လါအီကူး ၁၅ သီႇ ၂၀၂၃ နံၣ်ႇ ခ့ၣ်အဲးစံၣ်
လၢကညီကီၢ်စဲၣ်အပူၤ ခီဖျိတၢ်စူၤတပယူာ်ဃီဒီးထံဒိၣ်ထီၣ်အသီယံၤအဃိ စံာ်လီၢ်တဖၣ်အပူၤဘုဟးဂီၤ၀ဲအါမးအဂ့ၢ်န့ၣ် သ့ၣ်ညါဘၣ်လၢၦၤမၤအီၣ်စံာ်ဖိတဖၣ်အအိၣ်န့ၣ်လီၤႉ
လၢဖၣ်အၣ်ကီၢ်ဆၣ်ႇလူၢ်ပျဲၢ်ကီၢ်ဆၣ်ႇကီးတရံးကီၢ်ဆၣ်ဒီးနိၣ်တကီကီၢ်ဆၣ် ဒူသ၀ီတဖၣ်အပူၤ ခီဖျိတၢ်စူၤထံကစၢၢ်လီၤ ထံကျိဒိၣ်ထီၣ်ဒီးတၢ်လီၢ်တနီၤန့ၣ်ထံဒိၣ်ထီၣ်ကအိၣ်လၢ(၈)သီအသီ(၁၀)ညါအဃိ ဘုဟးဂီၤ၀ဲအါမးဒီးဘုတနီၤန့ၣ် လီၤထွံလိၤလၢထံကျါအဂ့ၢ်န့ၣ် ၦၤမၤအီၣ်စံာ်ဖိတဖၣ်စံး၀ဲန့ၣ်လီၤႉ
ဖၣ်အၣ်ကီၢ်ဆၣ် လၣ်ကမၠ့ၤသ၀ီ ၦၤမၤအီၣ်စံာ်ဖိတဂၤစံး၀ဲလၢ“တနံၣ်အံၤ၀ၢ်ထးသးအဃိပသ့ၣ်ညါမီၤနီၤလၢထံ ကဒိၣ်ထီၣ်န့ၣ်ႉဘၣ်ဆၣ်ထံကဒိၣ်ထီၣ်ထဲထဲအံၤညါန့ၣ်ပတဆိမိၣ်ဘၣ်ႉခဲအံၤစံာ်လီၢ်တနီၤန့ၣ်ဘုလီၤထွံလိၤလၢထံကျါ ခဲလၢာ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
စးထီၣ်ဖဲလါအီကူး ၁ သီအနံၤ ထံစးထီၣ်ဒိၣ်ထီၣ်၀ဲလၢကညီကီၢ်စဲၣ်အပူၤဒီး တၢ်လီၢ်တနီၤန့ၣ် စးထီၣ်ဖဲလါအီကူး ၁၂ သီ အနံၤန့ၣ် ထံက့ၤလီၤကဒါ၀ဲဘၣ်ဆၣ်စံာ်လီၢ်တနီၤအပူၤန့ၣ်ဟီၣ်ခိၣ်ကပံာ်အိၣ်တ့ၢ်၀ဲအဂ့ၢ်န့ၣ် လူၢ်ပျဲၢ်ကီၢ်ဆၣ် အူစါအူ လၢအမၤအီၣ်စံာ်အံၤစံး၀ဲန့ၣ်လီၤႉ
အ၀ဲစံး၀ဲလၢ“တၢ်စူၤဒုလီၤစှၤလံဘၣ်ဆၣ်ထံဒုတလီၤဒံးဘၣ်ႉအါဒၣ်တက့ၢ်န့ၣ်စံာ်လီၢ်ဟးဂီၤ၀ဲလီၤႉ စံာ်လီၢ်တနီၤဒုထံလီၤလံႉဘၣ်ဆၣ်ဟီၣ်ခိၣ်ကပံာ်အိၣ်တ့ၢ်အိၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ
တကီၢ်ခါခဲအံၤတၢ်စူၤလီၤစှၤထံက့ၤလီၤလံဘၣ်ဆၣ် ထံဒိၣ်ထီၣ်အဃိကညီကီၢ်စဲၣ်ဒီတဘ့ၣ်အပူၤ ဘၣ်ဃာ်စံာ်လီၢ်ဘုဟးဂီၤအအ့ကၢၣ်အိၣ်ဆံးအါလဲၣ်တၢ်အိၣ်သးအံၤန့ၣ်၀ဲၤကျိၤဘၣ်ထွဲၦၤဘၣ်မူဘၣ်ဒါမၤနီၣ်စရီ တအိၣ်ဘၣ် ဘၣ်ဆၣ်စံာ်လီၢ်ဟးဂီၤအိၣ်အါမးအဂ့ၢ်န့ၣ် လီၢ်က၀ီၤၦၤမၤအီၣ်စံာ်ဖိတဖၣ်စံး၀ဲန့ၣ်လီၤႉ
ကီၢ်ပယီၤအပူၤ(၂၀၂၁)သုးဟံးန့ၢ်တၢ်စိတၢ်ကမီၤ၀ံၤလီၢ်ခံသုးမီၤစိရိၤပၢပြးတၢ်အတီၢ်ပူၤကမျၢၢ်ထံဖိကီၢ်ဖိတဖၣ်ဘၣ်ကွၢ်ဆၢၣ်မဲာ်၀ဲမုၢ်ကျိၤ၀ဲၤကွာ်တၢ်ဃံးတၢ်စ့ၤဒီးၦၤမၤအီၣ်စံာ်ဖိတဖၣ်စ့ၢ်ကီးခီဖျိထံဒိၣ်ထီၣ်အစံာ်လီၢ်ဘုဟးဂီၤ၀ဲအါအါဂီၢ်ဂီၢ်ဒ်အံၤ အဃိတၢ်ကီတၢ်ခဲအိၣ်လၢအ၀ဲသ့ၣ်ကက့ၤၦ့ၤကဒါဘုချံအဂ့ၢ်န့ၣ် ၦၤမၤအီၣ်စံာ်ဖိလၢဘုဟးဂီၤအံၤ တဖၣ် စံး၀ဲန့ၣ်လီၤႉ
ကညီကီၢ်စဲၣ်ပူၤ တၢ်လီၢ်လၢအိၣ်တၢ်လီၢ်လီၤဖုၣ်သ့ၣ်တဖၣ်အံၤညီနုၢ်ထံဒိၣ်ထီၣ်၀ဲကိးမုၢ်နံၣ်ဒဲးလီၤဒီး ဖဲအပူၤကွံာ်(၂၀၁၈) ထံဒိၣ်ထီၣ်အခါစ့ၢ်ကီး ကညီကီၢ်စဲၣ်ဒီတဘ့ၣ်အပူၤ ထံလုၢ်ဘၢဟးဂီၤ၀ဲစံာ်လီၢ်ကအိၣ်လၢ အအ့ကၢၣ်(၅၀၀၀၀)ဘျဲၣ် ညါန့ၣ်လီၤႉ
