ပယီၤသုးဘၣ်ဒိဘၣ်ထံးဟဲအါထီၣ်အဃိတၢ်တတူၢ်လိာ်ကူစါယါဘျါကမျၢၢ်လၢဖၣ်အၣ်(တီၤကလ့)သုးတၢ်ဆါဟံၣ်လၢၤဘၣ်

လါယနူၤအါရံၤ ၄ သီႇ ၂၀၂၃ နံၣ်ႇ ခ့ၣ်အဲးစံၣ်

တကီၢ်ခါခဲအံၤခီဖျိတၢ်ဒုးတၢ်ယၤကဲထီၣ်ဒီးပယီၤသုးဘၣ်ဒိဘၣ်ထံးဟဲအါထီၣ်အဃိ လၢကညီကီၢ်စဲၣ် ဖၣ်အၣ်၀့ၢ်(တီၤကလ့)သုးတၢ်ဆါဟံၣ်န့ၣ်တၢ်တူၢ်လိာ်ကူစါယါဘျါကမျၢၢ်တဖၣ်လၢၤဘၣ်အဂ့ၢ်န့ၣ် ကမျၢၢ်လၢအိၣ်ဖၣ်အၣ်၀့ၢ်ပူၤတဖၣ်စံး၀ဲန့ၣ်လီၤႉ

အပူၤကွံာ်လၢညါခါသုးတၢ်ဆါဟံၣ်၀ဲအံၤန့ၣ်ပယီၤသုးဃုာ်ဒီးကမျၢၢ်တဖၣ်လဲၤထီၣ်ကူစါယါဘျါအသးန့ၢ်၀ဲဒီး ဖဲ(၂၀၂၂)နံၣ်ဘူးကလၢာ်န့ၣ်တၢ်ဆိကတီၢ်ပတုာ်ကွံာ်၀ဲတၢ်ကူစါယါဘျါကမျၢၢ်တဖၣ်အဂ့ၢ်န့ၣ် ကမျၢၢ်လၢအိၣ်ဖၣ်အၣ်၀့ၢ်ပူၤလၢတအဲၣ်ဒိးပာ်ဖျါအမံၤတဂၤစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

အ၀ဲစံး၀ဲလၢ“ယပါန့ၣ်အတၢ်ဆါဂ့ၢ်ဂီၢ်အူကဲထီၣ်အဃိပလဲၤဆှၢအီၤမီၤနီၤႉအ၀ဲသ့ၣ်တဲ၀ဲလၢတတူၢ်လိာ်၀ဲလၢာ်ဘၣ်ႉအပူၤကွံာ်လၢညါန့ၣ်ၦၤအိၣ်ဖဲဖၣ်အၣ်ႇလူၢ်ပျဲၢ်ႇကီးတရံးခဲလၢာ်န့ၣ်ဟဲကူစါယါဘျါသးဖဲတၢ်ဆါဟံၣ်အံၤလီၤႉၦၤဟဲအိၣ်ဖျဲၣ်ဖိနါက့ဖဲအံၤလီၤႉခဲအံၤဘၣ်မနုၤအဃိတတူၢ်လိာ်၀ဲလၢၤဘၣ်န့ၣ်ပတသ့ၣ်ညါဘၣ်ႉအ၀ဲသ့ၣ်မၢပလဲၤလၢဖၣ်အၣ်တၢ်ဆါဟံၣ်လီၤ”အဂ့ၢ်န့ၣ်စံး၀ဲန့ၣ်လီၤႉ

တီၤကလ့သုးတၢ်ဆါဟံၣ်အံၤအပူၤကွံာ်လၢညါန့ၣ်ကူစါယါဘျါ၀ဲကမျၢၢ်ဘၣ်ဆၣ်ခဲအံၤဘၣ်မနုၤတကူစါယါဘျါကမျၢၢ်လၢၤဘၣ်လဲၣ်တၢ်ဂ့ၢ်အံၤခီဖျိလၢကညီကီၢ်စဲၣ်ပူၤတၢ်ဒုးကဲထီၣ်ဒီးပယီၤသုးဘၣ်ဒိဘၣ်ထံးဟဲအါထီၣ်အဃိလီၤဒီးမ့ၢ်လၢတၢ်ဆါဟံၣ်တၢ်လီၢ်တတြီၢ်လၢၤ၀ဲဘၣ်အဃိလီၤအဂ့ၢ်န့ၣ်ၦၤလၢဘူးဒီးတီၤကလ့သုးတၢ်ဆါဟံၣ်တဂၤစံး၀ဲဒ်အံၤန့ၣ်လီၤႉ

“ပနၢ်ဟူသုးကသံၣ်သရၣ်တဲ၀ဲလၢတၢ်လီၢ်တအိၣ်လၢကပာ်ၦၤဆါလၢၤဘၣ်ဒ်န့ၣ်မီၤနီၤႉပနၢ်ဟူလၢပယီၤသုးဘၣ်ဒိဘၣ်ထံးလၢတၢ်မဲာ်ညါအါထီၣ်အဃိလီၤႉတၢ်အဃိန့ၣ်မၢကမျၢၢ်လဲၤကူစါယါဘျါအသးလၢဖၣ်အၣ်တၢ်ဆါဟံၣ်လီၤ” အဂ့ၢ်န့ၣ်ကမျၢၢ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ

ဖၣ်အၣ်၀့ၢ်ပူၤကမျၢၢ်တၢ်ဆါဟံၣ်ဖးဒိၣ်အံၤခီဖျိကသံၣ်ကသီဒီးကသံၣ်ရၣ်လၢအတၢ်သ့တၢ်ဘၣ်အိၣ်လၢလၢၦဲၤၦဲၤအံၤတအိၣ်အါအါဘၣ်အဃိကမျၢၢ်ထံဖိကီၢ်ဖိတဖၣ်တလဲၤကူစါယါဘျါအသးလၢတၢ်ဆါဟံၣ်အံၤလၢၤဘၣ်ဒီး ဟဲထီၣ်က့ၤလၢတီၤကလ့ၤသုးတၢ်ဆါဟံၣ်အံၤလီၤအဂ့ၢ်န့ၣ် ကသံၣ်သရၣ်မုၢ်လၢအိၣ်ဖၣ်အၣ်၀့ၢ်ပူၤတဂၤစ့ၢ်ကီးစံး၀ဲ န့ၣ်လီၤႉ

အ၀ဲစံး၀ဲလၢ“အပူၤကွံာ်လၢညါခါနါက့ဖၣ်အၣ်တၢ်ဆါဟံၣ်ဖးဒိၣ်အံၤကသံၣ်မနုၤမးတအိၣ်ဘၣ်ႉကသံၣ်သရၣ်၊မုၣ်နါက့တအိၣ်လၢလၢၦဲၤၦဲၤဘၣ်ႉခဲအံၤဘျီဒုနးဒိၣ်ထီၣ်၀ဲန့ၣ်ႉအိၣ်ထဲၦၤဟဲမၤလိသ့သးတဖၣ်လီၤအဃိကမျၢၢ်တဖၣ်နာ်အီၣ်၀ဲတဘူၣ်အါအါဘၣ်အဃိၦၤတအဲၣ်ဒိးလဲၤထီၣ်လၢၤဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

တကီၣ်ခါခဲအံၤလၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢကီးတရံးႇကၠၤအ့စ့ၣ်ကၠံႇ သထူၣ်ဒီးဖၣ်ပူၣ်ဟီၣ်က၀ီၤတဖၣ်အပူၤန့ၣ် ပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ႇ တၢ်ဒီသဒၢကမျၢၢ်သုး(PDF)အဘၢၣ်စၢၤတၢ်ဒုးကဲထီၣ်၀ဲတပယူာ်ဃီန့ၣ်လီၤႉ

ခီဖျိတၢ်ဒုးတၢ်ယၤအဃိပယီၤသုးလၢအဘၣ်ဒိဘၣ်ထံးသ့ၣ်တဖၣ်အံၤတၢ်ဟဲက့ၤစိာ်အ၀ဲသ့ၣ်လၢသုးကဘီယူၤဒီး တၢ်ကူစါယါဘျါအ၀ဲသ့ၣ်ဖဲဖၣ်အၣ်(တီၤကလ့)သုးတၢ်ဆါဟံၣ်အံၤလီၤအဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ

ဖဲအပူၤကွံာ်(၂၀၂၂)နံၣ်လါအ့ဖြ့ၣ်လၢၤအခါစ့ၢ်ကီးခီဖျိတၢ်ဒုးကဲထီၣ်လၢဟီၣ်က၀ီၤဖဲန့ၣ်အပူၤအဃိ ပယီၤသုးတကပၤဘၣ်ဒိဘၣ်ထံးအါ၀ဲဒီးခီဖျိတီၤကလ့သုးတၢ်ဆါဟံၣ်အံၤတၢ်လီၢ်တတြီၢ်လၢၤ၀ဲဘၣ်အဃိ ပယီၤသုးလၢအဘၣ်ဒိဘၣ်ထံးသ့ၣ်တဖၣ်ဘၣ်တၢ်တၢ်လဲၤဆှၢကူစါယါဘျါအီၤဆူဖၣ်အၣ်တၢ်ဆါဟံၣ်ဒံးန့ၣ်လီၤႉ