Home Hotnews ကဘီယူၤဟဲတ့ၢ်လီၤမ့ၣ်ပိၢ်အဃိနၣ်သၤကွ့၀့ၢ်ပူၤတၢ်ဆါဟံၣ်ဒီးဟံၣ်ဟးဂီၤႇကမျၢၢ်ဃ့ၢ်ထီၣ်တကလးဘျဲၣ်

ကဘီယူၤဟဲတ့ၢ်လီၤမ့ၣ်ပိၢ်အဃိနၣ်သၤကွ့၀့ၢ်ပူၤတၢ်ဆါဟံၣ်ဒီးဟံၣ်ဟးဂီၤႇကမျၢၢ်ဃ့ၢ်ထီၣ်တကလးဘျဲၣ်

216
0
Photo-CJ

လါယူၤ ၇ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)ဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ်အပူၤ ဖဲလါယူၤ ၆ သီ ဂီၤခီအဆၢ ကတီၢ် ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢနၣ်သၤကွ့၀့ၢ်ပူၤအဃိ တၢ်ဆါဟံၣ်ဒီးဟံၣ်ဟးဂီၤ၀ဲတနီၤဒီး ကမျၢၢ်တကလးဘျဲၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤ ဂံၢ်ခီၣ်ထံးၦၤဟ့ၣ်တၢ်ကစီၣ်ဖိအအိၣ်န့ၣ်လီၤႉ

ဖဲလါယူၤ ၆ သီ ဂီၤခီ ၄ နၣ်ရံၣ်ဃၣ်ဃၣ်အဆၢကတီၢ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် နုာ်လီၤခး၀ဲပယီၤသုးကလၢၤဒီးနၣ်သၤကွ့၀့ၢ်ပၢၤကီၢ်၀ဲၤလီၢ်ဖဲ(ရေတွင်းကုန်းကြီး)ကပၤအံၤကဲထီၣ်၀ံၤလီၢ်ခံ ခီဖျိသုးမီၤစိရိၤကဘီယူၤဟဲတ့ၢ်လီၤကဒါမ့ၣ်ပိၢ်လၢနၣ်သၤကွ့ပၢၤကီၢ်၀ဲၤလီၢ်ကပိၤကပၤအဃိ တၢ်ဟးဂူာ်ဟးဂီၤအိၣ်ထီၣ်၀ဲဒ်အံၤလီၤအဂ့ၢ်န့ၣ် လီၢ်က၀ီၤကမျၢၢ်တဂၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“ဖဲဂီၤခီ ၄ နၣ်ရံၣ်အခါန့ၣ် ကဘီယူၤဒြိဟဲတ့ၢ်လီၤမ့ၣ်ပိၢ်တဖျၢၣ်ဘျီတၢ်ဒုးစးထီၣ်ကဲထီၣ်ဖဲန့ၣ်လီၤႉ တၢ်ခးလိာ်သးကဲထီၣ်၀ဲဒၣ်ဖဲတိၤကပၤပၢၤကီၢ်၀ဲၤလီၢ်ဒီးပယီၤသုးကလၢၤန့ၣ်မီၤနီၤႉဂီၤခီ ၇ နၣ်ရံၣ်ဘျီန့ၣ်ကဘီယူၤ ဟဲဆှၣ်တၢ်တဘ့ၣ်ဒီး ဟဲကဒီးလၢခံတဘ့ၣ်မးတ့ၢ်လီၤမ့ၣ်ပိၢ်လၢ၀့ၢ်ပူၤမီၤနီၤႉလၢၢ်ဒိၣ်ဒီးနၣ်သၤကွံဘၢၣ်စၢၤ (စစ်တောင်းမြစ်)တိၤစ့ၢ်ကီးၦၤမၤဟးဂီၤ၀ဲလံမီၤနီၤ”အဂ့ၢ်န့ၣ် စံး၀ဲန့ၣ်လီၤႉ

ခီဖျိကဘီယူၤဟဲတ့ၢ်လီၤမ့ၣ်ပိၢ်အဃိနၣ်သၤကွ့ပၢၤကီၢ်၀ဲၤလီၢ်ကပၤတၢ်ဆါဟံၣ်ဒီးကမျၢၢ်အဟံၣ်အဃီဟးဂီၤ၀ဲတနီၤတကးဒံးဘၣ်ကမျၢၢ်ဘၣ်ဒိဘၣ်ထံးအိၣ်၀ဲအသိးလီၢ်က၀ီၤကမျၢၢ်လၢအဃ့ၢ်ထီၣ်အဂၤတကလးဘျဲၣ်အံၤစ့ၢ်ကီးၦၤလဲၤဆီၣ်ထွဲမၤစၢၤအ၀ဲသ့ၣ်တအိၣ်ဘၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

ဒ်န့ၣ်အသိးတၢ်ဒုးကဲထီၣ်ဖဲ(KNLA)သုးပာ်ဖှိၣ်ဒီးပယီၤသုးအဘၢၣ်စၢၤအခါန့ၣ်ဒ်သိးပယီၤသုး(စစ်ကူ)ဟဲထီၣ်သုတသ့တဂ့ၤအဂီၢ်န့ၣ်တၢ်ပၢၢ်ဆၢသုးပာ်ဖှိၣ်မၤဟးဂီၤကွံာ်၀ဲလၢၢ်ဒိၣ်၀့ၢ်ဒီးနၣ်သၤကွ့၀့ၢ်ဘၢၣ်စၢၤ(စစ်တောင်းမြစ်)တိၤအံၤလၢမ့ၣ်ပိၢ်ဂ့ၢ်န့ၣ် ၦၤဘူးဒီးခ့ၣ်အဲၣ်ယူၣ်တဂၤစံး၀ဲန့ၣ်လီၤႉ

အ၀ဲစံး၀ဲလၢ“ပနၢ်ဟူလၢၦၤမၤကၢ်စိတိၤမီၤနီၤႉဒ်သိးပယီၤသုးဟဲထီၣ်သုတသ့တဂ့ၤအဂီၢ်လီၤႉ တိၤဟးဂီၤဘၣ်ဆၣ် သိလ့ၣ်လီၤလဲၤတန့ၢ်ဘၣ်ႇမ့မ့ၢ်ၦၤကညီန့ၣ်လ့ၢ်ထီၣ်လ့ၢ်လိၤသ့လီၤႉနၣ်သၤကွ့ပၢၤကီၢ်၀ဲၤလီၢ်န့ၣ်ပနၢ်ဟူလၢၦၤထီၣ်တန့ၢ်ဒံးဘၣ်ႉခံခီခံကပၤသံဘၣ်ဒိဘၣ်ထံးအိၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ

ဒ်န့ၣ်အသိးဖဲလါယူၤ ၅ သီ ဂီၤခီအခါစ့ၢ်ကီး ပယီၤသုးအဂၤ(၅၀)ဃၣ်ဃၣ်နုာ်လီၤဟံးန့ၢ်အလီၢ်အကျဲလၢ နၣ်သၤကွ့၀့ၢ်(ရေတွင်းကုန်းကြီး)သ၀ီပူၤအဃိကမျၢၢ်ဘၣ်ယိၣ်လၢတၢ်ဒုးကကဲထီၣ်အဃိ(ရေတွင်းကုန်းကြီး)သ၀ီဒီတဖျၢၣ်ဃ့ၢ်ထီၣ်၀ဲအသိးကမျၢၢ်လၢအိၣ်တၢ်ခိၣ်တၢ်ဃၢၤဖဲန့ၣ်သ့ၣ်တဖၣ်စ့ၢ်ကီးဃ့ၢ်ထီၣ်၀ဲဒၣ်အဂ့ၢ်န့ၣ် သ့ၣ်ညါဘၣ်လၢကမျၢၢ်အအိၣ်န့ၣ်လီၤႉ