ခီဖျိပယီၤသုးကျိၤနု၁်လီၤလၢချၢၣ်–တကူၣ်တၢၣ်ပူၤအဃိ ကမျၢၢ်ဃ့ၢ်ထီၣ်(၃၀၀၀)ဘျဲၣ်

လါယူၤ ၃၀ သီႇ ၂၀၂၃ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် ကၠၤအ့စ့ၣ်ကၠံကီၢ်ဆၣ် ၀ီၢ်ရ့ၣ်ဟီၣ်က၀ီၤအပူၤန့ၣ် ပယီၤသုးကျိၤနုာ်လီၤလၢချၢၣ်–တကူၣ်တၢၣ်ကရူၢ် ကစၢၢ်သူကစၢၢ်ခီၣ်ထံးတကးဒံးဘၣ်အမဲာ်ညါခးလီၤကျိဖးဒိၣ်ဆူသ၀ီပူၤကိးမုၢ်နံၤမုၢ်နၤအဃိ ကမျၢၢ်အဂၤ(၃၀၀၀)ဘျဲၣ် ဃ့ၢ်ထီၣ်၀ဲအဂ့ၢ်န့ၣ် သ့ၣ်ညါဘၣ်လၢကမျၢၢ်အအိၣ်န့ၣ်လီၤႉ

စးထီၣ်ဖဲတလါအံၤလါယူၤ ၂၆ သီအနံၤန့ၣ် ပယီၤသုးတဖၣ်အိၣ်လၢတလၢၤကီၢ်စဲၣ် ကၠဲၣ်မယီကီၢ်ဆၣ် တီၤကလ့သ၀ီတဆီဒီး ဟဲဃီၤ၀ဲဒၣ်လၢကညီကီၢ်စဲၣ် ကၠဲၣ်ကမီၣ်ကစၢၢ်ခီၣ်ထံးကပိၤကပၤ ကမျၢၢ်တၢ်ဖံးအီၣ်မၤအီၣ် လီၢ်ကျဲကျီးပူၤအဃိ လီၢ်က၀ီၤကမျၢၢ်လၢအကထိစးထီၣ်သုးလီၢ်သုးကျဲဃ့ၢ်ထီၣ်၀ဲလံအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိး တဖၣ် စံး၀ဲန့ၣ်လီၤႉ

အ၀ဲစံး၀ဲလၢ“ဘၣ်ဖဲပမၤစံာ်အခါပသူၣ်ဘုမးတ၀ံၤဒံးဘၣ်ႉပယီၤသုးကျိၤနုာ်လီၤအဃိပဘၣ်ပာ်တ့ၢ်ကွံာ်ဒ်န့ၣ်ဒီး ပဘၣ်စံၣ်ထီၣ်မီၤနီၤႉကျိဖးဒိၣ်လီၤတဲာ်လၢသ၀ီပူၤႇလီၤတဲာ်လၢစံာ်လီၢ်ကိးမုၢ်နံၤဒဲးအဃိၦၤအိၣ်တဘူၣ်လၢၤဘၣ်ႉၦၤဘၣ်ယိၣ်စ့ၢ်ကီးလၢပယီၤသုးကဖီၣ်ပီၣ်တၣ်မီၤနီၤ”အဂ့ၢ်န့ၣ် သ၀ီဖိလၢအဃ့ၢ်တၢ်ဒုးတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ် ဖဲလါယူၤ ၂၉ သီအနံၤန့ၣ်လီၤႉ

ချၢၣ်–တကူၣ်တၢၣ်ကရူၢ်အံၤအိၣ်၀ဲလၢခ့ၣ်အဲၣ်ယူၣ်(၀ီၢ်ရ့ၣ်ကီၢ်ဆၣ်)တၢ်ပၢဟီၣ်က၀ီၤပူၤဒီးတၢ်ဒုးကဲထီၣ်၀ဲလၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီးပယီၤသုးအဘၢၣ်စၢၤခဲအံၤခဲအံၤန့ၣ်လီၤႉတၢ်ဒုးကဲထီၣ် တဘျီလၢ်လၢ်အခါခီဖျိပယီၤသုးခးလီၤကျိဖးဒိၣ်ဆူသ၀ီပူၤကိးမုၢ်နၤဒဲးအဃိဟံၣ်ဃီဟးဂီၤ၀ဲတလီၢ်လီၢ်အသိး ကမျၢၢ်စ့ၢ်ကီးသံဘၣ်ဒိဘၣ်ထံးကဲထီၣ်သးအိၣ်၀ဲတလီၢ်လီၢ်အဂ့ၢ်န့ၣ် သ့ၣ်ညါဘၣ်လၢသ၀ီဖိတဖၣ်အအိၣ်န့ၣ်လီၤႉ

စးထီၣ်ဖဲတလါအံၤလါယူၤ ၂၈ သီအနံၤန့ၣ် ချၢၣ်ႇတကူၣ်တၢၣ်ႇမၠိၣ်ဟီႇချၢၣ်သ၀ီဖိႇဖယါငါစူၤႇပူလ့ၤႇနါသဲထိၤသ၀ီ လီၢ်က၀ီၤကမျၢၢ်ခဲလၢာ်အဂၤ(၃၀၀၀)ဘျဲၣ် စးထီၣ်ဟးပလဲာ်သးလံဒီး လဲၤအိၣ်စိ၀ဲလၢအဘူးအတံၢ်အသမူသကိးဟံၣ် အဂ့ၢ်န့ၣ် ကမျၢၢ်လၢအဃ့ၢ်တၢ်ဒုးတဖၣ်စံး၀ဲန့ၣ်လီၤႉ

ပယီၤသုးဒီး(BGF) ၁၀၂၁ သုးရ့ၣ် လၢအိၣ်ဆီလီၤသးဖဲတကူၣ်တၢၣ်ပၢၤကီၢ်၀ဲၤလီၢ်သ့ၣ်တဖၣ်အံၤ လၢအ၀ဲသ့ၣ်သုးကလၢၤတၢ်ဘံၣ်တၢ်ဘၢအဂီၢ်န့ၣ် အဘ့ၣ်သ၀ီ မျိာ်သုးရ့ၣ် ပညိၣ်လီၤ၀ဲ(၁၂၂ မမ)ကျိဖးဒိၣ် ၂ ခိၣ်ဒီး (၁၂၀ မမ) ကျိဖးဒိၣ်ခံခိၣ်ဆူသ၀ီလၢအိၣ်ဘူးဖဲအ၀ဲသ့ၣ်သုးကလၢၤခိၣ်ဃၢၤသ့ၣ်တဖၣ်ဒီး ခးလီၤကျိဖးဒိၣ်ကိးမုၢ်နံၤဒဲး အဂ့ၢ်န့ၣ် သ့ၣ်ညါဘၣ်လၢသ၀ီဖိတဖၣ်အအိၣ်န့ၣ်လီၤႉ