ပယီၤသုးအသံစိၣ်လၢအိၣ်ကီးနွဲၣ်သ၀ီပူၤတဖၣ် လီၢ်က၀ီၤကမျၢၢ်ခူၣ်ထီၣ်ဒီးကုၢ်ထီၣ်က့ၤ၀ဲ

လါဖ့ၤဘြူၤအါရံၤ ၅ သီ‚ ၂ဝ၂၃ နံၣ်‚ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်အပူၤ ပယီၤသုးအသံစိၣ်လၢတၢ်ခူၣ်လီၤတ့ၢ်ဃာ်၀ဲဖဲ ကီးနွဲၣ်သ၀ီပူၤတဖၣ်အံၤ လီၢ်က၀ီၤသ၀ီဖိခူၣ်ထီၣ်ဒီးကုၢ်ထီၣ်က့ၤ၀ဲအဂ့ၢ် ကီးနွဲၣ်သ၀ီဖိတဖၣ်စံး၀ဲန့ၣ်လီၤႉ

ဖဲအပူၤကွံာ်လါဒံၣ်စ့ဘၢၣ်အခါ လၢကီးနွဲၣ်သ၀ီဒီးသ၀ီလၢအိၣ်ဘူးဖဲန့ၣ်သ့ၣ်တဖၣ်အပူၤန့ၣ် တၢ်ဒုးကဲထီၣ်၀ဲဒိၣ်ဒိၣ်မုၢ်မုၢ်လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီးပယီၤသုးအဘၢၣ်စၢၤအံၤဒီး ပယီၤသုးလၢအသံတ့ၢ်ဖဲတၢ်ဒုးဘျီ၀ဲန့ၣ်အပူၤတဖၣ်အံၤ လီၢ်က၀ီၤသ၀ီဖိခူၣ်ထီၣ်က့ၤအသံစိၣ်ကုၢ်ထီၣ်က့ၤ၀ဲအဂ့ၢ်န့ၣ် ကီးနွဲၣ်သ၀ီဖိတဂၤစံး၀ဲဒ်အံၤန့ၣ်လီၤႉ

“လၢသ၀ီခၢၣ်သးန့ၣ်ပထံၣ်ၦၤသံစိၣ်အိၣ် (၅) စိၣ်ညါႉပယီၤသုးအစိၣ်ပၣ် (၃) ဂၤႉလၢအဂၤ (၂) ဂၤခီန့ၣ် အဆ့ကၤန့ၣ်တမ့ၢ်သုးကူသုးကၤဘၣ်အဃိပတသ့ၣ်ညါဘၣ်ႉၦၤသံစိၣ်အကျါန့ၣ်ပမ့ကွၢ်လၢအဖံဘၣ်ခိၣ်တၢ်ပနီၣ်န့ၣ်ပၣ်ဃုာ်၀ဲသုးစကီၤဖိဒီးသုးစကီၤမီၤနီၤ” အဂ့ၢ်န့ၣ် စံးဘၣ်ခ့ၣ်အၣ်စံၣ်–ကညီတၢ်ကစီၣ်န့ၣ်လီၤႉ

စးထီၣ်လၢသုးခိးကီၢ်ဆၢ(BGF)နုာ်လီၤအိၣ်လၢကီးနွဲၣ်သ၀ီပူၤ၀ံၤအလီၢ်ခံ လီၢ်က၀ီၤကမျၢၢ်ဟဲက့ၤအိၣ်လၢ သ၀ီပူၤအိၣ်၀ဲဘၣ်ဆၣ် တကီၢ်ခါခဲအံၤကက့ၤအိၣ်လၢလီၤတံၢ်လီၤဆဲးအဂီၢ်တညီဒံးဘၣ်ဒီးက့ၤအိၣ်တဘူၣ်ဒံး၀ဲဘၣ် အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

“ခဲအံၤဒုက့ၤအိၣ်တဘၣ်ဂီၢ်ဒံးဘၣ်ႉကဘၣ်အိၣ်ခိးကနၣ်ကွၢ်ဒံးလီၤႉဒ်သိးသ၀ီကဂ့ၤထီၣ်ကဒါအဂီၢ်န့ၣ်ပကဘၣ်မၤဂ့ၤမၤ၀ါတၢ်ဒံးမီၤနီၤႉမ့ၢ်က့ၤအိၣ်ဘူၣ်ဧါတဘူၣ်ဧါမးတသ့ၣ်ညါဒံးဘၣ်ႉၦၤသံစိၣ်အိၣ်လၢသ၀ီပူၤဒ်အံၤတကြၢးဘၣ်အဃိ သ၀ီၦၤဘၣ်မူဘၣ်ဒါက့ၤမၤဆှဲ၀ဲလီၤ” အဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ

ပယီၤသုးအသံစိၣ်လၢအိၣ်တ့ၢ်တဖၣ်အံၤန့ၣ်မ့ၢ်ၦၤသ့ၣ်တဖၣ်လၢအဘၣ်ဒိဘၣ်ထံးသံတ့ၢ်၀ဲဖဲအပူၤကွံာ်တၢ်ဒုးဆူၣ်ထီၣ်အခါလီၤအဂ့ၢ်န့ၣ် ၦၤလၢအဘူးဒီးတၢ်ပၢၢ်ဆၢသုးကရူၢ်တဂၤ စံး၀ဲဒ်အံၤန့ၣ်လီၤႉ

“ပယီၤသုးအၦၤသံ (၅) ဂၤတကးဘၣ်ႉၦၤသံစိၣ်လၢတၢ်ခူၣ်လီၤ၀ဲဖဲသ၀ီပူၤ (၅) ဂၤအံၤ ကဘၣ်မ့ၢ်အ၀ဲသ့ၣ်က့ၤစိာ်၀ဲတချုးလၢာ်ဘၣ်အဃိခူၣ်လီၤ၀ဲဖဲသ၀ီပူၤအံၤလီၤႉတၢ်ဒုးကဲထီၣ်အခါန့ၣ်ပယီၤသုးသံအိၣ်အါန့ၢ်အ၀ဲအံၤဒံးညါ” အဂ့ၢ်န့ၣ် ၦၤလၢဘူးဒီးတၢ်ပၢၢ်ဆၢကရူၢ်တဂၤစံး၀ဲန့ၣ်လီၤႉ

ဖဲအပူၤကွံာ်လါဒံၣ်စ့ဘၢၣ်(၁၆)သီအနံၤန့ၣ် တၢ်ဒုးကဲထီၣ်၀ဲဒိၣ်ဒိၣ်မုၢ်မုၢ်လၢပယီၤသုးဒီး(KNLA)သုးပာ်ဖှိၣ်အဘၢၣ်စၢၤ ဒီး ခီဖျိပယီၤသုးသံဘၣ်ဒိဘၣ်ထံးအိၣ်အါအဃိအ၀ဲသ့ၣ်ခူၣ်လီၤပာ်အိၣ်တ့ၢ်၀ဲအၦၤသံစိၣ်တဖၣ်ဒ်န့ၣ်လီၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

တၢ်ဒုးကဲထီၣ်ဘျီ၀ဲန့ၣ်အခါကီးနွဲၣ်လီၢ်က၀ီၤကမျၢၢ်လၢအထိဘၣ်ဃ့ၢ်ထီၣ်၀ဲဒီး တုၤလၢခဲအံၤက့ၤအိၣ်လၢသ၀ီပူၤတဘူၣ်ဒံး၀ဲဘၣ်ဘၣ်လဲၤစံၣ်အိၣ်ဆိလၢသ၀ီအဂၤအဖၢမုၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ