ကီၢ်ဆၢဘၣ်ကီဘၣ်ခဲဒဲက၀ီၤတဖၣ်အပူၤ ခီဖျိၦၤကၠိဖိနီၣ်ဂံၢ်ဟဲအါထီၣ်အဃိလိၣ်ဘၣ်တၢ်မၤစၢၤ

လါအီကူး ၃ သီႇ ၂၀၂၃ နံၣ်ႇ ခ့ၣ်အဲးစံၣ်

လၢကီၢ်ကၠီၣ်တဲၣ်–ကီၢ်ပယီၤကီၢ်ဆၢ ကညီဘၣ်ကီဘၣ်ခဲဒဲက၀ီၤ(၇)ဘ့ၣ်အပူၤ တနံၣ်အံၤ(၂၀၂၃–၂၀၂၄) တၢ်သိၣ်လိနံၣ် အပူၤ ခီဖျိၦၤကၠိဖိနီၣ်ဂံၢ်ဟဲအါထီၣ်အဃိ လိၣ်ဘၣ်၀ဲဒၣ်ကၠိတၢ်သူၣ်ထီၣ်တီၤဒၢးဒီး ကၠိတၢ်ပီးတၢ်လီတၢ်ဆီၣ်ထွဲမၤစၢၤတဖၣ် အဂ့ၢ်န့ၣ် သ့ၣ်ညါဘၣ်လၢကညီဘၣ်ကီဘၣ်ခဲကမံးတံာ်(KRC)အအိၣ်န့ၣ်လီၤႉ

ကီၢ်ကၠီၣ်တဲၣ်–ကီၢ်ပယီၤကီၢ်ဆၢ မဲၢ်လးႇအူးဖၠၣ်ႇနိၣ်ဖိႇမဲၢ်လးအူးႇမဲၢ်ရၤမိၢ်ႇထါမ်ဟ့ၣ်ႇဘၣ်ဒိၤယါဘၣ်ကီဘၣ်ခဲ ဒဲက၀ီၤ (၇)ဘ့ၣ်အံၤအပူၤ ခီဖျိတနံၣ်အံၤၦၤကၠိဖိနီၣ်ဂံၢ်ဟဲအါထီၣ်အဃိ လံာ်လဲၢ်တကူတလၢတကးဒံးဘၣ် လၢကမၤအအါထီၣ်ကၠိတၢ်သူၣ်ထီၣ်တီၤဒၢးအံၤအဂီၢ်တၢ်မၤစၢၤတအိၣ်၀ဲဘၣ်အဂ့ၢ်န့ၣ် (KRC)ကူၣ်သ့မူဒါခိၣ် စီၤဟ့ၣ်စိ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“တနံၣ်အံၤၦၤကၠိဖိနီၣ်ဂံၢ်ဒုဟဲအါထီၣ်ဖးအါညါႉလၢကၠိသရၣ်၊မုၣ်တၢ်ဆီၣ်ထွဲမၤစၢၤနါက့လိၣ်စ့ၢ်ႉ မ့၀ံၤလၢၦၤကၠိဖိအဂီၢ်စ့ၢ်ကီးလံာ်မိၢ်ၦၢ်တလၢဘၣ်ႉကဘှီဂ့ၤထီၣ်က့ၤတၢ်သူၣ်ထီၣ်အဂီၢ်စ့ၢ်ကီးတၢ်မၤစၢၤတအိၣ်ဘၣ် အဃိဘှီတသ့ဘၣ်မီၤနီၤႉမ့၀ံၤကသူၣ်အါထီၣ်ကၠိအဂီၢ်န့ၣ်ပမၤတန့ၢ်ဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ

ဘၣ်ကီဘၣ်ခဲဒဲက၀ီၤ(၇)ဘ့ၣ်အံၤအပူၤကွံာ်(၂၀၂၂–၂၀၂၃)တၢ်သိၣ်လိနံၣ်အခါန့ၣ် တီၤဖုၣ်တုၤလၢတီၤထီန့ၣ် ကၠိအိၣ်၀ဲခဲလၢာ်(၄၉)ဖျၢၣ်ႇၦၤကၠိဖိနီၣ်ဂံၢ်အိၣ်၀ဲ(၁၆ႇ၀၀၀)ဘျဲၣ်လီၤဒီးဘၣ်ဆၣ်တနံၣ်အံၤ(၂၀၂၃–၂၀၂၄) တၢ်သိၣ်လိနံၣ် အဂီၢ် ၦၤကၠိဖိနီၣ်ဂံၢ်ခဲလၢာ်အိၣ်၀ဲ(၂၁ႇ၂၆၇)ဂၤႇ ကၠိသရၣ်၊မုၣ်အိၣ်၀ဲ(၈၃၄)ဂၤအဂ့ၢ်န့ၣ် KRC တၢ်မၤနီၣ်စရီအသိး သ့ၣ်ညါဘၣ် န့ၣ်လီၤႉ

လၢန့ၣ်အမဲာ်ညါၦၤကၠိဖိလၢအိၣ်ဘၣ်ကီဘၣ်ခဲဒဲက၀ီၤပူၤလၢအဖျိထီၣ်တီၤထီကၠိသ့ၣ်တဖၣ်အံၤ လၢအ၀ဲသ့ၣ်ကဆဲးထီၣ်ကၠိအဂီၢ် (Post-Ten)ကၠိအိၣ်၀ဲ(၉)ဖျၢၣ်ဒီး ၦၤကၠိဖိနီၣ်ဂံၢ်အိၣ်၀ဲ(၁ႇ၀၈၇)ဂၤအဂ့ၢ်န့ၣ် (KRC)စံး၀ဲန့ၣ်လီၤႉ

စးထီၣ်ဖဲအပူၤကွံာ်(၂၀၀၈)နံၣ်လၢဘၣ်ကီဘၣ်ခဲဒဲက၀ီၤတဖၣ်အပူၤဘၣ်ဃးလၢကူၣ်သ့တၢ်ဆီၣ်ထွဲမၤစၢၤတကပၤန့ၣ် လီၤစှၤ၀ဲဒီးကၠိသရၣ်၊မုၣ်လၢအသိၣ်လိတၢ်(၄၆၅)ဂၤအံၤတၢ်ဆီၣ်ထွဲမၤစၢၤ၀ဲတလါန့ၣ်န့ၢ်ထဲတဂၤ(၁၀၀၀)ဘးလီၤ အဂ့ၢ်န့ၣ် သ့ၣ်ညါဘၣ်လၢ(KRCEE)အအိၣ်န့ၣ်လီၤႉ

ဒ်န့ၣ်အသိးဘၣ်ကီဘၣ်ခဲဒဲက၀ီၤတဖၣ်အပူၤကတီၤဆိကၠိ(၄၇)ဖျၢၣ်အဂီၢ်စ့ၢ်ကီးဒိးန့ၢ်ဘၣ်တၢ်ဆီၣ်ထွဲမၤစၢၤစှၤလီၤ၀ဲ အဃိ ၦၤတ၀ၢတၢ်ကရၢကရိလၢအိၣ်ဟီၣ်က၀ီၤပူၤတဖၣ်ဘၣ်က့ၤဆီၣ်ထွဲမၤစၢၤက့ၤ၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ကၠိဖိမိၢ်ပၢ်နါမူလၢအဟဲသုးလီၢ်သုးကျဲဆူနိၣ်ဖိဘၣ်ကီဘၣ်ခဲဒဲက၀ီၤပူၤတဂၤစံး၀ဲလၢ“လၢပသ၀ီန့ၣ်ကၠိအိးထီၣ်မီၤနီၤႉ ဘၣ်ဆၣ်ပဘၣ်ကနၣ်တၢ်အိၣ်သးမၢ်မၢ်လီၤႉကျိဖးဒိၣ်စ့ၢ်ကီးလီၤတဲာ်ကိးမုၢ်နံၤဒဲးလီၤႇအဃိပတအဲၣ်ဒိးပာ်ပဒံၣ်ပဖိလၢာ်ဘၣ်အဃိပဟဲက့ၤပာ်လၢဒဲက၀ဲၤပူၤမီၤနီၤႉအပူၤကွံာ်လၢညါန့ၣ်ပအိၣ်လၢဒဲက၀ီၤပူၤလီၤႉပဆိမိၣ်လၢတၢ်အိၣ်သးဂ့ၤထီၣ်လံအဃိပက့ၤအိၣ်လၢပသ၀ီမီၤနီၤႇခဲအံၤတၢ်ဒုးက့ၤကဲထီၣ်ကဒါဘျီပဟဲက့ၤနုာ်လီၤအိၣ်ကဒါလၢဒဲက၀ီၤပူၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

(၂၀၂၁)သုးဟံးန့ၢ်ထံကီၢ်တၢ်စိတၢ်ကမီၤ၀ံၤလီၢ်ခံလၢ(ခ့ၣ်အဲၣ်ယူၣ်)တၢ်ပၢဟီၣ်က၀ီၤတဖၣ်အပူၤ ခီဖျိတၢ်ဒုးစးထီၣ်ကဲထီၣ်ကဒါ၀ဲဒိၣ်ဒိၣ်မုၢ်မုၢ်ကၠိတဖၣ်ဘၣ်ပံးကွံာ်သးအါအါဂီၢ်ဂီၢ်အဃိၦၤကၠိဖိတဖၣ်လဲၤစံၣ်ထီၣ်အိၣ်လၢကီၢ်ဆၢဘၣ်ကီဘၣ်ခဲဒဲက၀ီၤပူၤအါအါဂီၢ်ဂီၢ်ဒီးဆဲးမၤလိက့ၤတၢ်ဖဲန့ၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ