လါယနူၤအါရံၤ ၁၇ သီႇ ၂၀၂၃ နံၣ်ႇ ခ့ၣ်အဲးစံၣ်
လၢကညီကီၢ်စဲၣ်အပူၤ ခီဖျိသုးမီၤစိရိၤထုးထီၣ်တၢ်သိၣ်တၢ်သီတၢ်ဘျၢသဲစးလၢအသီအဃိ လၢတၢ်ကက့ၤ(register)မၣ်ပိၤတ့ၤကဒါကရူၢ်ကရၢတဖၣ်အံၤအဂီၢ်ထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် သ့ၣ်ညါဘၣ်လၢၦၤဘူးဒီးကညီကီၢ်စဲၣ်ဂံၢ်ခီၣ်ထံးတၢ်ကရၢကရိတဖၣ်အအိၣ်န့ၣ်လီၤႉ
ဘၣ်ဃးဒီးတၢ်ဂ့ၢ်အံၤသုးမီၤစိရိၤဆၢတဲာ်ပာ်၀ဲလီၢ်ခံကတၢၢ်ဖဲတလါအံၤလါယနူၤအါရံၤအတီၢ်ပူၤန့ၣ် ကယဲၢ်မ့ၢ်တၢ်ကရၢကရိတဖုလၢ်လၢ်ကဘၣ်က့ၤ(register)မၣ်ပိၤကဒါ၀ဲဒ်တၢ်ဘျၢသဲစးလၢသုးမီၤစိရိၤက့ၤထုးထီၣ်ကဒါ၀ဲလၢအသီအံၤအသိးအဂ့ၢ်န့ၣ် ဂံၢ်ခီၣ်ထံးတၢ်ကရၢကရိတဖၣ်စံး၀ဲန့ၣ်လီၤႉ
တၢ်ကရၢကရိလၢအမ့တလဲၤ(register)မၣ်ပိၤတ့ၤကဒါ၀ဲဘၣ်သ့ၣ်တဖၣ်အံၤန့ၣ် တၢ်ကမၤဟးဂီၤကွံာ်၀ဲတၢ်ကရၢကရိအံၤဒီးမ့ဆဲးဟူးဂဲၤဒံး၀ဲန့ၣ်တၢ်ကဟံးန့ၢ်အရ့အဖီခိၣ်အံၤ မ့ၢ်ကဘၣ်ဆဲးပာ်တၢ်ကရၢကရိဒံးဧါန့ၣ်ပတၢၣ်ပီၣ်တဲသကိးအီၤအဖၢမုၢ်လီၤအဂ့ၢ်န့ၣ် ဖၣ်အၣ်၀့ၢ်ပူၤ ဂံၢ်ခီၣ်ထံးတၢ်ကရၢကရိ ၦၤဘၣ်မူဘၣ်ဒါတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
အ၀ဲစံး၀ဲလၢ“မ့မ့ၢ်ပတၢ်ကရၢကရိဒုယိယိလီၤမ့ၢ်၀ဲဒၣ်(နာေရး)ကရူၢ်လီၤႉပတၢ်မၤဘူၣ်ကစၢ်ခီန့ၣ်အိၣ်ဖဲက၀ီၤဒ့ႇ၀့ၢ်ပူၤအံၤလီၤႉခဲအံၤသုးမီၤစိရိၤထုးထီၣ်တၢ်သိၣ်တၢ်သီလၢသီလံအဃိပကဘၣ်ဆိကီတစဲးမီၤနီၤႉလၢတၢ်သိၣ်တၢ်သီပူၤန့ၣ်တဲ၀ဲလၢတဘၣ်မၤဘၣ်ထွဲလိာ်သးဒီးကရူၢ်ကရၢလၢအတဖိးသဲစးဘၣ်တဖၣ်ဘၣ်အိၣ်အဃိတၢ်မၤဘူၣ်ကစၢ်ဖိတဖၣ်ကြၢးလၢအဘၣ်သ့ၣ်ညါဃာ်တၢ်၀ဲအံၤခဲလၢာ်လီၤႉအဃိန့ၣ်လၢပကက့ၤ(register)မၣ်ပိၤတ့ၤကဒါအဂီၢ်န့ၣ်ကီခဲ၀ဲလီၤ”အဂ့ၢ်န့ၣ်စံး၀ဲန့ၣ်လီၤႉ
လၢသုးမီၤစိရိၤအတၢ်သိၣ်တၢ်သီတၢ်ဘျၢသဲစးအပူၤန့ၣ်ကယဲၢ်မ့ၢ်တၢ်ကရၢကရိတဖုလၢ်လၢ်ကဘၣ်(register)မၣ်ပိၤတ့ၤအသးဒီးမ့တ(register)၀ဲဘၣ်န့ၣ်ကဘၣ်လီၤလၢဃိာ်ပူၤ(၃)နံၣ် မ့တမ့ၢ် ကဘၣ်ဟ့ၣ်စ့အီၣ်လီးအကလီၢ် (၁၀)ကၠးညါန့ၣ်လီၤႉတကးဒံးဘၣ်အမဲာ်ညါၦၤလၢအမ့မၤတၢ်ဆဲးကျိးဒီးကရူၢ်ကရၢလၢအထီဒါသုးမီၤစိရိၤသ့ၣ်တဖၣ်အံၤန့ၣ်ကဘၣ်ဟ့စ့အီၣ်လီးအကလီၢ်(၅၀)ဒီးကဘၣ်လီၤလၢဃိာ်ပူၤ(၅)နံၣ်ညါအဂ့ၢ်န့ၣ် ပာ်ဖျါ၀ဲန့ၣ်လီၤႉ
ခီဖျိသုးမီၤစိရိၤထုးထီၣ်တၢ်ဘျၢသဲစးလၢအသီအံၤအဃိဂံၢ်ခီၣ်ထံးတၢ်ကရၢကရိလၢအကဲထီၣ်တၢ်တိစၢၤမၤစၢၤလၢၦၤဂ့ၢ်၀ီႇဟီၣ်က၀ီၤတၢ်ဂုၤထီၣ်ပသီထီၣ်ႇဆူၣ်ချ့ႇကူၣ်သ့အဂီၢ်သ့ၣ်တဖၣ်အံၤကလီၤစှၤ၀ဲသ့ဒီး တၢ်ကရၢကရိလၢကလဲၤ(register)သးလၢသုးမီၤစိရိၤစုပူၤသ့ၣ်တဖၣ်အံၤကလီၤစှၤ၀ဲအဂ့ၢ်န့ၣ် လူၢ်ပျဲၢ်၀့ၢ် သးစၢ်လၢအမၤမုာ်သးမၤကလီတၢ်ဖံးတၢ်မၤတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ
“လၢကက့ၤ(register)ကဒါသးဒုတၢ်ရဲၣ်တၢ်ကျဲၤအိၣ်မီၤနီၤႉဘၣ်ဆၣ်တုၤလၢခဲအံၤတလီၤတံၢ်ဒံးဘၣ်ႉပနၢ်ဟူစ့ၢ်ကီးလၢအ၀ဲသ့ၣ်ကမၤတၢ်ဃုထၢအိၣ်မီၤနီၤႉမ့ၢ်တၢ်ဃုထၢအံၤကကဲထီၣ်ဧါတကဲထီၣ်ဧါဒုတသ့ၣ်ညါဘၣ်ႉတမံၤဂ့ၤတမၠိဂ့ၤပနၢ်ဟူလၢတၢ်ကရၢကရိတနီၤန့ၣ်ကက့ၤ(register)၀ဲလၢတၢ်ဃုထၢ၀ံၤမးအိၣ်မီၤနီၤႉခဲအံၤဒုပတဲလီၤတံၢ်တသ့ဒံးဘၣ်” အဂ့ၢ်န့ၣ်စံး၀ဲန့ၣ်လီၤႉ
တၢ်ကရၢကရိတၢ်သိၣ်တၢ်သီတၢ်ဘျၢသဲစးလၢသုးမီၤစိရိၤက့ၤကွဲးလီၤဒုးအိၣ်ထီၣ်၀ဲလၢအသီအံၤအပူၤန့ၣ် တၢ်တဘၣ်နုာ်လီၤပာ်ဃုာ်လၢထံရူၢ်ကီၢ်သဲးႇတၢ်ဘူၣ်တၢ်ဘါဒီးကီၢ်ပူၤတၢ်ဂ့ၢ်တၢ်ကျိၤသ့ၣ်တဖၣ်အကျါဘၣ်အသိး တၢ်ခွဲးတၢ်ယာ်အိၣ်လၢပဒိၣ်၀ဲၤကျိၤကနုာ်လီၤသမံသမိးတၢ်ကရၢကရိအံၤအဂ့ၢ်န့ၣ် ပာ်ဖျါ၀ဲန့ၣ်လီၤႉ
တၢ်သိၣ်တၢ်သီတၢ်ဘျၢသဲစး၀ဲအံၤဘၣ်တၢ်က့ၤဒုးအိၣ်ထီၣ်ကဒါအီၤလၢသုးဟံးန့ၢ်တၢ်စိတၢ်ကမီၤ၀ံၤအလီၢ်ခံဒီး ဖဲ(၂၀၂၂)လါအီးကထိဘၢၣ် ၂၈ သီအနံၤန့ၣ် တၢ်ကစီၣ်လၢသုးမီၤစိရိၤပၢ၀ဲတဖၣ်အံၤထုးထီၣ်ပာ်ဖျါ၀ဲန့ၣ်လီၤႉ ဒ်န့ၣ်အသိးသုးမီၤစိရိၤဟ့ၣ်တၢ်ဆၢကတီၢ်လၢလီၢ်ခံကတၢၢ်(၂၀၂၃)လါယနူၤအါရံၤအတီၢ်ပူၤန့ၣ် တၢ်ကရၢကရိခဲလၢာ်ကဘၣ်လဲၤ(register)ကဒါသးအဂ့ၢ်န့ၣ် သုးမီၤစိရိၤနဲၣ်လီၤ၀ဲန့ၣ်လီၤႉ
