မၠၣ်၀တံၣ်‚ ကြုၢ်တု တၢ်ဒုးကဲထီၣ်အခါန့ၣ် ကမျၢၢ်သံဘၣ်ဒိဘၣ်ထံးအိၣ်

လါမးရှး ၂၆ သီႇ ၂၀၂၃ နံၣ်ႇ ခ့ၣ်အဲးစံၣ်

ဖဲမဟါအနံၤလၢကညီကီၢ်စဲၣ် မၠၣ်၀တံၣ်‚ ကြုၢ်တု၀့ၢ်တကပၤန့ၣ် တၢ်ဒုးကဲထီၣ်၀ဲလၢပယီၤသုးဒီး တၢ်ပၢၢ်ဆၢ သုးပာ်ဖှိၣ်ကရူၢ်အဘၢၣ်စၢၤဒီးတၢ်ဒုးကဲထီၣ်ဘျီ၀ဲန့ၣ်အပူၤကမျၢၢ်သံဘၣ်ဒိဘၣ်ထံးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲလါမးရှး ၂၅ သီ ဂီၤခီ ၉ နၣ်ရံၣ်ဃၣ်ဃၣ်အဆၢကတီၢ်န့ၣ် သုးမီၤစိရိၤကဘီယူၤဒီးပျီပူၤပယီၤသုးရ့ၣ်(၂)ဒူၣ် ခးလီၤကျိဖးဒိၣ်ဆူကြုၢ်တု၀့ၣ်ခိၣ်၀့ၢ်ဃၢၤအဃိသးစၢ်သံ၀ဲ(၂)ဂၤဒီးဘၣ်ဒိ(၃)ဂၤအကျါပၣ်ဃုာ်၀ဲဖိသၣ်တဂၤ အဂ့ၢ်န့ၣ် ကြုၢ်တုလီၢ်က၀ီၤကမျၢၢ်စံး၀ဲန့ၣ်လီၤႉ

“ကဘၣ်ဖဲဂီၤခီ ၉ နၣ်ရံၣ်န့ၣ်ကဘီယူၤဟဲဆှၣ်တၢ်ႉမ့၀ံၤခးလီၤတၢ်အဃိလၢ(တောင်ကရင်)တကပၤန့ၣ် ၦၤဖိသၣ်တဂၤဒီးဖံသးၦၢ်တဂၤဘၣ်ဒိ‚လၢ(မြောက်ကရင်)တကပၤခီန့ၣ်ၦၤဘၣ်ဒိတဂၤမီၤနီၤႉလၢကြုၢ်တုပၢၤကီၢ်၀ဲၤလီၢ်ကပၤခီန့ၣ်ၦၤသးစၢ်သံတဂၤဒီးလၢကြုၢ်တုကျဲတကပၤန့ၣ်သးစၢ်သံတဂၤလီၤႉပယီၤသုး(၅၄၅/၅၄၆)သုးရ့ၣ်ခံဒူၣ်အံၤခးလီၤကျိဖးဒိၣ်ႇကဘီယူၤစ့ၢ်ကီးဟဲတ့ၢ်လီၤမ့ၣ်ပိၢ်အဃိဘၣ်၀ဲဒၣ်ၦၤဟံၣ်ၦၤဃီၦၤဟံၣ်လီၤပှီၢ်”အဂ့ၢ်န့ၣ် (တောင်ကရင်)ကမျၢၢ်တဂၤ စံး၀ဲန့ၣ်လီၤႉ

ဖဲမဟါဂီၤခီအဆၢတကီၢ် ခီဖျိခံခီခံကပၤအဘၢၣ်စၢၤတၢ်ဒုးကဲထီၣ်လၢမၠၣ်၀တံၣ်–ကီးတရံးအ့ရှါကျဲႇ ကြုၢ်တု၀့ၢ်ချၢတၢ်လီၢ်သ့ၣ်တဖၣ်အဃိ (KNLA)သုးပာ်ဖှိၣ်ကရူၢ် (ကျားဖြူ)သုးကျိၤ သုးကျိၤခိၣ် သုးခိၣ်ကၠီၤသဲၣ် ထုးထီၣ်ဘိးရၤလီၤလံာ်လၢမၠၣ်၀တံၣ်–ကြုၢ်တု၀့ၢ်န့ၣ်ခံခီခံကပၤဒုးယၤဂ့ၢ်၀ီႇတၢ်ဘံၣ်တၢ်ဘၢတၢ်အိၣ်သးဘံဘူအဃိ ကမျၢၢ်တဖၣ်တဘၣ်ဟးထီၣ်က့ၤလီၤလၢကျဲအံၤဘၣ်အသိး မၠၣ်၀တံၣ်၀့ၢ်ပူၤစ့ၢ်ကီးပယီၤသုးထုးထီၣ်၀ဲဂ့ၢ်ဂီၢ်အူ (မၤရှဲၤလီ)လၢစးထီၣ်ဟါခီ ၄ နၣ်ရံၣ် တုၤလၢဂီၤခီ ၁၀ တဘၣ်ဟးထီၣ်တၢ်ချၢဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

တကီၢ်ခါခဲအံၤလၢကြုၢ်တု၀့ၢ်ပူၤဒီး၀့ၢ်ချၢသ၀ီချၢတၢ်လီၢ်သ့ၣ်တဖၣ်တၢ်ဒုးဆဲးကဲထီၣ်ဒံး၀ဲဒီး ကြုၢ်တုက၀ီၤဒ့ဖိတကးဒံးဘၣ်အမဲာ်ညါကါနံၤသ၀ီႇညီၣ်ယ့ၣ်သၤႇသယဲၣ်တီသ၀ီဖိဒီး ကြုၢ်တုႇ ခၠႇ(ချောင်းဖျား)ႇတီၤကယ့ၤႇမၠီၣ်ကယ့ၤသ၀ီ လီၢ်က၀ီၤကမျၢၢ်တဖၣ် ဘၣ်ဃ့ၢ်ထီၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

တၢ်ဒုးကဲထီၣ်ဘျီ၀ဲအံၤအပူၤတၢ်ကစီၣ်ဟူထီၣ်သါလီၤလၢ(KNLA)တီခိၣ်ရိၣ်မဲတၢ်ပၢၢ်ဆၢသုးပာ်ဖှိၣ်ကရူၢ် နုာ်လီၤက၀ီၤ၀ဲကြုၢ်တုပၢၤကီၢ်၀ဲၤလီၢ်ဒီးထီၣ်မၤန့ၢ်၀ဲပၢၤကီၢ်၀ဲၤလီၢ်အံၤဘၣ်ဆၣ် မ့မ့ၢ်ပခ့ၣ်အဲးစံၣ်–ကညီတၢ်ကစီၣ် ၀ဲၤလီၢ်ခိၣ်သ့ၣ်တကပၤခီန့ၣ် ပာ်ဂၢၢ်ပာ်ကျၢၤအီၤလီၤလီၤဆီဆီတန့ၢ်ဒံး၀ဲဘၣ်န့ၣ်လီၤႉ