ကမျၢၢ်ၦၤဃ့ၢ်တၢ်ဒုးလၢအိၣ်မုၢ်ထီၣ်ဟီၣ်က၀ီၤဒူသ၀ီပူၤတဖၣ်တၢ်အီၣ်တၢ်အီလီၤတူာ်ထီၣ်လံ

လါဖ့ၤဘြူၤအါရံၤ ၁၃ သီႇ ၂၀၂၃ နံၣ်ႇ ခ့ၣ်အဲးစံၣ်

လၢတနီသရံၣ်ကီၢ်ခီဒိၣ် ဘျံးဒ၀ဲၢ်ကီၢ်ရ့ၣ် ဒ၀ဲၢ်ကီၢ်ဆၣ် မုၢ်ထီၣ်ဟီၣ်က၀ီၤအပူၤန့ၣ် ခီဖျိပယီၤသုးကးတံၢ်ဃာ်တၢ်စိာ်ထီၣ်စိာ်လီၤဟုသးအံၤယံၤထီၣ်လံအဃိ တကီၢ်ခါအံၤကမျၢၢ်ၦၤဃ့ၢ်တၢ်ဒုးဖိလၢအိၣ် ဟီၣ်က၀ီၤပူၤဖဲန့ၣ်တဖၣ်တၢ်အီၣ်တၢ်အီလီၤတူာ်ထီၣ်၀ဲလံအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

စးထီၣ်ဖဲအပူၤကွံာ်လါအီးကထိဘၢၣ်တုၤလၢတလါအံၤလါဖ့ၤဘြူၤအါရံၤန့ၣ်လၢ(ဒ၀ဲၢ်ကီၢ်ဆၣ်)မုၢ်ထီၣ်ဒူသ၀ီဟီၣ်က၀ီၤအပူၤခီဖျိပယီၤသုးကးတံၢ်ဃာ်တၢ်စိာ်ထီၣ်စိာ်လီၤဟုသးႇတၢ်အီၣ်ဃ့တဖၣ်ဒီးကးတံၢ်ဃာ်ကျဲအံၤန့ၢ်လၢယဲၢ်လါဘျဲၣ်လံအဃိကမျၢၢ်ၦၤဃ့ၢ်တၢ်ဒုးလၢအိၣ်ဟီၣ်က၀ီၤဖဲန့ၣ်အပူၤတဖၣ်ထံၣ်ဘၣ်၀ဲတၢ်အီၣ်တၢ်အီလီၤတူာ်အဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဂၤစံး၀ဲန့ၣ်လီၤႉ

ၦၤလၢမၤစၢၤၦၤဃ့ၢ်တၢ်ဒုးအံၤစံး၀ဲ“လၢမုၢ်ထီၣ်ဟီၣ်က၀ီၤသ၀ီပူၤန့ၣ်ၦၤဃ့ၢ်တၢ်ဒုးအနီၣ်ဂံၢ်ကအိၣ်အဂၤ(၇၀၀၀)ဘျဲၣ်ညါႉတနံၤဘၣ်တနံၤန့ၣ်ၦၤဃ့ၢ်တၢ်ဒုးဖိအနီၣ်ဂံၢ်ဟဲအါထီၣ်ကွ့ၢ်ကွ့ၢ်လီၤႉၦၤနီၣ်ဂံၢ်ဟဲအါထီၣ်လၢအ၀ဲတကပၤနါက့ကးတံၢ်ဃာ်ကျဲ‚စိာ်ထီၣ်စိာ်လီၤတၢ်အီၣ်တၢ်အီဒၢးတန့ၢ်ဘၣ်ႉတချုးဖဲန့ၣ်ဘၣ်န့ၣ်သိလ့ၣ်တီၣ်တၢ်ဖိတၢ်လံၤဖးဒိၣ်နါက့ပယီၤသုးပာ်ပနီၣ်၀ဲမီၤနီၤလၢကဘၣ်စိာ်ၦဲၤထၢၣ်ၦဲၤထၢၣ်ဒ်န့ၣ်အိၣ်မီၤနီၤႉဖဲလီၢ်ခံအံၤလ့ၤတက့ၤတဟ့ၣ်စိာ်၀ဲလၢာ်ဘၣ်ႉခဲအံၤတၢ်အီၣ်တၢ်အီလီၤတူာ်ထီၣ်လံ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

လၢန့ၣ်အမဲာ်ညါလၢဘျံးဒ၀ဲၢ်–ထံခံကျဲန့ၣ်စ့ၢ်ကီးဖဲအပူၤကွံာ်လါယနူၤအါရံၤတုၤတလါအံၤန့ၣ် တၢ်ဒုးကဲထီၣ်၀ဲလၢတၢ်ဒီသဒၢကမျၢၢ်သုးဒီးပယီၤသုးအဘၢၣ်စၢၤတၢ်ဒုးကဲထီၣ်ကအိၣ်လၢအဘျီခံဆံဃၣ်ဃၣ်ညါအဃိ ပယီၤသုးမၤဃံးထီၣ်တၢ်စိာ်ထီၣ်စိာ်လီၤဟုသးလီၤဒ်အံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ခီဖျိပယီၤသုးမၤဃံးထီၣ်တၢ်ဒ်အံၤအဃိဟုသးလၢဟီၣ်က၀ီၤတၢ်ဒီသဒၢကမျၢၢ်သုးပာ်ဖှိၣ်ပာ်ဖှိၣ်ဃာ်၀ဲသ့ၣ်တဖၣ်အံၤ ဟ့ၣ်လီၤဆီၣ်ထွဲမၤစၢၤ၀ဲကမျၢၢ်တဖၣ်အဂ့ၢ်န့ၣ်(Dawei East Forest People’s Defense Force)ဒ၀ဲၢ်–ပကဖ တၢ်ဘိးဘၣ်ရၤလီၤမူဒါခိၣ် ယီၤနံၤ စံး၀ဲန့ၣ်လီၤႉ

အ၀ဲစံး၀ဲလၢ“လၢမုၢ်ထီၣ်ဟီၣ်က၀ီၤ(၀ၣ်ကၠိ)သ၀ီန့ၣ်ပယီၤသုးဒွဲၣ်အူအီၣ်ကမျၢၢ်အဟံၣ်မီၤနီၤႉကမျၢၢ်လၢပယီၤသုးဒွဲၣ်အူအီၣ်အဟံၣ်တဖၣ်န့ၣ်ပမၤစၢၤ၀ဲသ့ၣ်ႉကမျၢၢ်လၢပယီၤသုးဒွဲၣ်အူအီၣ်အဟံၣ်တဖၣ်တနီၤန့ၣ်ဘၣ်လဲၤအိၣ်၀ဲလၢအကျီးပူၤဒ်န့ၣ်လီၤႉအဃိန့ၣ်ဒ်သိးကကဲထီၣ်တၢ်တိစၢၤမၤစၢၤအဂီၢ်ပမၤစၢၤအ၀ဲသ့ၣ်လၢဟုသးဒီးတၢ်အီၣ်တၢ်အီလၢအဂၤတဖၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

တနံၣ်အံၤ(၂၀၂၃)လါယနူၤအါရံၤအတီၢ်ပူၤ လၢတနီသရံၣ်ကီၢ်ခီဒိၣ် ဒ၀ဲၢ်ကီၢ်ဆၣ်အပူၤန့ၣ် ပယီၤသုးဒွဲၣ်အူအီၣ်၀ဲကမျၢၢ်အဟံၣ်(၁၅)ဖျၢၣ်ႇလီလိကီၢ်ဆၣ်ပူၤန့ၣ်(၆)ဖျၢၣ်ဒီးပလီၣ်ကီၢ်ဆၣ်ပူၤန့ၣ်(၁၂)ဖျၢၣ် ခဲလၢာ်ဒွဲၣ်အူအီၣ်၀ဲ(၃၃)ဖျၢၣ်အဂ့ၢ်န့ၣ် သ့ၣ်ညါဘၣ်လၢတနီသရံၣ်ကီၢ်ခီဒိၣ်(Southern Monitor)တၢ်ပာ်ဖျါအပူၤန့ၣ် လီၤႉ