လါယနူၤအါရံၤ ၁၆ သီႇ ၂၀၂၃ သီႇ ခ့ၣ်အဲးစံၣ်
လၢကညီကီၢ်စဲၣ် ကီးတရံးကီၢ်ဆၣ် ကြုၢ်တု၀့ၢ်ပူၤန့ၣ် ခီဖျိတၢ်ခးသံ၀ဲ(က၀ီၤဒ့ ၂)ပၢပြးသးၦၢ် အူမၠ့ၣ်အီၤအဃိ ပၢပြးသးၦၢ်လၢအိၣ်၀့ၢ်ခိၣ်၀့ၢ်ဃၢၤဖဲန့ၣ်သ့ၣ်တဖၣ်စ့ၢ်ကီးပျံၤတၢ်ဖုးတၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ကြုၢ်တု၀့ၢ်(က၀ီၤဒ့ ၂)သးၦၢ်အူမၠ့ၣ်အီၤလၢအသးနံၣ်အိၣ်(၆၅)နံၣ်ခိၣ်ဃၢၤအံၤ ဖဲလါယနူၤအါရံၤ ၁၄ သီ မုၢ်ဃ့ၢ်လီၤအဆၢကတီၢ် လၢအကလဲၤထီၣ်မၤဘူၣ်တၢ်လၢ(ကြုၢ်တု)ကစၢၢ်ခိၣ်သီခါဖၠၣ်အဂီၢ်န့ၣ်ဖဲအလဲၤလၢကျဲအခါ ၦၤတဒူၣ်လၢတၢ်တသ့ၣ်ညါအမံၤခးသံကွံာ်အီၤအဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဂၤစံး၀ဲန့ၣ်လီၤႉ
သ၀ီသးၦၢ်လၢအိၣ်ဘူး(ကြုၢ်တု)၀့ၢ်တဂၤစံး၀ဲ“သးၦၢ်တဂၤန့ၣ်မ့ၢ်အမၤမနုၤလဲၣ်တသ့ၣ်ညါဘၣ်ႉပနၢ်ဟူလၢၦၤဟဲခးသံအီၤဒီးဆဲးကဲးႇၦၤခးသံအီၤခါန့ၣ်ၦၤတသံဒိးသံကွၢ်အီၤတၢ်နီတမံၤဘၣ်ခးသံအီၤဒ်န့ၣ်လီၤႉ လီၤပျံၤဒိၣ်မးပနၢ်ဟူတၢ်ဒ်အံၤႉ ကဲသးၦၢ်ဒၢးတဘူၣ်လၢၤဘၣ်ႉလဲၤတဘူၣ်နီတပူၤလၢၤစ့ၢ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
တၢ်ခးသံပၢပြးသးၦၢ်ကဲထီၣ်သး၀ံၤအလီၢ်ခံပယီၤသုးကးတံၢ်ကွံာ်ကျဲအိၣ်ခိးသမံသမိးတၢ်လၢ၀့ၢ်နုာ်လီၤဟးထီၣ်တၢ်လီၢ်တဖၣ်အိၣ်၀ဲဘၣ်ဆၣ် ကတီၢ်ခဲအံၤလီၢ်က၀ီၤကမျၢၢ်ဟးထီၣ်က့ၤလီၤဒ်ညီနုၢ်အသိးလံအဂ့ၢ်န့ၣ် လီၢ်က၀ီၤကမျၢၢ်တဂၤ စံး၀ဲဒ်အံၤန့ၣ်လီၤႉ
“ဖဲတၢ်ခးသံသးၦၢ်တနံၤန့ၣ်ပယီၤသုးအိၣ်ခိးသမံသမိးတၢ်လၢ၀့ၢ်နုာ်လီၤဟးထီၣ်ကျဲကအိၣ်တခီနၣ်ရံၣ်ဃၣ်ဃၣ်ညါႉမ့မ့ၢ်တနံၤညါအံၤဒုၦၤဟးထီၣ်က့ၤလီၤဒ်ညီနုၢ်အသိးလံမီၤနီၤႉပတထံၣ်ၦၤအိၣ်ခိးသမံသမိးတၢ်လၢၤဘၣ်ႉ ကမျၢၢ်လဲၤၦ့ၤအီၣ်တၢ်လံ” အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
ဒ်န့ၣ်အသိး(ကြုၢ်တု)၀့ၢ်ပူၤတၢ်ခးသံ(က၀ီၤဒ့ ၂)သးၦၢ် အူမၠ့ၣ်အီၤ တနံၤဃီအတီၢ်ပူၤန့ၣ် လၢတလၢၤကီၢ်စဲၣ် ကၠဲၣ်ထိၤကီၢ်ဆၣ် မယါခၠီသ၀ီပူၤစ့ၢ်ကီး တၢ်ခးသံသုးမီၤစိရိၤအပၢပြးသးၦၢ် အီၤထိ စ့ၢ်ကီးကဲထီၣ်သးအဂ့ၢ်န့ၣ် သ့ၣ်ညါဘၣ်လၢ ဟီၣ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိအအိၣ်န့ၣ်လီၤႉ
