လါယနူၤအါရံၤ ၂၁ သီႇ ၂၀၂၃ နံၣ်ႇ ခ့ၣ်အဲးစံၣ်
လၢတလၢၤကီၢ်စဲၣ် ယ့–မီၣ်လမၠဲၣ်ကီၢ်ဆၣ် (မီၣ်ကန့ၤ)ကရူၢ်အပူၤန့ၣ် ဖဲလါယနူၤအါရံၤ ၂၀ သီ ဂီၤခီ ၉ နၣ်ရံၣ် အဆၢကတီၢ် တၢ်ခိးခးပယီၤသုး(၆)ဂၤဖဲယွၤသ့ၣ်သ၀ီ ပယီၤသုး(၃၁၇)ကျိဖးဒိၣ်သုးရ့ၣ်တၢ်လီၢ်ကပၤန့ၣ်အဃိ ပယီၤသုးသံ၀ဲ(၅)ဂၤဒီးမၤန့ၢ်၀ဲကျိ ၃ ခိၣ်အဂ့ၢ်န့ၣ် ယ့တၢ်ပၢၢ်ဆၢသုး(YGF)ကရူၢ် တၢ်ဘိးဘၣ်ရၤလီၤမူဒါခိၣ် စီၤခ့ၣ်သ့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ပယီၤသုး(၆)ဂၤအံၤဖဲလၢအလဲၤဆှၢၦၤကၠိဖိ၀ံၤဟဲက့ၤဒိး၀ဲဒီးသိၣ်လ့ၣ်ယီၢ်(ဆဲးကဲး)သၢခိၣ်လၢကျဲအခါန့ၣ် (YGF)ကရူၢ်အိၣ်ခိးခး၀ဲလၢတၢ်ဘၢၣ်စၢၤကအိၣ်(၅)မံးနံးဃၣ်ဃၣ်အဃိပယီၤသုးသံ၀ဲတဘျီဃီဖဲန့ၣ်(၅)ဂၤဒီး ဘၣ်ဒိ၀ဲနးနးကျံၤကျံၤ(၁)ဂၤအဂ့ၢ်န့ၣ် စီၤခ့ၣ်သ့ၣ် စံး၀ဲဒ်အံၤန့ၣ်လီၤႉ
“ပယီၤသုးလၢအအိၣ်တ့ၢ်တဂၤန့ၣ်နါက့တပူၤဘၣ်အဘၣ်ဒိစ့ၢ်ကီးလီၤႉအတသံဒံးဘၣ်အဃိအက့ၤခးဆၢကဒါတၢ်ႉယဆိမိၣ်အသံဒုကသံလီၤႉအ၀ဲသ့ၣ်သိလ့ၣ်ယီၢ်(ဆဲးကဲး) ခီန့ၣ်ပဒွဲၣ်အူအီၣ်တချုးဘၣ်ႉပထၢချုးန့ၢ်ထဲကျိ (၃) ခိၣ်လီၤႉတၢ်ကဲထီၣ်သးနါက့အိၣ်ဘူးဒီးပယီၤသုးအိၣ်တၢ်လီၢ်မီၤနီၤႉအ၀ဲသ့ၣ်က့ၤခးလီၤကျိဖးဒိၣ်စးထီၣ်လၢဂီၤခီတုၤလၢမုၢ်ထူၣ်ညါ” အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါယနူၤအါရံၤ ၂၀ သီအနံၤန့ၣ်လီၤႉ
တၢ်ကဲထီၣ်သး၀ံၤအလီၢ်ခံပယီၤသုးကျိဖးဒိၣ်လီၢ်အံၤက့ၤခးလီၤကဒါကျိဖးဒိၣ်ဆူတၢ်ကဲထီၣ်သးအလီၢ်အံၤတပယူာ်ဃီဒီးမၤအါထီၣ်အသုးဂံၢ်ဘါအဃိဘၣ်ဂုၤကဒါလီၢ်ခံအဂ့ၢ်န့ၣ် အ၀ဲစံးအါထီၣ်၀ဲန့ၣ်လီၤႉ
“တၢ်ကဲထီၣ်သးန့ၣ်အိၣ်ဘူးဒီးပယီၤသုး(မအတ–၃၁၇)အဃိအ၀ဲသ့ၣ်က့ၤခးလီၤကဒါကျိဖးဒိၣ်တပယူာ်ဃီလီၤႉ ခီဖျိပယီၤသုးနါက့ဟဲအါထီၣ်အဃိပထၢန့ၢ်ကျိချုး(၃)ခိၣ်လီၤဒီးဘၣ်ယိၣ်လၢပၦၤကဘၣ်ဒိဘၣ်ထံးအဃိပဟးထီၣ်ကဒါဖဲန့ၣ်လီၤ”အဂ့ၢ်န့ၣ် စီၤခ့ၣ်သ့ၣ် စံးအါထီၣ်၀ဲန့ၣ်လီၤႉ
ဘၣ်ဃးဒီးတၢ်ဂ့ၢ်ကဲထီၣ်သးအံၤမ့မ့ၢ်ပယီၤသုးတကပၤထုးထီၣ်ပာ်ဖျါ၀ဲတအိၣ်နီတမံၤဒံးဘၣ်န့ၣ်လီၤႉ ဖဲအပူၤကွံာ်လါယနူၤအါရံၤ ၁၈ သီအခါစ့ၢ်ကီး (YGF)ကရူၢ် နုာ်လီၤခး သၤဖၠူၤစယၣ်ကီၢ်ဆၣ်ပူၤ ထ့ဆှူသ၀ီ ပၢၤကီၢ်၀ဲၤလီၢ်အဃိ ပၢၤကီၢ်သံ(၃)ဂၤဒီးဘၣ်ဒိ၀ဲ(၅)ဒံးအဂ့ၢ်န့ၣ် (YGF)ထုးထီၣ်ပာ်ဖျါ၀ဲန့ၣ်လီၤႉ
ဒ်န့ၣ်အသိးဖဲအပူၤကွံာ်လါယနူၤအါရံၤ ၁၁ သီအနံၤစ့ၢ်ကီး လၢတလၢၤကီၢ်စဲၣ် လမဲကီၢ်ဆၣ်အပူၤန့ၣ် ယ့တၢ်ပၢၢ်ဆၢသုး(YGF)ကရူၢ်နုာ်လီၤခး၀ဲ(န့ၣ်ကယ့ၤ)သ၀ီပူၤပၢၤကီၢ်၀ဲၤလီၢ်ဒီးပၢၤကီၢ်တဖၣ်ဃ့ၢ်ထီၣ်ကွံာ်အဃိ နုာ်လီၤဒွဲၣ်အူအီၣ်ကွံာ်၀ဲပၢၤကီၢ်တၢ်သူၣ်ထီၣ်တဖၣ်အဂ့ၢ်န့ၣ်(YGF)ထုးထီၣ်ပာ်ဖျါ၀ဲဒံး၀ဲန့ၣ်လီၤႉ
