(ခ့ၣ်အဲၣ်ယူၣ်)ဖၣ်အၣ်ကီၢ်ရ့ၣ် ခိၣ်နၢ်တီခိၣ်ရိၣ်မဲ ကွဲးကါကူစါယါဘျါကလီန့ၢ်၀ဲကမျၢၢ်အမဲ၁်ချံ

လါယူၤ ၂၁ သီႇ ၂၀၂၃ နံၣ်ႇ ခ့ၣ်အဲးစံၣ်

ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဖၣ်အၣ်ကီၢ်ရ့ၣ်(သုးက့ ၇)ခိၣ်နၢ်တဖၣ်တီခိၣ်ရိၣ်မဲ ကွဲးကါကူစါယါဘျါ ကလီန့ၢ်၀ဲ ဒူယီၢ်ကီၢ်ဆၣ်ပူၤကမျၢၢ်အမဲာ်ချံလၢတနွံအတီၢ်ပူၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ

တၢ်ကွဲးကါကူစါယါဘျါန့ၢ်ကမျၢၢ်မဲာ်ချံဘျီအံၤမ့ၢ်၀ဲကညီဖီၣ်စုက၀ဲၤဃူဖိးကမံးတံာ်(UCKAG)အတၢ်ရဲၣ်တၢ်ကျဲၤဒီး ဘၣ်တၢ်တီခိၣ်ရိၣ်မဲဟံးထီၣ်ဖီၣ်ထီၣ်အီၤလၢဖၣ်အၣ်ကီၢ်ရ့ၣ်ခိၣ်နၢ်သ့ၣ်တဖၣ်န့ၣ်လီၤႉဒ်န့ၣ်အသိးတၢ်ကွဲးကါမဲာ်ချံတၢ်ရဲၣ်တၢ်ကျဲၤအံၤဘၣ်တၢ်စးထီၣ်မၤအီၤဖဲလါယူၤ ၁၄ သီတုၤလၢ ၂၀ သီ လၢတနွံအတီၢ်ပူၤအဂ့ၢ်န့ၣ် ဖၣ်အၣ်ကီၢ်ရ့ၣ် ကညီသးစၢ်ကရၢ(KYO)ၦၤဘၣ်မူဘၣ်ဒါလၢအနုာ်လီၤပၣ်ဃုာ်မၤစၢၤတၢ်လၢတၢ်ရဲၣ်တၢ်ကျဲၤပူၤအံၤတဂၤ စံး၀ဲဒ်အံၤ န့ၣ်လီၤႉ

အ၀ဲစံး၀ဲလၢ“တၢ်ကွဲးကါန့ၢ်ၦၤမဲာ်ချံဘျီ၀ဲအံၤမ့ၢ်၀ဲဒၣ်(ဖၣ်အၣ်ကီၢ်ရ့ၣ်)ခိၣ်နၢ်တဖၣ်တီခိၣ်ရိၣ်မဲ၀ဲမီၤနီၤႉ စးထီၣ်မၤ၀ဲတလါအံၤလါယူၤ ၁၄ သီတုၤလၢအသီ ၂၀ မီၤနီၤႉ တၢ်ဟးကွဲးကါန့ၢ်ကမျၢၢ်မဲာ်ချံအံၤမ့ၢ်၀ဲဒၣ်(UCKAG) အတၢ်ရဲၣ်တၢ်ကျဲၤလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

တၢ်ကွဲးကါကလီန့ၢ်ကမျၢၢ်အမဲာ်ချံတၢ်ရဲၣ်တၢ်ကျဲၤအံၤဘၣ်တၢ်မၤအီၤလၢဖၣ်အၣ်ကီၢ်ရ့ၣ် ဒူယီၢ်ကီၢ်ဆၣ် နီၤသၤယၤသ၀ီပူၤဒီး ကမျၢၢ်အိၣ်ကီၢ်ဆၣ်ပူၤတဖၣ်ဟဲကွဲးကါအမဲာ်ချံအိၣ်၀ဲအါမးန့ၣ်လီၤႉ

ဘၣ်ဃးတၢ်ကွဲးကါမဲာ်ညါချံဘျီ၀ဲအံၤတနွံအတီၢ်ပူၤတၢ်ကွဲးကါန့ၢ်၀ဲၦဲၤဂၤလဲၣ်ခီန့ၣ်တသ့ၣ်ညါလီၤတံၢ်ဒံးဘၣ်အဂ့ၢ်န့ၣ် သးစၢ်ၦၤဘၣ်မူဘၣ်ဒါတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ

“ပသ့ၣ်ညါန့ၣ်ၦၤဟဲမၤမဲာ်ချံကအိၣ်အဂၤ(၄၀၀)ဘျဲၣ်ညါႉၦၤဟဲမၤအဂၤ(၄၀၀)ဘျဲၣ်အကျါတနီၤန့ၣ်ဘၣ်ကွဲးကါအမဲာ်ချံအိၣ်ႉတနီၤန့ၣ်ဘၣ်ဒိးမဲာ်ကးအိၣ်စ့ၢ်ႉၦၤဟဲဒိးပၠးသးအိၣ်ဒီဒူၣ်ညါႉခဲအံၤတ၀ံၤဒံးဘၣ်အဃိၦၤဟဲမၤမဲာ်ချံအနီၣ်ဂံၢ်ကအိၣ်ဆံးအါလဲၣ်န့ၣ်ပတသ့ၣ်ညါလီၤတံၢ်ဒံးဘၣ်”အဂ့ၢ်န့ၣ် စံး၀ဲန့ၣ်လီၤႉ

ဖဲတၢ်အိးထီၣ်တၢ်ကွဲးကါမဲာ်ချံမူးတၢ်ရဲၣ်တၢ်ကျဲၤအပူၤန့ၣ်(ခ့ၣ်အဲၣ်ယူၣ်)ဖၣ်အၣ်ကီၢ်ရ့ၣ်ခိၣ် ပဒိၣ်စီၤအီၤမီၤအ့ႇ (သုးက့ ၇)ဒုးယၤခိၣ် သုးခိၣ် စီၤဒံၣ်ကွဲၤတဖၣ်ဟဲထီၣ်၀ဲဒီး လီၢ်က၀ီၤကမျၢၢ်ၦၤသူၣ်က့သးၦၢ်ဟဲကွဲးကါကူစါယါဘျါအမဲာ်ချံ အိၣ်၀ဲအါမးအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

တၢ်လီၢ်လၢၦၤလဲၤကွဲးကလီန့ၢ်ကမျၢၢ်မဲာ်ချံအံၤမ့ၢ်တၢ်လီၢ်လၢၦၤကညီကလုာ်ႇၦၤပယီၤဒီးတလၢၤကလုာ်ဒူၣ်သ့ၣ်တဖၣ်အိၣ်ဆိး၀ဲအလီၢ်ဒီးတၢ်ဟဲကွဲးကါကလီန့ၢ်မဲာ်ချံဒ်အံၤအဃိကမျၢၢ်သ့ၣ်တဖၣ်သးခု၀ဲဒိၣ်မးအဂ့ၢ်န့ၣ် ၦၤလၢအနုာ်လီၤပၣ်ဃုာ် မၤစၢၤတၢ်လၢတၢ်ရဲၣ်တၢ်ကျဲၤပူၤအံၤတဂၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“တၢ်လီၢ်၀ဲန့ၣ်တမ့ၢ်အအိၣ်ထဲၦၤကညီတဒူၣ်ဘၣ်ႉၦၤပယီၤႇတလၢၤစ့ၢ်ကီးအိၣ်မီၤနီၤႉခ့ၣ်အဲၣ်ယူၣ်ဟဲမၤကလီန့ၢ်၀ဲဒ်အံၤအ၀ဲသ့ၣ်သူၣ်ခုသးခုညါႉဘၣ်မနုၤအဃိလဲၣ်န့ၣ်အ၀ဲသ့ၣ်နၢ်ဟူဘၣ်၀ဲလၢ(ခ့ၣ်အဲၣ်ယူၣ်)အံၤဟးမၤန့ၢ်၀ဲတၢ်ဒ်အံၤတအိၣ်ဘၣ်မီၤနီၤႉအ၀ဲသ့ၣ်န့ၣ်သ့ၣ်ညါဃာ်၀ဲလၢ(ခ့ၣ်အဲၣ်ယူၣ်)အံၤမ့ၢ်၀ဲၦၤပူထီၣ်လီထီၣ်တၢ်ဖိကရူၢ်ဒ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ဘၣ်ဃးတၢ်ဟးကွဲးကါကူစါယါဘျါန့ၢ်ကမျၢၢ်မဲာ်ချံလၢ(ခ့ၣ်အဲၣ်ယူၣ်)ဟီၣ်က၀ီၤပူၤအံၤမ့ၢ်၀ဲကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)လီၢ်ခၢၣ်သးကသံၣ်၀ဲၤကျိၤ ဒီကထၢၣ် စီၤန့ၢ်ဆၢ တီခိၣ်ရိၣ်မဲ၀ဲဒီး တမ့ၢ်ဟးကွဲးကါကူစါယါဘျါ၀ဲထဲလၢ ကညီကီၢ်စဲၣ် ခ့ၣ်အဲၣ်ယူၣ်တၢ်ပၢဟီၣ်က၀ီၤပူၤအံၤဘၣ်ဒီး ဖဲအပူၤကွံာ်လါအခါစ့ၢ်ကီး လဲၤကွဲးကါကူစါယါဘျါကလီန့ၢ်၀ဲ ၦၤမဲာ်ချံလၢ(ကရ့ၣ်နံၣ်ကီၢ်စဲၣ်)ပူၤဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ