လါယနူၤအါရံၤ ၂၈ သီႇ ၂၀၂၃ နံၣ်ႇ ခ့ၣ်အဲးစံၣ်
လၢကညီကီၢ်စဲၣ် ကီးတရံးကီၢ်ဆၣ်ကလံၤထံး မီမးကရူၢ်(သၤယၤကိ)သ၀ီအပူၤန့ၣ် ဖဲလါယနူၤအါရံၤ ၂၆ သီ ဟါခီအဆၢကတီၢ် ခီဖျိမ့ၣ်ပိၢ်အချံလၢအတပိၢ်ဖးထီၣ်ဒံးဘၣ်တဖျၢၣ်ပိၢ်ဖးထီၣ်အဃိ ဖိသၣ်သံ(၁)ဂၤဒီးဘၣ်ဒိ(၃)ဂၤ အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
လၢ(သၤယၤကိ)သ၀ီအပူၤန့ၣ်ဖိသၣ်တဂၤလဲၤထၢ၀ဲ(၄၀ မမ)မ့ၣ်ပိၢ်အချံလၢတပိၢ်ဖးထီၣ်ဒံးဘၣ်အံၤဒီး ခီဖျိမ့ၣ်ပိၢ်ပိၢ်ဖးထီၣ်အဃိဖိသၣ်အနံၣ်(၁၀)တဂၤအံၤသံ၀ဲတဘျီဃီဖဲတၢ်ကဲထီၣ်သးအလီၢ်န့ၣ်ဒီး ဘၣ်ဒိဃုာ်စ့ၢ်ကီး၀ဲဖိသၣ်ပိာ်ခွါဖိမၠိ၀့စီၣ်(၇)နံၣ်ႇကၠီၤခုၣ်(၂)နံၣ်ဒီးဒီၣ်ဖူမူ(၅၃)နံၣ်အံၤအဂ့ၢ်န့ၣ် သ၀ီဖိတဂၤစံး၀ဲန့ၣ်လီၤႉ
အ၀ဲစံး၀ဲလၢ“တၢ်ဒုးကဲထီၣ်လၢညါခါန့ၣ်(၄၀ မမ)မ့ၣ်ပိၢ်ချံလၢအတပိၢ်ဖးထီၣ်ဒံးဘၣ်န့ၣ်အိၣ်ခံဖျၢၣ်ဒံးႉ ၦၤလဲၤပာ်လၢသ၀ီချၢမီၤနီၤႉၦၤဖိသၣ်ခီန့ၣ်ဟဲက့ၤစိာ်၀ဲလၢသ၀ီပူၤတဖျၢၣ်ႉၦၤဖိသၣ်တဂၤန့ၣ်ထုးထီၣ်ဒုးနဲၣ်ပၠးမ့ၣ်ပိၢ်ချံလၢအထၢၣ်ပူၤမီၤနီၤႉဖဲအထုးထီၣ်၀ဲအခါန့ၣ်မ့ၣ်ပိၢ်ချံလီၤတဲာ်ဘျီပိၢ်ဖးထီၣ်၀ဲလီၤႉၦၤဖိသၣ်လၢအထုးထီၣ်နဲၣ်ပၠးမ့ၣ်ပိၢ်ချံတဂၤန့ၣ်ကွၢ်မးတဘူၣ်လၢၤဘၣ်ႉသံ၀ဲဖဲန့ၣ်(၁)ဂၤဒီးဘၣ်ဒိ(၃)ဂၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ
ဟီၣ်က၀ီၤတၢ်လီၢ်ဒူသ၀ီဖဲန့ၣ်အပူၤတၢ်ဒုးကဲထီၣ်၀ဲခဲအံၤခဲအံၤဒီးခီဖျိမ့ၣ်ပိၢ်အချံလၢတပိၢ်ဖးထီၣ်ဒံးဘၣ်အိၣ်အဃိဒ်သိးကမျၢၢ်သ၀ီဖိတဖၣ်သုတကွၢ်ဆၢၣ်မဲာ်ဘၣ်ဒီးတၢ်ဒ်အံၤတဂ့ၤအဂီၢ်န့ၣ် ကြၢးလၢတၢ်ကဘၣ်ဟ့ၣ်ကဒီး၀ဲပီညါအဂ့ၢ်န့ၣ် မီမးကရူၢ် လီၢ်က၀ီၤကမျၢၢ်တဂၤ စံး၀ဲန့ၣ်လီၤႉ
“ၦၤဟ့ၣ်တၢ်သိၣ်လိဒုအအိၣ်မီၤနီၤႉကြၢးလၢၦၤကဘၣ်ဟ့ၣ်အါထီၣ်၀ဲမီၤနီၤႉၦၤနီၢ်ဒိၣ်အိၣ်ဖဲသ၀ီပူၤတဖၣ်နါက့ယမၤဘူၣ်ႇယဖီၣ်ဘူၣ်ဒ်န့ၣ်အိၣ်ဒီဒူၣ်ညါႉၦၤနီၢ်ဒိၣ်လဲၤဖီၣ်၀ဲဒ်န့ၣ်အဃိၦၤဖိသၣ်ခီကွၢ်လိ၀ဲဘျီလဲၤဖီၣ်၀ဲဒ်န့ၣ်လီၤႉၦၤနီၢ်ဒိၣ်မ့ဟးတဲဖိသၣ်လၢတဘၣ်လဲၤမၤဘူးဘၣ်ႇတဘၣ်လဲၤဖီၣ်ဘၣ်ဒ်န့ၣ်ဒုကဂ့ၤဒိၣ်၀ဲမီၤနီၤ”အဂ့ၢ်န့ၣ် မီမးလီၢ်က၀ီၤ သ၀ီဖိတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ခီဖျိပယီၤသုးခးလီၤကျိဖးဒိၣ်အဃိလီၢ်က၀ီၤကမျၢၢ်သံဘၣ်ဒိဘၣ်ထံးအိၣ်၀ဲအါမးအသိး ကတီၢ်ခဲအံၤလၢ(ကီးတရံး)ဟီၣ်က၀ီၤဒူသ၀ီတဖၣ်အပူၤန့ၣ်မ့ၣ်ပိၢ်အချံလၢအတပိၢ်ဖးထီၣ်ဒံးဘၣ်အိၣ်ဒံး၀ဲအါမးအဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ
