့ၣ်န့ၣ်ဟဲလီၤဒီးပသုးန့ၣ်ကိးပတုာ်၀ဲႇတပတုာ်၀ဲဘၣ်ႉသိလ့ၣ်လၢပကိးအီၤတအိၣ်ပတုာ်ဘၣ်န့ၣ်ပပာ်ပနီၣ်အီၤလၢဒုၣ်ဒါအသိလ့ၣ်လီၤအဃိန့ၣ်ပၦၤခး၀ဲလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
တၢ်တဘၣ်ဟးထီၣ်က့ၤလီၤလၢကျဲအံၤဘၣ်န့ၣ်(KNLA)သုးရ့ၣ် ၁၂ တကပၤစ့ၢ်ကီးထုးထီၣ်တ့ၢ်ဃာ်၀ဲလံာ်အိၣ်အသိး ခီဖျိနၢ်ဟူလၢဒုၣ်ဒါကဟဲက့ၤလီၤကျဲ၀ဲအံၤအဃိ ဖဲအ၀ဲသ့ၣ်ဟဲထီၣ်လၢတအိၣ်ဒီးတဒုးသ့ၣ်ညါဆိဘၣ်ဒီး နီဃ့ၢ်ထီၣ်သိလ့ၣ်အဃိခးကမၣ်၀ဲလီၤအဂ့ၢ်န့ၣ် ၦၤဘၣ်မူဘၣ်ဒါတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ
ဒ်န့ၣ်အသိးဘၣ်ဃးဒီးခ့ၣ်အဲၣ်ယူၣ်(သုက့ ၄)ကွဲၤကလုၢ် ထုးထီၣ်ပာ်ဖျါ၀ဲလၢ လၢၢ်ကဆီကီၢ်ဆၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA(သုးရ့ၣ် ၂၀၃)ဟီၣ်က၀ီၤအပူၤန့ၣ် (KTLA)လိာ်ဘၢလိာ်ကွီၢ်ကမျၢၢ်လၢ ပယီၤသုးတၢ်မဲာ်ချံဒီးမၤသံကွံာ်၀ဲကမျၢၢ်(၈)ဂၤတၢ်ဂ့ၢ်အံၤစ့ၢ်ကီး (KTLA)တကပၤက့ၤခီၣ်ဆၢဂ့ၢ်လိာ်ကဒါ၀ဲန့ၣ်လီၤႉ
ဘၣ်ဃးဒီးကွဲၤကလုၢ်ထုးထီၣ်ပာ်ဖျါ၀ဲလၢမၤသံကမျၢၢ်(၈)ဂၤအံၤတမ့ၢ်တၢ်ကစီၣ်လၢအဘၣ်ဘၣ်ဒီးဘၣ်ဃးတၢ်ဂ့ၢ်အံၤ(KTLA)သုးခိၣ်အဲၣ်ခွံစံး၀ဲလၢတၢ်လီၢ်လၢတၢ်ကဲထီၣ်သးအလီၢ်အံၤစ့ၢ်ကီးတမ့ၢ်ကီၢ်သူလ့ၤသုးမုၢ်ဒိၣ်သုးရ့ၣ်ဟူးဂဲၤ၀ဲဘၣ်ဒီးကွဲၤကလုၢ်ရၤလီၤတၢ်ကစီၣ်အံၤမ့ၢ်တၢ်ကစီၣ်လၢအကမၣ်လီၤအဂ့ၢ်န့ၣ် (KTLA)ထုးထီၣ်ပာ်ဖျါ၀ဲဖဲလါယနူၤအါရံၤ ၂၄ သီအခါန့ၣ်လီၤႉ
