လါမးရှး ၂၇ သီႇ ၂၀၂၃ နံၣ်ႇ ခ့ၣ်အဲးစံၣ်
ကညီဒီကလုာ်ဒံၣ်မိၣ်ကရဲၣ်တ့ၣ်ပၣ်တံၣ်(KNDP)လၢအိၣ်ဆီလီၤသးဖဲဖၣ်အၣ်၀့ၢ်အံၤ ဒ်သိးကန့ၢ်ဘၣ်အခွဲးလၢ အ၀ဲသ့ၣ်ပၣ်တံၣ်အံၤကဆဲးအိၣ်ဆၢထၢၣ်အဂီၢ်န့ၣ် ဖဲလါမးရှး ၂၃ သီအနံၤ အ၀ဲသ့ၣ်ဟဲပတံထီၣ်မၤနီၣ်မၤဃါသးလၢ ကီၢ်စၢဖှိၣ်တၢ်ဃုထၢခီၣ်မံရှၢၣ်အအိၣ်လံအဂ့ၢ်န့ၣ် သုးမီၤစိရိၤအလံာ်တၢ်ကစီၣ်အပူၤပာ်ဖျါ၀ဲန့ၣ်လီၤႉ
ဒ်တၢ်မၤနီၣ်မၤဃါထံရူၢ်ကီၢ်သဲးပၣ်တံၣ်တၢ်ဘျၢသဲစး(၂၅)အသိးန့ၣ် (KNDP)ပၣ်တံၣ်အံၤ ကဘၣ်ဟဲက့ၤမၤနီၣ်မၤဃါ သးဒီးစးထီၣ်မုၢ်နံၤလၢအ၀ဲသ့ၣ်ပာ်ဖျါအပၣ်တံၣ်အမံၤႇအနီၣ်တယၢ်ႇအတၢ်ပနီၣ်(တံဆိပ်)လၢအကသူ၀ဲအံၤတုၤလၢ ၇ သီအတီၢ်ပူၤန့ၣ် က့ၤထီဒါပတံထီၣ်အီၤဆူတၢ်ဃုထၢခီၣ်မံရှၢၣ်အအိၣ်သ့၀ဲအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
KNDP ၦၤပၢၤလီၢ်ဆ့ၣ်နီၤ မါအီၤပၠံၤစိ စံး၀ဲလၢ“တၢ်လၢၦၤကညီန့ၣ်ကြၢးအိၣ်၀ဲဒီးအပၣ်တံၣ်အဃိ ပက့ၤမၤနီၣ်မၤဃါ ကဒါက့ၤအီၤဒ်န့ၣ်လီၤႉဒ်သိးပဒိၣ်ထီၣ်တဖုဂ့ၤတဖုဂ့ၤန့ၣ်ကညီပၣ်တံၣ်ကဘၣ်အိၣ်၀ဲလီၤႉ ခီဖျိၦၤကညီန့ၣ်အိၣ်ဒီး အစုက၀ဲၤကရူၢ်ကရၢအဃိန့ၣ်ၦၤဟဲမၤနါစိၤၦၤတသ့ဘၣ်မီၤနီၤႉဒ်န့ၣ်အသိးလီၤလၢထံရူၢ်ကီၢ်သဲးတကပၤစ့ၢ်ကီးလၢကညီကလုာ်အဂီၢ်န့ၣ်ဒ်သိးၦၤကတိၤတၢ်ပၢကအိၣ်အဂီၢ်ပပာ်လီၤ၀ဲပၣ်တံၣ်အံၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါမးရှး ၂၅ သီအခါန့ၣ်လီၤႉ
ဖဲအပူၤကွံာ်လါယနူၤအါရံၤ ၂၆ သီအခါန့ၣ် သုးမီၤစိရိၤဆီတလဲက့ၤ၀ဲထံရူၢ်ကီၢ်သဲးပၣ်တံၣ်အတၢ်မၤနီၣ်မၤဃါ တၢ်ဘၢသဲစးအံၤ၀ံၤလီၢ်ခံ လၢအသီ(၆၀)အတီၢ်ပူၤ ထံရူၢ်ကီၢ်သဲးပၣ်တံၣ်လၢအဲၣ်ဒိအိၣ်ဆၢထၢၣ်ဒံးသ့ၣ်တဖၣ် တလါအံၤလါမးရှး ၂၈ သီလီၢ်ခံကတၢၢ် ကဘၣ်ဟဲမၤနီၣ်မၤဃါသးလၢတၢ်ဃုထၢခီၣ်မံရှၢၣ်အအိၣ်အဂ့ၢ်န့ၣ် ခီၣ်မံရှၢၣ်လံာ်တၢ်ပာ်ဖျါအသိးသ့ၣ်ညါဘၣ်န့ၣ်လီၤႉ
စီၤဖုၣ်ယီၤဟဲလၢဟူးဂဲၤဖံးလၢကညီဒီကလုာ်ထံရူၢ်ကီၢ်သဲးဂ့ၢ်၀ီတဂၤစံး၀ဲလၢ“ကညီပၣ်တံၣ်လၢအအိၣ်ဆၢထၢၣ်တဲာ်တဲာ်ဖျုဖျုလၢပ၀ဲကညီဒီတကလုာ်အဂီၢ်န့ၣ်ပလိၣ်ဘၣ်၀ဲဒၣ်လီၤႉဆၢကတီၢ်ဖဲသုးမီၤစိရိၤဆံၣ်တံၢ်မၤနၢၤမၤအၢမၤသီၦၤဒီတကလုာ်အံၤအကတီၢ်ပူၤအံၤန့ၣ်ပမ့နုာ်လီၤပၣ်ဃုာ်လၢအ၀ဲသ့ၣ်ကမၤတၢ်ဃုထၢအပူၤအံၤန့ၣ်လီၤဂာ်ဒ်သိးပသ့ၣ်ညါပာ်ပနီၣ်အ၀ဲသ့ၣ်လီၤႉသူအီၣ်ကညီအမံၤဒီးလၢကညီအတၢ်ဘၣ်ဘျုးအဂီၢ်အမဲာ်ညါန့ၣ်ကွၢ်ဒၣ်ထဲလၢအ၀ဲသ့ၣ်မုၢ်ကျိၤ ၀ဲၤကွာ်အဂီၢ်ဒီးမ့နုာ်လီၤ၀ဲဒၣ်တၢ်ဃုထၢဒုလီၤသးဘၣ်ဒိဒိၣ်မးလီၤ”အဂ့ၢ်န့ၣ် ပဲာ်ထံနီၤဖးစံး၀ဲန့ၣ်လီၤႉ
ဖဲအပူၤကွံာ်(၂၀၂၀)တၢ်ဃုထၢအခါန့ၣ် ကညီဒီကလုာ်ဒံၣ်မိၣ်ကရဲၣ်တ့ၣ်ပၣ်တံၣ်အပတြီာ်ခၢၣ်စးတဖၣ် နုာ်လီၤဒိးတပြၢသးအိၣ်၀ဲဘၣ်ဆၣ်တမၤနၢၤ၀ဲတၢ်လၢတၢ်လီၢ်နီတတီၤဘၣ်န့ၣ်လီၤႉဒ်န့ၣ်အသိးတၢ်ဃုထၢလၢ သုးမီၤစိရိၤကတီခိၣ်ရိၣ်မဲမၤ၀ဲအံၤစ့ၢ်ကီး(KNDP)ပၣ်တံၣ်အံၤကနုာ်လီၤဒိးတပြၢသးလၢကီၢ်စဲၣ်အပတီၢ်လီၤအဂ့ၢ်န့ၣ် သ့ၣ်ညါဘၣ်လၢပၣ်တံၣ်ၦၤဘၣ်မူဘၣ်ဒါတဖၣ်အအိၣ်န့ၣ်လီၤႉ
ဖျိၤ–စှီၤဒံၣ်မိၣ်ကရဲၣ်တ့ၣ်ပၣ်တံၣ်(PSDP)ဒီးကညီဒီကလုာ်ဒံၣ်မိၣ်ကရဲၣ်တ့ၣ်ပၣ်တံၣ်(KNDP)လၢအိၣ်ဆီလီၤသးဖဲ (ကညီကီၢ်စဲၣ်)ပၣ်တံၣ်၀ဲၤလီၢ်ခိၣ်သ့ၣ်တဖၣ်အံၤ လၢအ၀ဲသ့ၣ်ကက့ၤသူၣ်ထီၣ်ကဒါအ၀ဲသ့ၣ်ပၣ်တံၣ်အဂီၢ်န့ၣ် လဲၤမၤနီၣ်မၤဃါအသးလၢတၢ်ဃုထၢခီၣ်မံရှၢၣ်အအိၣ်လံန့ၣ်လီၤႉ
ကညီကမျၢၢ်ပၣ်တံၣ်(KPP)လၢအိၣ်ဆီလီၤသးဖဲ၀့ၢ်တကူၣ်ကီၢ်ခီဒိၣ်အံၤစ့ၢ်ကီးဘၣ်ဃးအ၀ဲသ့ၣ်ပၣ်တံၣ်ကက့ၤမၤနီၣ်မၤဃါသးတၢ်ဂ့ၢ်အံၤအ၀ဲသ့ၣ်ပၣ်တံၣ်ဖိတဖၣ်ပာ်ဂၢၢ်ပာ်ကျၢၤ၀ဲတန့ၢ်ဒံးဘၣ်ဘၣ်ဆၣ်မ့မ့ၢ်လၢပၣ်တံၣ်ၦၤပၢၤလီၢ်ဆ့ၣ်နီၤ(စီၤထိအီၤမၠ့ၣ်)ခီန့ၣ်ဟံးထီၣ်ဖီၣ်ထီၣ်၀ဲသုးမီၤစိရိၤ(ကီၢ်စၢဖှိၣ်)အပတီၢ်လီၢ်လၤလံအလီၢ်အဃိအ၀ဲသ့ၣ်န့ၣ်တၢ်အိၣ်သးအိၣ်လၢကမၤနီၣ်မၤဃါအပၣ်တံၣ်အဂ့ၢ်န့ၣ် ၦၤလၢဃုသ့ၣ်ညါကညီထံရူၢ်ကီၢ်သဲးဂ့ၢ်၀ီတဖၣ် ပဲာ်ထံနီၤဖးစံး၀ဲန့ၣ်လီၤႉ
မ့မ့ၢ်ကညီဒီကလုာ်ပၣ်တံၣ်(KNP)လၢအိၣ်ဆီလီၤသးဖဲအ့ၣ်ယၣ်၀တံၣ်ဒီး၀့ၢ်တကူၣ်တဖၣ်အံၤစ့ၢ်ကီး ဘၣ်ခးတၢ်မၤနီၣ်မၤဃါပၣ်တံၣ်တၢ်ဂ့ၢ်အံၤန့ၣ်အ၀ဲသ့ၣ်ထုးထီၣ်ပာ်ဖျါ၀ဲတအိၣ်နီတမံၤဒံးဘၣ်န့ၣ်လီၤႉ
