စ့ယိၤၦ့ၤထီၣ်အဃိမၠၣ်၀တံၣ်၀့ၢ်ပူၤကမျၢၢ်တဖၣ်လဲၤထီၣ်ဟးလၢမဲၢ်ဆီး၀့ၢ်ပူၤအိၣ်စှၤဒံး၀ဲ

လါဖ့ၤဘြူၤအါရံၤ ၇ သီႇ ၂၀၂၃ နံၣ်ႇ ခ့ၣ်အဲးစံၣ်

ခီဖျိစ့ယိၤၦ့ၤထီၣ်ဒီးတၢ်လဲၤထီၣ်က့ၤလီၤကျဲတရံးလၢမဲၢ်ဆီးတကပၤဒိၣ်ထီၣ်အါန့ၢ်အပူၤကွံာ်အဃိ မၠၣ်၀တံၣ်၀့ၢ်ပူၤကမျၢၢ်တဖၣ်လဲၤထီၣ်ဟးလိာ်ကွဲႇလဲၤထီၣ်ၦ့ၤတၢ်လၢမဲၢ်ဆီး၀့ၢ်ပူၤစှၤဒံး၀ဲအဂ့ၢ်န့ၣ် ကမျၢၢ်လၢအိၣ်မၠၣ်၀တံၣ်၀့ၢ်ပူၤတဖၣ်စံး၀ဲန့ၣ်လီၤႉ

ဖဲတနံၣ်အံၤ(၂၀၂၃)လါယနူၤအါရံၤ ၁၂ သီအနံၤန့ၣ် တၢ်က့ၤအိၣ်ထီၣ်ကဒါ၀ဲမၠၣ်၀တံၣ်–မဲၢ်ဆီး တၢ်ရ့လိာ်မုာ်လိာ်နီၣ်ဂံၢ်(၁)တိၤအံၤဒီးစးထီၣ်ဖဲန့ၣ်ကမျၢၢ်လၢအိၣ်မၠၣ်၀တံၣ်၀့ၢ်ပူၤတဖၣ် တနံၤန့ၣ်လဲၤထီၣ်က့ၤလီၤ အိၣ်အဂၤ(၁၀၀)တုၤလၢ(၃၀၀)ခိၣ်ဃၢၤဒံးလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ကမျၢၢ်လၢအိၣ်မၠၣ်၀တံၣ်၀့ၢ်ပူၤတဂၤစံး၀ဲ“စ့ယိၤ(၁၀၀)ဘးန့ၣ်န့ၢ်လၢစ့ပယီၤ(၁၀၀၀၀)ဘျဲၣ်ႇ(၂၀၀၀၀)ခိၣ်ဃၢၤလီၤအဃိအကွၣ်ဖးဒိၣ်လံမီၤနီၤႉနကနုာ်လီၤလၢယိၤကီၢ်ပူၤအဂီၢ်တိၤအခိနါက့အၦ့ၤဒိၣ်ထီၣ်ႇသိလ့ၣ်အဘူးအလဲနါက့အၦ့ၤထီၣ်ႉအဃိန့ၣ်နလဲၤနက့ၤအီၣ်ကိၣ်အီၣ်နီမးတပၣ်ဒံးဘၣ်ႇၦ့ၤတၢ်တပၣ်ဒံးဘၣ်န့ၣ်ကလၢာ်လၢ(၅၀၀)ဘးခိၣ်ဃၢၤလံအဃိနမ့လဲၤဒီးနဟံၣ်ဖိဃီဖိတဘျီန့ၣ်နစ့မ့တအိၣ်(၄၀၀၀)ဘးႇ(၅၀၀၀)ဘးဘၣ်ဒုနကလဲၤထီၣ်မဲၢ်ဆီးအဂီၢ်တညီဘၣ်ႉမ့၀ံၤနမ့ဟဲက့ၤလၢကီၢ်ပယီၤတကပၤနါက့ၦၤသမံသမိးနၤလၢအံၤလၢန့ၣ်အဃိၦၤလဲၤထီၣ်လၢမဲၢ်ဆီး၀့ၢ်တအိၣ်အါအါဘၣ်”အဂ့ၢ်န့ၣ်စံး၀ဲန့ၣ်လီၤႉ

လၢန့ၣ်အမဲာ်ညါနကဟးထီၣ်က့ၤလီၤအဂီၢ်နကဘၣ်လဲၤမၤလံာ်လၢကီၢ်ပယီၤ(လ၀က)အအိၣ်ဒီးတနံၤ(မ့တမ့ၢ်)တနွံန့ၣ်လၢာ်၀ဲ(၁၀၀၀)ကၠးအသိးဘၣ်တီၢ်လံာ်လၢမဲၢ်ဆီးတပၤန့ၣ်လၢာ်(၆၀)ဘးႇမ့ဒိးလၢသိလ့ၣ်ဟံၣ်ခီန့ၣ်လၢာ်၀ဲ(၁၀၀)ဘးအဂ့ၢ်န့ၣ် သုးမီၤစိရိၤအၦၤမၤတၢ်ဖိလၢလီၤဘၣ်မူဒါဖဲကီၢ်ပယီၤ(တိၤ)တဂၤစံး၀ဲအသိး သ့ၣ်ညါဘၣ်န့ၣ်လီၤႉ

“လၢမဲၢ်ဆီးန့ၣ်ၦၤလဲၤထီၣ်န့ၢ်ထဲသိလ့ၣ်လၢအလံာ်လဲၢ်အိၣ်လီၤႉသိလ့ၣ်လၢအလံာ်လဲၢ်တအိၣ်ဘၣ်န့ၣ်လဲၤတန့ၢ်ဘၣ်ႉသိလ့ၣ်လၢလံာ်လဲၢ်အိၣ်တဖၣ်နါက့မ့လဲၤထီၣ်န့ၣ်လၢယိၤကီၢ်တပၤန့ၣ်နကဘၣ်မၤ၀ဲတၢ်နုာ်လီၤအခွဲးႇနီသိလ့ၣ်အခွဲးဒီးလံာ်အုၣ်သးတဖၣ်မီၤနီၤႉနလဲၤဟးလိာ်ကွဲမ့တလၢထီၣ်ဟီၣ်က၀ီၤႇမ့တလၢထီၣ်တြဲၤနါက့နဘၣ်ဟ့ၣ်အါထီၣ်ကဒီးကၠီၣ်တဲၣ်သုးတြဲၤအံၤအဃိနကလဲၤထီၣ်လၢမဲၢ်ဆီးအဂီၢ်န့ၣ်ၦၤကညီအဘူးအလဲဒီးသိလ့ၣ်အဘူးအလဲန့ၣ်မ့န့ၢ်လၢ (၆၀၀၀) ဘးမးကဘၣ်ဂီၢ်လီၤ” အဂ့ၢ်န့ၣ် ၦၤနီသိလ့ၣ်ဖိလၢအနီလ့ၢ်ထီၣ်လ့ၢ်လိၤဖဲမၠၣ်၀တံၣ်–မဲၢ်ဆီးတဂၤ စံး၀ဲန့ၣ်လီၤႉ

ခီဖျိပယီၤသုးနုာ်လီၤမၤဒုးယၤတၢ်ဟူးတၢ်ဂဲၤလၢကီၢ်ကၠီၣ်တဲၣ်–ကီၢ်ပယီၤကီၢ်ဆၢဒီးကညီကီၢ်စဲၣ်ဟီၣ်က၀ီၤပူၤအဃိ တၢ်ဒုးကဲထီၣ်၀ဲလၢပယီၤသုးဒီးဟီၣ်က၀ီၤကညီဖီၣ်စုက၀ဲၤသုးပာ်ဖှိၣ်ကရူၢ်အဘၢၣ်စၢၤကိးမုၢ်နံၤဒဲးအဖီခိၣ် ကျဲတၢ်ဟးထီၣ်က့ၤလီၤကီခဲထီၣ်၀ဲအဂ့ၢ်န့ၣ် ၦၤလဲၤက့ၤတၢ်ဖိတဖၣ်စံး၀ဲန့ၣ်လီၤႉ

လၢမၠၣ်၀တံၣ်၀့ၢ်ပူၤပယီၤသုးႇ(BGF)ဒီးၦၤလၢအပာ်ဖှိၣ်မၤသကိးမုၢ်ကျိၤ၀ဲၤကွာ်တဖၣ်အံၤအကျိၣ်စ့တၢ်ဟဲနုာ်ဂ့ၤ၀ဲဘၣ်ဆၣ် မ့မ့ၢ်လီၢ်က၀ီၤကမျၢၢ်ထံဖိကီၢ်ဖိဒီးကမျၢၢ်လၢအိၣ်၀့ၢ်ပူၤတဖၣ်အံၤခီန့ၣ်လၢကဖံးအီၣ်မၤအီၣ်တၢ်အဂီၢ်အကျိၤအကျဲ တအိၣ်အါအါဘၣ်ဒီး ခီဖျိစ့ယိၤႇကီၢ်ပယီၤစ့တဂၢၢ်တကျၢၤဘၣ်အဃိ တၢ်ကီတၢ်ခဲတၢ်ဃံးတၢ်စ့ၤအိၣ်ထီၣ်၀ဲအဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဖၣ်စံး၀ဲန့ၣ်လီၤႉ