(ရေတာရှည်)ကီၢ်ဆၣ်ပူၤ ပယီၤသုးခးလီၤကျိဖးဒိၣ်အဃိ ကမျၢၢ်ဘၣ်ဃ့ၢ်ထီၣ်

လါမးရှး ၂၆ သီႇ ၂၀၂၃ နံၣ်ႇ ခ့ၣ်အဲးစံၣ်

လၢပကိကီၢ်ခီဒိၣ် (ရေတာရှည်)ကီၢ်ဆၣ် (ဆွာမ)ကရူၢ်အပူၤ တၢ်ဒုးကဲထီၣ်၀ဲလၢပယီၤသုးဒီး ဟီၣ်က၀ီၤတၢ်ဒီသဒၢသုးအဘၢၣ်စၢၤဒီး ခီဖျိပယီၤသုးက့ၤလီၤစၢၤကဒါကျိဖးဒိၣ်အဃိ လီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤၦၤဟ့ၣ်တၢ်ကစီၣ်ဖိတဖၣ်အအိၣ်န့ၣ်လီၤႉ

ဖဲအပူၤကွံာ်လါမးရှး ၁၇ သီအနံၤ ပယီၤသုးလၢအဟဲနုာ်လီၤလၢ(ဆွာမ)သ၀ီႇ(ရွာသစ်)သ၀ီပူၤတဖၣ်အံၤဒီး တီအူတၢ်ဒီသဒၢကမျၢၢ်သုးပာ်ဖှိၣ်အဘၢၣ်စၢၤတၢ်ခးလိာ်သးကဲထီၣ်၀ဲဒီး ပယီၤသုးလၢအိၣ်(ဆွာ)၀့ၢ်ပူၤတဖၣ်အံၤ ခးလီၤကျိဖးဒိၣ်ဆူ(ရေတာရှည်)ကီၢ်ဆၣ် ဒူသ၀ီတဖၣ်အပူၤအဂ့ၢ်န့ၣ် ပကိကီၢ်ဒိၣ်(Bagon Region PDF) ထုးထီၣ်ပာ်ဖျါ၀ဲဖဲလါမးရှး ၂၃ သီအနံၤ န့ၣ်လီၤႉ

တၢ်လီၢ်လၢတၢ်ဒုးကဲထီၣ်အံၤမ့ၢ်၀ဲဒၣ်သၣ်တီၣ်ကလံၤစိး(ဟီၣ်က၀ီၤလီၤဆီ)တၢ်ဒီသဒၢသုး(NTDF)ဒိၣ်စိ၀ဲ ဟီၣ်က၀ီၤဒီးခီဖျိပယီၤသုးခးလီၤကျိဖးဒိၣ်အဃိ(စစ်တောင်း)ကျိမုၢ်ထီၣ်၀ၢ်ခီဟံၣ်ခိၣ်အဖျၢၣ်(၆၀၀)ဃၣ်ဃၣ် ဘၣ်ဃ့ၢ်ထီၣ်၀ဲဒီးတုၤလၢခဲအံၤဘၣ်ဃ့ၢ်ဒံး၀ဲအဖၢမုၢ်အဂ့ၢ်န့ၣ် (NTDF)တၢ်ဘိးဘၣ်ရၤလီၤမူဒါခိၣ် အူမိၣ်စ့ၣ် (ဦးမုတ်ဆိတ်)စံး၀ဲန့ၣ်လီၤႉ

အ၀ဲစံး၀ဲလၢ“လၢမုၢ်နၤခီန့ၣ်ပယီၤသုးလီၤကျိဖးဒိၣ်ဒံးအဃိခဲအံၤၦၤကမျၢၢ်တဖၣ်န့ၣ်က့ၤအိၣ်လၢဟံၣ်တဘူၣ်ဒံးဘၣ်ႉဘၣ်ဟးစံၣ်လၢတၢ်လီၢ်အဂၤအဖၢမုၢ်လီၤႉကျိဖးဒိၣ်လီၤတဲာ်လၢ(ရွာသစ်)သ၀ီပူၤနါက့ဘၣ်ၦၤကညီတအိၣ်ဘၣ်ႉ ဘၣ်ဆၣ်တၢ်သူၣ်ထီၣ်ဒုဟးဂီၤအိၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

လၢန့ၣ်အမဲာ်ညါခီဖျိတၢ်ဒုးကဲထီၣ်လၢ(ရေတာရှည်)ကီၢ်ဆၣ်ပူၤအဃိလီၢ်က၀ီၤကမျၢၢ်ဃ့ၢ်ထီၣ်လၢ(သၣ်တီၣ်)ကလံၤစိးဟီၣ်က၀ီၤပူၤအိၣ်၀ဲဒီးတကီၢ်ခါခဲအံၤသၣ်တီၣ်သလံၤစိးန့ၣ်ၦၤဃ့ၢ်မှံဟးဖျိးအနီၣ်ဂံၢ်အိၣ်၀ဲ(၃၀၀၀)ဘျဲၣ်လံအဃိလၢၦၤဃ့ၢ်မှံဟးဖျိးသ့ၣ်တဖၣ်အံၤအဂီၢ်လိၣ်ဘၣ်၀ဲကသံၣ်ကသီဒီးတၢ်အီၣ်တၢ်အီတဖၣ်အဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ

ဒ်န့ၣ်အသိးခီဖျိပယီၤသုးခးလီၤကျိးဖးဒိၣ်ဆူ(စစ်တောင်း)ကျိ မုၢ်ထီၣ် ဒူသ၀ီပူၤကိးမုၢ်နံၤဒဲးအဃိ လီၢ်က၀ီၤကမျၢၢ်တဖၣ်ကဟးထီၣ်က့ၤလီၤလၢတၢ်ပလီၢ်ပဒီပူၤအဂ့ၢ်န့ၣ် (NTDF)ထုးထီၣ်ပာ်ဖျါ၀ဲဖဲလါမးရှး ၂၃ သီ အနံၤန့ၣ်လီၤႉ

ဖဲအပူၤကွံာ်လါမးရှး ၁၇ သီအနံၤ တၢ်ဒုးကဲထီၣ်လၢပယီၤသုးဒီးတၢ်ဒီသဒၢသုးကရူၢ်အဘၢၣ်စၢၤဘျီ၀ဲန့ၣ်အပူၤန့ၣ် ပယီၤသုးသံကအိၣ်အဂၤ(၁၀)ဃၣ်ဃၣ်ညါဒီးမ့မ့ၢ်တၢ်ဒီသဒၢသုးတကပၤဘၣ်ဒိ၀ဲဒၣ်(၃)ဂၤအဂ့ၢ်န့ၣ် ဟီၣ်က၀ီၤတၢ်ဒီသဒၢကရူၢ်စံး၀ဲန့ၣ်လီၤႉ