ကၠၤအ့စ့ၣ်ကၠံ၀့ၢ်ပယီၤသုးတၢ်သမံသမိးတြဲၤလီၢ်တဖၣ် ထၢစ့ဟဲအါထီၣ်

လါယူၤ ၂၀ သီႇ ၂၀၂၃ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် ကၠၤအ့စ့ၣ်ကၠံ၀့ၢ်ပူၤ ပယီၤသုးတၢ်သမံသမိးတြဲၤလီၢ်တဖၣ် အိၣ်ခိးသမံသမိးလီၢ်က၀ီၤကမျၢၢ် လၢအဟးထီၣ်က့ၤလီၤတဖၣ်ဒီးတကးဒံးအမဲာ်ညါအ၀ဲသ့ၣ်ထၢစ့ဟဲအါထီၣ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ် အအိၣ်န့ၣ်လီၤႉ

သ၀ီလၢအိၣ်ကၠၤအ့စ့ၣ်ကၠံ၀့ၢ်ခိၣ်ဃၢၤကမျၢၢ်တဖၣ်ဖဲအ၀ဲသ့ၣ်လဲၤၦ့ၤတၢ်ဖိတၢ်လံၤလၢ၀့ၢ်ပူၤအခါန့ၣ် ပယီၤသုးဃ့အီၣ်စ့ဒိးသန့ၤထီၣ်သးလၢတၢ်ဖိတၢ်လံၤအါစှၤအဖီခိၣ်ဒီးခံပ့ၣ်ပၣ်သိစဲးတြီၢ်အကၣ်လၣ်(၅၀)ခံဖျၢၣ်န့ၣ် ဃ့၀ဲတုၤလၢ(၁၅၀၀၀)ကၠးညါအဂ့ၢ်န့ၣ် ကၠၤအ့စ့ၣ်ကၠံ၀့ၢ်ပူၤ ကမျၢၢ်တဂၤစံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“သိစဲးခံပ့ၣ်ပၣ်န့ၣ်အ၀ဲသ့ၣ်ဃ့၀ဲတကလးဘျဲၣ်ညါႉမ့မ့ၢ်ၦၤမဲာ်သီနါသီန့ၣ်အ၀ဲသ့ၣ်ဃ့အီၣ်၀ဲဆူၣ်မးႉ လၢက၀ီၤဒ့(၁)သွံၣ်ဃူဖိးမဲာ်ညါ တၢ်သမံသမိးတြဲၤန့ၣ်ရးဒိၣ်ကတၢၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

လီၢ်က၀ီၤကမျၢၢ်လၢအဟးထီၣ်က့ၤလီၤလဲၤက့ၤဖံးမၤတၢ်လၢ၀့ၢ်ပူၤတဖၣ်အံၤမုၢ်ဆါခီန့ၣ်ပယီၤသုးသမံသမိးဃ့အီၣ်၀ဲစ့ဒီး ဒ်န့ၣ်အသိးလၢမုၢ်နၤခီန့ၣ်အ၀ဲသ့ၣ်ခးလီၤကျိဖးဒိၣ်ကိးမုၢ်နၤဒဲးအဃိလီၢ်က၀ီၤကမျၢၢ်တဖၣ်ဘၣ်ဟးထီၣ်က့ၤလီၤအိၣ်လၢတၢ်ပလီၢ်ပဒီပူၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

လၢန့ၣ်အမဲာ်ညါကျဲလၢအနုာ်လီၤလၢကၠၤအ့စ့ၣ်ကၠံ၀့ၢ်ပူၤတဖၣ်တနီၤန့ၣ်ပယီၤသုးမၤဟးဂီၤ၀ဲဒီး အ၀ဲသ့ၣ်အိၣ်ခိးသမံသမိးဃ့အီၣ်စ့တကးဒံးဘၣ်အမဲာ်ညါခးလီၤကျိဖးဒိၣ်ဆူသ၀ီခိၣ်သ၀ီဃၢၤအဂ့ၢ်န့ၣ် နိၣ်တကီကီၢ်ဆၣ် ကမျၢၢ်ပၢပြးကရူၢ်(ပအဖ)သိၣ်မှံၤ တၢ်ရ့လိာ်မုာ်လိာ်မူဒါခိၣ် အူည့မ့ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“လၢနကနုာ်လီၤနိၣ်တကီ(က၀ီၤဒ့ ၆)ကျဲန့ၣ်ဒ်သိးသိလ့ၣ်နုာ်လီၤသုတန့ၢ်တဂ့ၤအဂီၢ်န့ၣ် အ၀ဲသ့ၣ်မၤဟးဂီၤဃာ်ကျဲခဲလၢာ်လီၤႉအိးထီၣ်၀ဲဒၣ်ကျဲတဘိလီၤႉမ့မ့ၢ်ကျဲတဘိန့ၣ်အတပံး၀ဲဒံးဘၣ်ႉအ၀ဲသ့ၣ်ဆီလီၤတြဲၤအိၣ်ခိးသမံသမိးတၢ်ဃ့အီၣ်စ့မီၤနီၤႉကွၢ်၀ဲမ့လီၤဆီန့ၣ်သမံသမိးပၢၢ်တုၤၦၤလီတဲစိညါႉအ၀ဲသ့ၣ်ခးလီၤကျိဖးဒိၣ်ကိးမုၢ်နၤဒဲးလီၤႉအ၀ဲသ့ၣ်ခးလီၤကျိဖးဒိၣ်အဃိၦၤသ၀ီဖိတဖၣ်ဘၣ်မံဖုးမံဖုးႉတနီၤန့ၣ်ၦၤစံၣ်နုာ်လီၤမံလၢတၢ်ပူၤႉတနီၤန့ၣ်အ၀ဲသ့ၣ်ဟးစံၣ်မံလၢတၢ်လီၢ်အဂၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

တကီၢ်ခါခဲအံၤစ့ၢ်ကီးလၢဟီၣ်က၀ီၤအပူၤခီဖျိစုက၀ဲၤတၢ်သဘံၣ်သဘုၣ်အဃိပနံာ်တၢ်ဖိတၢ်လံၤအၦ့ၤဒိၣ်ထီၣ်၀ဲကွ့ၢ်ကွ့ၢ်ဒီးခီဖျိကၠၤအ့စ့ၣ်ကၠံ၀့ၢ်ပယီၤသုးတဖၣ်အံၤထၢအီၣ်စ့လၢကမျၢၢ်ထံဖိကီၢ်ဖိအအိၣ်ဒ်အံၤအဃိဟီၣ်က၀ီၤဖဲန့ၣ်အပူၤကမျၢၢ်တဖၣ်တၢ်ကီတၢ်ခဲအိၣ်ထီၣ်လၢတၢ်လုၢ်အီၣ်နီၢ်ခိသးသမူအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ