လါယနူၤအါရံၤ ၂၂ သီႇ ၂၀၂၃ သီႇ ခ့ၣ်အဲးစံၣ်
လၢအ့ၣ်ယၣ်၀တံၣ်ကီၢ်ခီဒိၣ်(အ့ၤမဲ)ကီၢ်ဆၣ်အပူၤန့ၣ် ဖဲလါယနူၤအါရံၤ ၂၀ သီ ဂီၤခီ ၁၀ နၣ်ရံၣ်ဃၣ်ဃၣ် အဆၢကတီၢ်(အ့ၤမဲ)ဟီၣ်က၀ီၤပယီၤသုးနုာ်လီၤဖီၣ်၀ဲကညီလံာ်လဲၢ်တၢ်ဆဲးတၢ်လၤကမံးတံာ်ဖိ သးစၢ်(စးသ့စီၣ်မ့)အံၤလၢဟံၣ်ပူၤဒီးက့ၤကိး၀ဲဒၣ်အဂ့ၢ်န့ၣ် ၦၤလၢဘူးဒီးအီၤတဖၣ်စံး၀ဲန့ၣ်လီၤႉ
ပယီၤသုးဖီၣ်က့ၤကိးစးသ့စီၣ်မ့အံၤလၢတၢ်ဂ့ၢ်မနုၤလဲၣ်န့ၣ်တၢ်တသ့ၣ်ညါ၀ဲဘၣ်အသိးလၢ(အ့ၤမဲ)ပၢၤကီၢ်၀ဲၤလီၢ်အံၤတဆီတၢ်ဆှၢအီၤဆူ(မၠီမၠး)ဒီးကတီၢ်ခဲအံၤတၢ်ဖီၣ်ဒုးဃာ်အီၤတၢ်လီၢ်ဖဲလဲၣ်န့ၣ်အဟံၣ်ဖိဃီဖိဟးဃုသ့ၣ်ညါ၀ဲတန့ၢ်ဒံးဘၣ်အဂ့ၢ်န့ၣ် ၦၤလၢဘူးဒီးအဟံၣ်ဖိဃီဖိတဂၤစံး၀ဲဒ်အံၤန့ၣ်လီၤႉ
“ပယီၤသုးဟဲလၢအဟံၣ်န့ၣ်ကဘၣ်ဖဲ ၁၀ နၣ်ရံၣ် ၁၁ နၣ်ရံၣ်န့ၣ်မီၤနီၤႉပယီၤဟဲတုၤဘျီက့ၤကိးအီၤလီၤႉ က့ၤကိး၀ဲလၢ(အ့ၤမဲ)ပၢၤကီၢ်၀ဲၤလီၢ်ႉ မ့၀ံၤဘျီကအိၣ်ဖဲဟါခီ ၆ နၣ်ရံၣ်ဃၣ်ဃၣ်န့ၣ် ၦၤဘိၣ်ဘၢအမဲာ်သၣ် ၦၤက့ၤကိးအီၤလၢတၢ်သမံသမိးတၢ်လီၢ်မီၤနီၤႉတုၤလၢခဲအံၤန့ၣ်ၦၤဟးဃုသ့ၣ်ညါအဖၢမုၢ်လီၤႉဘၣ်ဆၣ်မ့ၢ်အလဲၤတုၤဖဲလဲၣ်န့ၣ်တုၤလၢခဲအံၤၦၤဆဲးကျိးတန့ၢ်ဘၣ်” အဂ့ၢ်န့ၣ် စံး၀ဲန့ၣ်လီၤႉ
ပယီၤသုးဖီၣ်စးသ့စီၣ်မ့အံၤလၢတၢ်ဂ့ၢ်မနုၤလဲၣ်န့ၣ်အဟံၣ်ဖိဃီဖိစ့ၢ်ကီးတသ့ၣ်ညါ၀ဲဘၣ်အသိး တချုးတၢ်ဖီၣ်အီၤဒံးဘၣ် အပူၤကွံာ်လါယနူၤအါရံၤ ၁၃ သီအနံၤန့ၣ် ဖဲတၢ်မၤတၢ်အိၣ်ဖှိၣ်ဖဲ(အ့ၤမဲ)ကညီလံာ်လဲၢ် တၢ်ဆဲးတၢ်လၤ၀ဲၤဒၢးအံၤလၢလံာ်လဲၢ်တၢ်ဆဲးတၢ်လၤအဂ့ၢ်အကျိၤအခါန့ၣ်စ့ၢ်ကီး ပယီၤသုးဖီၣ်သမံသမိးအီၤလၢအမ့ၢ်တၢ်ဒီသဒၢကမျၢၢ်(PDF)သုးမ့ၢ်ဧါႇတမ့ၢ်ဧါဒံးန့ၣ်လီၤႉ
တၢ်ဖီၣ်အီၤ၀ံၤအလီၢ်ခံလါယနူၤအါရံၤ ၁၄ သီအနံၤန့ၣ် စးသ့စီၣ်မ့ ဟဲက့ၤပူၤဖျဲးထီၣ်လၢတၢ်အုၣ်ခီၣ်အီၤအဃိ၀ံၤ ဒီးခဲအံၤတဘျီန့ၣ်တၢ်ဖီၣ်အီၤအိၣ်၀ဲခံဘျီလံန့ၣ်လီၤႉ
တၢ်ဖီၣ်စးသ့စီၣ်မ့တကးဒံးဘၣ်အမဲာ်ညါဖဲတၢ်တနံၤဃီ၀ဲန့ၣ်ဟါခီအဆၢကတီၢ် တၢ်နုာ်လီၤဖီၣ်၀ဲသ၀ီသးၦၢ်(စီၤန့ၢ်မူ)လၢအဟူးဂဲၤဖံးမၤတၢ်လၢကညီလံာ်လဲၢ်တၢ်ဆဲးတၢ်လၤအံၤဒီးအဟံၣ်ဖိဃီဖိခဲလၢာ်အသိးတုၤလၢခဲအံၤဆဲးကျိးအ၀ဲသ့ၣ်တန့ၢ်ဒံးဘၣ်အဂ့ၢ်န့ၣ် ၦၤလၢအိၣ်ဘူးဖဲန့ၣ်တဖၣ်စံး၀ဲန့ၣ်လီၤႉ
စးသ့စီၣ်မ့အံၤမ့ၢ်ၦၤဟူးဂဲၤဖံးမၤတၢ်လၢကညီလံာ်လဲၢ်တၢ်ဆဲးတၢ်လၤကလဲၤထီၣ်လဲၤထီအဂီၢ်လီၤဒီး အ၀ဲဟးသိၣ်လိန့ၢ်၀ဲသးစၢ်တဖၣ်လၢ(ခီၣ်ဖၠူထၢၣ်)ႇလံာ်ကီၤလိာ်၀ါဒီးဒ်ပယီၤသုးလိာ်ဘၢလိာ်ကွီၢ်အီၤအသိးန့ၣ် အတမ့ၢ်(PDF)ၦၤဘၣ်အဂ့ၢ်န့ၣ် သးစၢ်လၢအဘူးဒီးအီၤတဂၤစံး၀ဲန့ၣ်လီၤႉ
အ၀ဲစံး၀ဲလၢ“ခဲအံၤစးသ့စီၣ်မ့န့ၣ်အမၤတၢ်လၢလံာ်လဲၢ်တၢ်ဆဲးတၢ်လၤတၢ်ဖံးတၢ်မၤတခါလီၤႉ အဟးမၤလိန့ၢ်၀ဲသးစၢ်သ့ၣ်တဖၣ်လၢ(ခီၣ်ဖၠူထၢၣ်)ႇလံာ်ကီၤလၤ၀ါဒ်န့ၣ်လီၤႉအတဘၣ်ဃးဒီး(PDF)ဘၣ်ႉ အ၀ဲမၤတၢ်လၢကညီဒီကလုာ်အဂီၢ်လီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ဒ်န့ၣ်အသိးတချုးသုးဟံးန့ၢ်တၢ်စိတၢ်ကမီၤကဲထီၣ်ဒံးဘၣ်အခါဖဲအပူၤကွံာ်(၂၀၂၀)လါအီကူး ၁၂ သီအနံၤ တၢ်တီခိၣ်ရိၣ်မဲမၤ၀ဲ(၇၀)၀ီတ၀ီ ကညီမၤထူရၤမုၢ်နံၤတၢ်ရဲၣ်တၢ်ကျဲၤမူးအံၤလၢ၀့ၢ်တကူၣ်(၀့ၢ်ဘျီၣ်မဲာ်ညါ)အဃိ ပယီၤသုးဖီၣ်၀ဲစးသ့စီၣ်မ့အံၤဃုာ်ဒီးကညီသးစၢ်စီၤဆၣ်ကွၢ်လၢ်(၂)ဂၤအံၤဒံးန့ၣ်လီၤႉ
