လါဖ့ၤဘြူၤအါရံၤ ၇ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆)ဟီၣ်က၀ီၤ မၠၣ်၀တံၣ်ကလံၤထံးန့ၣ် ဖဲအပူၤကွံာ်လါယနူၤအါရံၤ ၃၁ သီအနံၤ ကညီဒီကလုာ်ဂၢၤသးကရၢ(KNDO)သုးပာ်ဖှိၣ်လဲၤခး ထံကပျၢၤ ပယီၤသုးကလၢၤအံၤလၢ(drone)အဃိ ပယီၤသုးသံ(၄)ဂၤအကျါပၣ်ဃုာ်၀ဲသုးရ့ၣ်(၂)ရ့ၣ် အသုးဒ့ခိၣ်(၂)ဂၤ အဂ့ၢ်န့ၣ် KNDO စံး၀ဲန့ၣ်လီၤႉ
KNDO (သုးရ့ၣ် ၈) ဘံၣ်ဘၢသုးရ့ၣ်ႇကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA (သုးရ့ၣ်–၁၀၃) ဒီး (Federal Wings Drone) သုးပာ်ဖှိၣ်တဖၣ်အံၤ လဲၤခး၀ဲထံကပျၢၤပယီၤသုးခီၣ်သုးရ့ၣ်(ခလရ–၃၂) ဒီး(ခမရ–၅၈၅) အံၤလၢ (drone) ဒီးဖဲန့ၣ်သုးရ့ၣ် (၂) ရ့ၣ်အံၤအသုးဒ့ခိၣ်သံ၀ဲခံဂၤလၢာ်အဂ့ၢ်န့ၣ် KNDO (သုးရ့ၣ်–၈) သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤအဲၣ်မၠးထူ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
အ၀ဲစံး၀ဲလၢ“ဖဲတၢ်ပၢၢ်ဆၢမုၢ်နံၤန့ၣ်ယနီၢ်ကစၢ်တီခိၣ်ရိၣ်မဲပပာ်ဖှိၣ်ထီၣ်သးဒီး KNLA(သုးရ့ၣ်–၁၀၃) ပလဲၤခး အ၀ဲသ့ၣ်မီၤနီၤႉဒုၣ်ဒါန့ၣ်ပဃုထၢ၀ဲလၢခိၣ်နၢ်အိၣ်အလီၢ်အဃိကျိချံလၢအဆိကတၢၢ်တဖျၢၣ်န့ၣ်ပကွံာ်ခိၣ်နၢ်အဒဲဒီး ဖဲန့ၣ်အိၣ်၀ဲသုးဒ့(၂)ဒ့ႇသုးဒ့ခိၣ်ခံဂၤန့ၣ်သံတဘျီဃီဖဲန့ၣ်(၂)ဂၤလၢာ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ
တၢ်လဲၤခးပယီၤသုးဘျီ၀ဲန့ၣ်အပူၤန့ၣ်(ခလရ–၃၂)သုးရ့ၣ် အသုးဒ့ခိၣ် သုးခိၣ်စိ စီၣ်၀့နဲၣ် သံ၀ဲတဘျီဃီဖဲ သုးကလၢၤတၢ်လီၢ်န့ၣ်ဒီး မ့မ့ၢ်(ခမရ–၅၈၅)သုးရ့ၣ် အသုးဒ့ခိၣ် သုးခိၣ်စိ(၀့လ့စိ)ဒီးအၦၤ(၂)ဂၤလၢ အဘၣ်ဒိဘၣ်ထံးနးနးကျံၤကျံၤအံၤန့ၣ်က့ၤသံ၀ဲလၢဂီၤလ့ၤဒုးယၤလူၢ်အဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် စီၤအဲၣ်မၠးထူ စံးအါထီၣ်၀ဲန့ၣ်လီၤႉ
လၢန့ၣ်အမဲာ်ညါဖဲအပူၤကွံာ်(၂၀၂၂)လါမးရှးအခါစ့ၢ်ကီး(KNLA‚KNDO)ဒီးသိၣ်မှံၤသုးပာ်ဖှိၣ်တဖၣ် လဲၤထီၣ်ခး၀ဲထံကပျၢၤပယီၤသုးကလၢၤအံၤဒီးမၤန့ၢ်၀ဲတၢ်လီၢ်တုၤလၢတၢ်ဖီလာ်သုးကလၢၤလူၢ်ညါန့ၣ်လီၤႉ ဖဲန့ၣ်ခီဖျိသုးမီၤစိရိၤဟဲတ့ၢ်လီၤမ့ၣ်ပိၢ်အဃိတၢ်ပၢၢ်ဆၢသုးပာ်ဖှိၣ်ထီၣ်၀ဲသုးကလၢၤအံၤတန့ၢ်၀ဲဘၣ်ဒီးဘၣ်ဂုၤကဒါလီၢ်ခံအဂ့ၢ်န့ၣ် သ့ၣ်ညါဘၣ်န့ၣ်လီၤႉ
