လါယနူၤအါရံၤ ၁၅ သီႇ ၂၀၂၃ သီႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာစၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ ဖဲတလါအံၤ လါယနူၤအါရံၤထီၣ်သီအခါန့ၣ် ပယီၤသုးဟဲတ့ၢ်လီၤ၀ဲမ့ၣ်ပိၢ်တပယူာ်ဃီဒီး ဖဲလါယနူၤအါရံၤ(၁၃)သီအနံၤစ့ၢ်ကီး ဟဲတ့ၢ်လီၤကဒီးမ့ၣ်ပိၢ်လၢလူၤသီကီၢ်ဆၣ်ပူၤ တၢ်ဘါယွၤသရိာ်ဒီးကမျၢၢ်အဟံၣ်အဃီအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ
စးထီၣ်ဖဲတလါအံၤလါယနူၤအါရံၤထီၣ် ၃ သီ‚ ၇သီႇ ၁၂ သီတုၤလၢ ၁၃ သီန့ၣ် လၢလွံၢ်သီအတီၢ်ပူၤသုးမီၤစိရိၤကဘီယူၤဟဲခးလီၤတၢ်ဒိၣ်ဒိၣ်မုၢ်မုၢ်ဒီးပညိၣ်ခးလီၤ၀ဲတၢ်ဘါယွၤသရိာ်ဒီးကမျၢၢ်အဟံၣ်အဃီအဂ့ၢ်န့ၣ် ခ့ၣ်အဲၣ်ယူၣ်–မုၢ်တြီၢ်ကီၢ်ရ့ၣ်တၢ်ကစီၣ်စံး၀ဲန့ၣ်လီၤႉ
တၢ်ကဲထီၣ်သးဘျီ၀ဲအံၤခီဖျိသုးမီၤစိရိၤကဘီယူၤတဘ့ၣ်ဟဲတ့ၢ်လီၤမ့ၣ်ပိၢ်(၂)ဖျၢၣ်ဆူလူၤသီကီၢ်ဆၣ် ပ့က့ကရူၢ် ဆၣ်လီပူၤသ၀ီအဃိ လီၤတဲာ်ပိၢ်ဖးထီၣ်၀ဲလၢၦၤဟံၣ်တဖျၢၣ်အဖီခိၣ်ဒီးဘၣ်ဟးဂီၤဃုာ်၀ဲတၢ်သူၣ်ထီၣ်လၢအိၣ် တၢ်ခိၣ်တၢ်ဃၢၤဖဲန့ၣ်သ့ၣ်တဖၣ်အဂ့ၢ်န့ၣ် မုၢ်တြီၢ်တၢ်ကစီၣ်အလံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ
သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်ဘျီ၀ဲအံၤန့ၣ်ဘၣ်ဟးဂီၤ၀ဲ(ဆၣ်လီပူၤ)သ၀ီ စီၤလ့စၢၢ်ထူအဟံၣ်(၁)ဖျၢၣ်ဒီး အဖုဖီတဖျၢၣ်အသိးဘၣ်ဟးဂီၤဃုာ်စ့ၢ်ကီး၀ဲတၢ်ဘါယွၤသရိာ်(၁)ဖျၢၣ်ႇတၢ်အိၣ်ဖှိၣ်သရၣ် စီၤထိၣ်ဘံဘံၤအဟံၣ် (၁)ဖျၢၣ်ႇ စီၤပ့ၢ်ထူအဟံၣ်(၁)ဖျၢၣ်ဒီးစီၤခံးကပီၤအသဲးကျီးတကျီးစ့ၢ်ကီးအဂ့ၢ်န့ၣ် မုၢ်တြီၢ်တၢ်ကစီၣ်ပာ်ဖျါ၀ဲန့ၣ်လီၤႉ
ခီဖျိမ့ၣ်ပိၢ်လီၤတဲၤပိၢ်ဖးထီၣ်ဘၣ်၀ဲတၢ်ဘါယွၤသရိာ်ဒီးဟံၣ်ဃီတၢ်သူၣ်ထီၣ်တဖၣ်အဃိ တၢ်သူၣ်ထီၣ်ဟးဂူာ်ဟးဂီၤအိၣ်၀ဲဘၣ်ဆၣ်မ့မ့ၢ်ကမျၢၢ်သံဘၣ်ဒိဘၣ်ထံးခီန့ၣ်တၢ်ပာ်ဖျါဃုာ်၀ဲတအိၣ်ဘၣ်အသိး ခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ်စ့ၢ်ကီးပာ်ဂၢၢ်ပာ်ကျၢၤ၀ဲလီၤလီၤဆီဆီတန့ၢ်ဒံး၀ဲဘၣ်န့ၣ်လီၤႉ
ဒ်န့ၣ်အသိးဖဲလါယနူၤအါရံၤ ၁၂ သီ မုၢ်ဃ့ၢ်လီၤ ၂ နၣ်ရံၣ်အဆၢကတီၢ်စ့ၢ်ကီး ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢလူၤသီကီၢ်ဆၣ် ပ့က့ကရူၢ်(လ့၀ါသ၀ီ) တၢ်ဘါယွၤသရိာ်ဖီခိၣ်အဃိ ကမျၢၢ်သံ(၅)ဂၤအကျါပၣ်ဃုာ်၀ဲသရၣ်ဒိၣ်(၂)ဂၤႇဖိၣ်သၣ်(၁)ဂၤဒီး ဘၣ်ဒိ၀ဲ(၄)ဂၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ
တကးဒံးဘၣ်လၢန့ၣ်အမဲာ်ညါဖဲအပူၤကွံာ်လါယနူၤအါရံၤ ၇ သီအခါစ့ၢ်ကီး ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢဒွဲၣ်လိကီၢ်ဆၣ် မဲးသုၣ်ကရူၢ် လၢၢ်ထူၣ်ဖိဟီၣ်က၀ီၤပူၤအဃိ တၢ်သူၣ်ထီၣ်ဟးဂီၤ၀ဲ(၇)ဖျၢၣ်အကျါပၣ်ဃုာ်၀ဲတၢ်ဆါဟံၣ်(၁)ဖျၢၣ်န့ၣ်လီၤႉဒ်န့ၣ်အသိးဖဲတၢ်တနံၤဃီ၀ဲန့ၣ်သုးမီၤစိရိၤကဘီယူၤဟဲတ့ၢ်လီၤကဒီးမ့ၣ်ပိၢ်(၄)ဖျၢၣ်အဃိ ၦၤခူၣ်ထူသ့ၣ်ခိၣ် ဒီၤနွဲၤနံၤဒီးအဖိခွါ(၂)ဂၤႇအဒဲၣ်မုၣ်(၁)ဂၤဒီး ၦၤမၤတၢ်ဖိ(၂)ဂၤသံ၀ဲဒၣ်န့ၣ်လီၤႉ
ဒ်န့ၣ်အသိးဖဲလါယနူၤအါရံၤထီၣ် ၃သီအခါစ့ၢ်ကီး သုးမီၤစိရိၤကဘီယူၤ(၄)ဘ့ၣ်ဟဲတ့ၢ်လီၤမ့ၣ်ပိၢ် အဖျၢၣ်(၅၀)ဘျဲၣ်လၢဒွဲၣ်လိကီၢ်ဆၣ် မဲၤ၀့ၤကရူၢ် မဲၤ၀့ၤသ၀ီႇတိၤမဲၢ်ခံႇချိၣ်ခံသ၀ီပူၤဒီးတၢ်ဖံးအီၣ်မၤအီၣ်လီၢ်ကျဲအသိး ခးလီၤ၀ဲကျိချံအဖျၢၣ်(၂၀၀၀၀)ဘျဲၣ်ညါအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါ၀ဲန့ၣ်လီၤႉ
တချုးသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်ဒံးဘၣ်အခါဖဲတနံၣ်အံၤလါယနူၤအါရံၤထီၣ် ၁ သီအနံၤန့ၣ် ခ့ၣ်အဲၣ်ယူၣ်(သုးက့ ၅)၀ဲၤလီၢ်ထုးထီၣ်၀ဲလံာ်တၢ်နဲၣ်လီၤတဘ့ၣ်လၢ လီၢ်က၀ီၤကမျၢၢ်တဘၣ်ပာ်ဖှိၣ်မၤသကိးတၢ်ဒီး ပယီၤသုးဘၣ်ဒီးႇသုးမီၤစိရိၤစုတီၤဖီလာ်၀ဲၤကျိၤၦၤမၤတၢ်ဖိခဲလၢာ်ကဟးထီၣ်ကွံာ်လၢဟီၣ်က၀ီၤပူၤအဂ့ၢ်န့ၣ် လံာ်တၢ်နဲၣ်လီၤအပူၤပာ်ဖျါ၀ဲန့ၣ်လီၤႉ
