လါယူၤလံ ၁၉ သီႇ ၂၀၂၃ နံၣ်ႇ ခ့ၣ်အဲးစံၣ်
ဖဲမဟါလါယူၤလံ ၁၈ သီ ဂီၤခီ ၇ နၣ်ရံၣ်အဆၢကတီၢ် လၢကညီကီၢ်ဆၣ် မၠၣ်၀တံၣ်၀့ၢ်ချၢ (လက်ခတ်တောင်)ကပၤန့ၣ် တၢ်ဒုးကဲထီၣ်၀ဲလၢ(Cobra)သုးကျိၤတီခိၣ်ရိၣ်မဲတၢ်ပၢၢ်ဆၢသုးပာ်ဖှိၣ်ဒီး ပယီၤသုးအဘၢၣ်စၢၤဒီး တၢ်ဒုးဘျီ၀ဲန့ၣ်အပူၤ ပယီၤသုးခိၣ်သံ၀ဲ(၁)ဂၤႇဘၣ်ဒိ(၅)ဂၤအဂ့ၢ်န့ၣ် (Cobra)သုးကျိၤ ထုးထီၣ်ပာ်ဖျါ၀ဲဖဲမဟါလါယူၤလံ ၁၈ သီအနံၤန့ၣ်လီၤႉ
ပယီၤသုးသ့ၣ်တဖၣ်အံၤဘၣ်တၢ်ခးအီၤလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) Cobra သုးကျိၤ(၁)ႇ (ကျားသစ်နက်)သုးကျိၤႇ(Federal Wings)ဒြိသုးပာ်ဖှိၣ်သ့ၣ်တဖၣ်အံၤဒီး ဖဲန့ၣ်ပယီၤသုးတကပၤ အသုးခိၣ်သံ၀ဲ(၁)ဂၤ, ခီၣ်ချ့သုးရ့ၣ်(ခမရ–၁၁၈)အၦၤဘၣ်ဒိ၀ဲ(၅)ဂၤအဂ့ၢ်န့ၣ် (Cobra)လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ
တၢ်ခးလိာ်သးကဲထီၣ်ဘျီ၀ဲအံၤအခါပယီၤသုးသံဘၣ်ဒိဘၣ်ထံးတကးဒံးဘၣ်အမဲာ်ညါ တၢ်မၤန့ၢ်ဃုာ်၀ဲ(MA3)တခိၣ်ႇ(RPG)သၢဖျၢၣ်ႇ(60mm)သၢဖျၢၣ်ႇအံၤနၤကၤ(၄)ဖျၢၣ်ႇလီတဲစိ(၇)ဖျၢၣ်အဂ့ၢ်န့ၣ် (Cobra)သုးကျိၤ ထုးထီၣ်ပာ်ဖျါ၀ဲန့ၣ်လီၤႉ
ဒ်န့ၣ်အသိးတၢ်ဒုးကဲထီၣ်ဘျီ၀ဲအံၤအခါမ့မ့ၢ်တၢ်ပၢၢ်ဆၢသုးပာ်ဖှိၣ်တကပၤခီန့ၣ်ဘၣ်ဒိ၀ဲ(၁)ဂၤအဂ့ၢ်န့ၣ် (Cobra)သုးကျိၤ လံာ်တၢ်ထုးထီၣ်ပာ်ဖျါအပူၤ ပာ်ဖျါ၀ဲန့ၣ်လီၤႉ
ဖဲခံခီခံကပၤတၢ်ဒုးကဲထီၣ်အခါန့ၣ်ၦၤနၢ်ဟူကျိဖးဒိၣ်ကလုၢ်သီၣ်တုၤလၢမၠၣ်၀တံၣ်၀့ၢ်ႇ ကီၢ်ကၠီၣ်တဲၣ်–ကီၢ်ပယီၤကီၢ်ဆၢ ၀့ၢ်မဲၢ်ဆီးညါအဂ့ၢ်န့ၣ် မၠၣ်၀တံၣ်ကမျၢၢ်ဒီးခီကီၢ်ၦၤမၤတၢ်ဖိလၢအိၣ်မဲၢ်ဆီး၀့ၢ်ပူၤတဖၣ် စံး၀ဲန့ၣ်လီၤႉ
ဘၣ်ဃးတၢ်ခးလိာ်သးကဲထီၣ်ဘျီ၀ဲအံၤပယီၤသုးသံဘၣ်ဒိဘၣ်ထံးႇတၢ်မၤန့ၢ်ကျိချံၦာ်သၣ်တၢ်အိၣ်သးအံၤန့ၣ် တၢ်ပၢၢ်ဆၢသုးပာ်ဖှိၣ်ထုးထီၣ်ပာ်ဖျါ၀ဲအိၣ်ဘၣ်ဆၣ်ႇမ့မ့ၢ်ပယီၤသုးတကပၤခီန့ၣ်ထုးထီၣ်ပာ်ဖျါ၀ဲတအိၣ်နီတမံၤဘၣ် န့ၣ်လီၤႉ
ဒ်န့ၣ်အသိးဖဲအပူၤကွံာ်လါယူၤလံ ၁၀ သီအခါစ့ၢ်ကီး လၢမၠၣ်၀တံၣ်၀့ၢ်(လက်ခတ်တောင်)ကပၤန့ၣ် တၢ်ဒုးကဲထီၣ်ဒံး၀ဲလၢပယီၤသုးဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤဒံးအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
