လီၢ်က၀ီၤကမျၢၢ်လၢအဃ့ၢ်တၢ်ဒုးတဖၣ် ပယီၤသုးနု၁်လီၤဟုၣ်တၢ်လၢအဟံၣ်ပူၤ

လါအီကူး ၁၄ သီႇ ၂၀၂၃ နံၣ်ႇ ခ့ၣ်အဲးစံၣ်

လၢတနီသရံၣ်ကီၢ်ခီဒိၣ် ယ့ၤဖၠူၤကီၢ်ဆၣ်အပူၤ ပယီၤသုးနု၁်လီၤအိၣ်လၢဒူသ၀ီတနီၤအပူၤဒီး နုာ်လီၤဟုၣ် ၦၤသ၀ီဖိတဖၣ်အံၤအတၢ်ဖိတၢ်လံၤလၢဟံၣ်ပူၤအဂ့ၢ်န့ၣ် လီၢ်က၀ီၤကမျၢၢ်လၢပယီၤသုးနုာ်လီၤဟုၣ် အတၢ်ဖိတၢ်လံၤတဖၣ်စံး၀ဲန့ၣ်လီၤႉ

ဖဲအပူၤကွံာ်လါအီကူး ၁၁ သီအနံၤ ပယီၤသုးကျိၤနု၁်လီၤ၀ဲဒၣ်လၢ(နဘူၣ်လဲၤ)ဟီၣ်က၀ီၤအခိၣ်အဃၢၤဖဲန့ၣ်တဖၣ် အပူၤ၀ံၤနုာ်လီၤဟုၣ်ၦၤသ၀ီဖိတၢ်ဖိတၢ်လံၤလၢအကစၢ်တအိၣ်ဘၣ်အံၤဒီးဟံးဃုာ်၀ဲဟုသးႇတၢ်အီၣ်တၢ်အီတဖၣ် အဂ့ၢ်န့ၣ် (နဘူၣ်လဲၤ)ကမျၢၢ်တဂၤစံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“တၢ်အိၣ်သးဒုဒ်ယံၤဒ်နးဒိၣ်ထီၣ်လီၤႉခဲအံၤပယီၤသုးက့ၤနုာ်လီၤကဒါလၢ(၀ဲၣ်ခၠီ)သ၀ီတကပၤန့ၣ်လံ မီၤနီၤႉဖဲသ၀ီပူၤအံၤၦၤအိၣ်တ့ၢ်က့ၤတစဲးလီၤႉအ၀ဲသ့ၣ်နုာ်လီၤဟံၦၤတၢ်ဖိတၢ်လံၤလၢအလုၢ်ဒိၣ်ၦ့ၤဒိၣ်က့ၤစိာ်ဃု၀ဲ ခဲလၢာ်လီၤႉၦၤဆဲးကဲးနါက့ဟံးဃုာ်၀ဲႉကဘၣ်ပာ်ကဲၦၤတၢ်ဖိတၢ်လံၤဒ်လဲၣ်န့ၣ်တသ့ၣ်ညါ၀ဲဘၣ်ႉသ၀ီတနီၤန့ၣ် ဒွဲၣ်အူအီၣ်ၦၤဟံၣ်ၦၤဟံၣ်အိၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

တကးဒံးဘၣ်ပယီၤသုးသ့ၣ်တဖၣ်အံၤနုာ်လီၤအိၣ်လၢသ၀ီပူၤ၀ံၤလၢမုၢ်နၤခီန့ၣ်အ၀ဲသ့ၣ်ခးလီၤစ့ၢ်ကီးကျိဖးဒိၣ်လၢ သ၀ီဖဲန့ၣ်အခိၣ်အဃၢၤဒီးဖီၣ်၀ဲဒၣ်ကမျၢၢ်စ့ၢ်ကီးအိၣ်၀ဲအဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ

အ၀ဲစံး၀ဲလၢ“မုၢ်နၤခီန့ၣ်ပယီၤသုးခးလီၤကျိဖးဒိၣ်လၢ(၀စွါတီ)သ၀ီပူၤဒီးလၢၦၢ်ပူၤတကပၤန့ၣ်မၢ်မၢ်လီၤႉ မ့၀ံၤအ၀ဲသ့ၣ်ဖီၣ်၀ဲဒၣ်သ၀ီပူၤၦၤပိာ်မုၣ်ပိာ်ခွါကအိၣ်အဂၤ(၃၀)ဘျဲၣ်ညါႉပျၢ်လီၤ၀ဲဒၣ်(၃)ဂၤဒံးလီၤႉလၢအဂၤတဖၣ်န့ၣ် ပတနၢ်ဟူအကစီၣ်နီတမံၤဒံးဘၣ်ႉတၢ်တသီခံသီအတီၢ်ပူၤအံၤဟဲနးဒိၣ်ထီၣ်”အဂ့ၢ်န့ၣ် စံး၀ဲန့ၣ်လီၤႉ

(ယ့ၤဖၠူၤ)တၢ်ဒီသဒၢကမျၢၢ်သုးလၢအိၣ်ဟီၣ်က၀ီၤပူၤဖဲန့ၣ်တဖၣ်စ့ၢ်ကီးတၢ်ခးလိာ်သးကဲထီၣ်တအိၣ်၀ဲဒီးပယီၤသုး အံၤဘၣ်ႇဘၣ်ဆၣ်ပယီၤသုးနုာ်လီၤလၢသ၀ီပူၤလၢတၢ်ဂ့ၢ်တအိၣ်နီတမံၤဘၣ်အဂ့ၢ်န့ၣ် တၢ်ဒီသဒၢကမျၢၢ်သုးဖိတဂၤ စံး၀ဲန့ၣ်လီၤႉ

တလါအံၤလါအီကူးအတီၢ်ပူၤပယီၤသုးကျိၤနုာ်လီၤ၀ဲလၢ(နဘူၣ်လဲၤ)ဟီၣ်က၀ီၤဒီးသ၀ီလၢအိၣ်တၢ်ခိၣ်တၢ်ဃၢၤဖဲန့ၣ်တဖၣ်အပူၤတကးဒံးဘၣ်အမဲာ်ညါခီဖျိအ၀ဲသ့ၣ်ခးလီၤကျိဖးဒိၣ်ဆူသ၀ီပူၤအဃိသ၀ီ(၈)ဖျၢၣ်ကမျၢၢ်လၢအကထိ ဘၣ်ဃ့ၢ်ထီၣ်၀ဲအဂ့ၢ်န့ၣ် ဟီၣ်က၀ီၤဂံၢ်ခီၣ်ထံးတၢ်ကစီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ