လါဖ့ၤဘြူၤအါရံၤ ၆ သီႇ ၂၀၂၃ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ စးထီၣ်(၂၀၂၃)လါယနူၤအါရံၤ ၁ သီ တုၤလၢလါဖ့ၤဘြူၤအါရံၤ ၃ သီအနံၤန့ၣ် ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်အဃိ ကမျၢၢ်သံ(၁၄)ဂၤဒီးဘၣ်ဒိ(၁၁)ဂၤအဂ့ၢ်န့ၣ် မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲဖဲလါယနူၤအါရံၤ ၃ သီအနံၤန့ၣ်လီၤႉ
ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢ(သုးက့ ၅)ဟီၣ်က၀ီၤပူၤအဃိ ကမျၢၢ်သံဘၣ်ဒိဘၣ်ထံးတကးဒံးဘၣ်အမဲာ်ညါ ဟံၣ်ဟးဂီၤ၀ဲ(၅၂)ဖျၢၣ်အကျါန့ၣ်ဟးဂီၤလီၤကရဲအိၣ်အဖျၢၣ် (၂၀)ဘျဲၣ်ညါအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
မ့ၣ်အူအီၣ်ဟံၣ်ဃီတၢ်သူၣ်ထီၣ်တဖၣ်အကျါန့ၣ်ပၣ်ဃုာ်၀ဲတၢ်ဆါဟံၣ်(၄)ဖျၢၣ်ဒီးတၢ်ဘါယွၤသရိာ်(၄)ဖျၢၣ်အဂ့ၢ်န့ၣ် လံာ်တၢ်ထုးထီၣ်ပာ်ဖျါအသိးသ့ၣ်ညါဘၣ်န့ၣ်လီၤႉ
လၢန့ၣ်အမဲာ်ညါလါယနူၤအါရံၤအတီၢ်ပူၤခ့ၣ်အဲၣ်ယူၣ်(သုးက့ ၅)ဟီၣ်က၀ီၤအပူၤန့ၣ် တၢ်ဒုးကဲထီၣ်၀ဲလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA(သုးက့ ၅)ဒီး ပယီၤသုးႇသုးခိးကီၢ်ဆၢ (BGF)အဘၢၣ်စၢၤအိၣ်၀ဲ(၂၀၉)ဘျီအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
ခံခီခံကပၤတၢ်ဒုးကဲထီၣ်လၢတလါအတီၢ်ပူၤန့ၣ်ပယီၤသုးဒီး(BGF)တကပၤသံ၀ဲ(၄၇)ဂၤႇဘၣ်ဒိ၀ဲ(၅၅)ဂၤဒီး ပယီၤသုးသံတဖၣ်အကျါပၣ်ဃုာ်၀ဲသုးဒ့ခိၣ်(၁)ဂၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)စံး၀ဲန့ၣ်လီၤႉ
(၂၀၂၂) တနံၣ်အတီၢ်ပူၤန့ၣ် သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢခ့ၣ်အဲၣ်ယူၣ် (သုးက့ ၅) ဟီၣ်က၀ီၤပူၤ အိၣ်၀ဲ (၃၅) ဘျီဒီးပယီၤသုးခးလီၤကျိဖးဒိၣ်ႇကဘီယူၤဟဲတ့ၢ်လီၤမ့ၣ်ပိၢ်အဃိကမျၢၢ်သံ (၄၄) ဂၤဒီးဘၣ်ဒိ (၉၉) ဂၤအဂ့ၢ်န့ၣ် ခ့ၣ်အဲၣ်ယူၣ် (သုးက့ ၅) မုၢ်တြီၢ်ကီၢ်ရ့ၣ် နံၣ်ကတၢၢ်လံာ်တၢ်ပာ်ဖျါစရီအပူၤပာ်ဖျါ၀ဲန့ၣ်လီၤႉ
ဒ်န့ၣ်အသိးတနံၣ်အတီၢ်ပူၤလၢခ့ၣ်အဲၣ်ယူၣ်(သုးက့ ၅)ဟီၣ်က၀ီၤအပူၤန့ၣ်တၢ်ဒုးကဲထီၣ်၀ဲ(၂ႇ၇၃၇)ဘျီဒီး ဖဲန့ၣ်ပယီၤသုးႇသုးခိးကီၢ်ဆၢ(BGF)သံ၀ဲ(၁ႇ၃၀၇)ဂၤႇဘၣ်ဒိ၀ဲ(၉၇၂)ဂၤဒီး မ့မ့ၢ်(KNLA)တကပၤန့ၣ် ဘၣ်ဟ့ၣ်လီၤကွံာ်အသးသမူလၢထံကီၢ်ဒီးၦၤကလုာ်အဂီၢ်အဂၤ(၅၀)ဒီးဘၣ်ဒိ၀ဲ(၁၈၀)ဂၤအဂ့ၢ်န့ၣ် မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ
