လါမ့ၤ ၃၀ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၂)တၢ်ပၢဟီၣ်က၀ီၤ တီအူကီၢ်ရ့ၣ်အပူၤ စးထီၣ်ဖဲအပူၤကွံာ်တနွံ အခါန့ၣ် ပယီၤသုးခးလီၤကျိးဖဒိၣ်တပယူာ်ဃီလၢသၣ်တီၣ်၀့ၢ်(၁၃)မဲၤပူၤဒီး ဖဲလါမ့ၤ ၂၉ သီ ဟါခီ ၈ နၣ်ရံၣ်ဃၣ်ဃၣ် အဆၢကတီၢ် ခီဖျိကျိဖးဒိၣ်လီၤတဲာ်ပိၢ်ဖးထီၣ်လၢလ့ၣ်သိၤကျဲဖးဒ့ကပၤ (ငွ့ၤတီၤကလ့)သ၀ီပူၤအဃိ သ၀ီတၢ်ဟ့ၣ်ကသံၣ်ဒၢးဟးဂီၤ၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ် န့ၣ်လီၤႉ
ဖဲလါမ့ၤ ၂၉ သီ ဟါခီ ၄ နၣ်ရံၣ်ဃၣ်ဃၣ်အဆၢကတီၢ်န့ၣ် တၢ်ဒုးကဲထီၣ်၀ဲလၢသၣ်တီၣ်ပယီၤသုးဒီးတၢ်ပၢၢ်ဆၢကရူၢ် အဘၢၣ်စၢၤ၀ံၤလီၢ်ခံ သၣ်တီၣ်ကၠံမၠိၣ်ဟီ(ဘယ့ၣ်နီၤ)ပယီၤသုးကလၢၤခးလီၤစၢၤကျိဖးဒိၣ်ကအိၣ်အဖျၢၣ်(၁၀)ဃၣ်ဃၣ် ညါဒီးကျိဖးဒိၣ်အံၤလီၤတဲာ်ပိၢ်ဖးထီၣ်၀ဲလၢသၣ်တီၣ်(၁၃)မဲၤဒီးပၠါစခါကပၤ ငွ့ၤတီၤကလ့သ၀ီပူၤအဃိ တၢ်ဟ့ၣ်ကသံၣ်ဒၢးဟးဂီၤ၀ဲအဂ့ၢ်န့ၣ် ကမျၢၢ်ပိာ်မုၣ်လၢအိၣ်၀့ၢ်ပူၤတဂၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ယဲၢ်နၣ်ရံၣ်မ့ဘၣ်ဘျီန့ၣ်ကသံၣ်ဒၢးပံးလီၤႉကျိဖးဒိၣ်လီၤတဲာ်န့ၣ်ကအိၣ်လၢ(၈)နၣ်ရံၣ်လံအဃိ ၦၤတအိၣ်နီတဂၤလၢၤဘၣ်အဃိၦၤဘၣ်ဒိဘၣ်ထံးတအိၣ်ဘၣ်ႉဖဲအပူၤကွံာ်တနွံအခါန့ၣ်တၢ်ဒုးကဲထီၣ်ဒံးဖဲ(၁၃)မဲၤန့ၣ်ဒံးႉ ဖဲမဟါဟါခီ ၄ နၣ်ရံၣ်အခါနါက့ခးလိာ်သးတုၤလၢမုၢ်နၤညါႉပနၢ်ဟူလၢ(PDF)လဲၤခးသၣ်တီၣ်ပၢၤကီၢ်၀ဲၤလီၢ်လၢဒြိမီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲတနံၤအံၤလါမ့ၤ ၃၀ သီအနံၤန့ၣ်လီၤႉ
တၢ်ခးလိာ်သးကဲထီၣ်ဖဲလါမ့ၤလီၢ်ခံကတၢၢ်တနွံအံၤအတီၢ်ပူၤန့ၣ်သၣ်တီၣ်(၁၃)မဲၤက၀ီၤဒ့ပူၤကမျၢၢ်အဟံၣ်အဃီတနီၤဟးဂူာ်ဟးဂီၤ၀ဲအိၣ်ဘၣ်ဆၣ်ဟံၣ်ဟးဂီၤအနီၣ်ဂံၢ်နီၣ်ဒွးခီန့ၣ်တသ့ၣ်ညါလီၤတံၢ်လီၤဆဲးဒံးဘၣ်အဂ့ၢ်န့ၣ် ကမျၢၢ်ပိာ်မုၣ်တဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ
ဒ်န့ၣ်အသိးစးထီၣ်ဖဲအပူၤကွံာ်လါအ့ဖြ့ၣ်လီၢ်ခံကတၢၢ်တနွံတုၤလၢခဲအံၤတစုန့ၣ်ပယီၤသုးခးလီၤကျိဖးဒိၣ်လၢသၣ်တီၣ်၀့ၢ်ပူၤဟဲအါထီၣ်၀ဲအသိးလၢမုၢ်နၤခီၦၤမံအခါစ့ၢ်ကီးပယီၤသုးခးလီၤကျိဖးဒိၣ်ကျိဖိသ့ၣ်တဖၣ်အဃိကမျၢၢ်ထံဖိကီၢ်ဖိတဖၣ်ဘၣ်အိၣ်လၢတၢ်ပျံၤတၢ်ဖုးတၢ်ဘၣ်ယိၣ်ဘၣ်ဘှီအပူၤအဂ့ၢ်န့ၣ် လီၢ်က၀ီၤကမျၢၢ်ပိာ်မုၣ်လၢအဂၤတဂၤစ့ၢ်ကီး စံး၀ဲန့ၣ်လီၤႉ
အ၀ဲစံး၀ဲလၢ“ဖဲမဟါစ့ၢ်ကီးဘယ့ၣ်နီၤပယီၤသုးကလၢၤခးလီၤစၢၤကျိဖးဒိၣ်မီၤနီၤႉတဘျီတခီၣ်အ၀ဲသ့ၣ်မ့ထံၣ်ၦၤဒဲပူၤမ့ၣ်အူမ့ကပီၤန့ၣ်ခးစိ၀ဲဒီးကျိဖိအိၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲတနံၤအံၤလါမ့ၤ ၃၀ သီအခါန့ၣ်လီၤႉ
ဒ်န့ၣ်အသိးဖဲအပူၤကွံာ်လါမ့ၤ ၁၂ သီအခါစ့ၢ်ကီး ခီဖျိပယီၤသုးခးလီၤကျိဖးဒိၣ်အဃိ သၣ်တီၣ်၀့ၢ်ပူၤ(က၀ီၤဒ့ ၃) Sunday School ကၠိတၢ်ဒူၣ်ကပၤဟးဂီၤ၀ဲဒီးအခိၣ်ဒုးလီၤၦီၢ်၀ဲဒၣ်အဂ့ၢ်န့ၣ် သ့ၣ်ညါဘၣ်လၢသၣ်တီၣ်၀့ၢ်ပူၤ ကမျၢၢ်တဖၣ်အအိၣ် န့ၣ်လီၤႉ
