လါယူၤလံ ၇ သီ, ၂၀၂၅ နံၣ်, ခ့ၣ်အဲးစံၣ်
မၤနၢၤပျီပယီၤသုးကလၢၤလၢအိၣ်ဆီလီၤသးဖဲခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ၀ဲၤလီၢ်ခိၣ်သ့ၣ်လီၢ်လံၤတၢ်လီၢ်လၢန့ၢ်၀ဲ အနံၣ်(၃၀)အံၤန့ၣ် လၢတၢ်ကထီၣ်မၤန့ၢ်က့ၤသုးကလၢၤအံၤအဂီၢ် သုးခိၣ်(၂)ဂၤလၢအတီခိၣ်ရိၣ်မဲရဲၣ်ကျဲၤတၢ်ဒုးဘျီ၀ဲအံၤ တၢ်ဟ့ၣ် လၤကပီၤအီၤလၢကီၢ်သူလ့ၤတၢ်သးဒူကဘျၣ်တၢ်လၤကပီၤအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပၥ်ဖျါဖဲတနံၤအံၤန့ၣ်လီၤ.
ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)၀ဲၤလီၢ်ခိၣ်သ့ၣ် တၢ်ဒုးစဲးပြဲးမူဒါခိၣ် သုးခိၣ်ဒိၣ်ဂီၢ်ဂ့ၢ် စီၤခ့ၤလ့ ဒီး သုးရ့ၣ် (၂၂) သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤတ့ၤမၠ့ၣ်ထူ ၂ ဂၤအံၤ လၢကထီၣ်မၤန့ၢ်က့ၤမၤနၢၤပျီသုးကလၢၤအံၤအဂီၢ် ခီဖျိအ၀ဲသ့ၣ် မ့ၢ်ပှၤ လၢအ တီခိၣ်ရိၣ်မဲရဲၣ်ကျဲၤတၢ်အဃိဘၣ်တၢ်ဟ့ၣ်လၤကပီၤအီၤကီၢ်သူလ့ၤတၢ်သးဒူကဘျၣ်တၢ်လၤကပီၤအံၤ ဖဲလါယူၤ ၅ သီ လၢ အလီၤဘၣ်၀ဲ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)မုၢ်နံၤဆၢက့ၤတၢ်ရဲၣ်တၢ်ကျဲၤအပူၤန့ၣ်လီၤ.
ဘၣ်ဃးတၢ်ဟ့ၣ်လၤကပီၤ၀ဲတၢ်သးဒူတၢ်လၤကပီၤအံၤန့ၣ် သုးရ့ၣ်(၂၂)သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤတ့ၤမၠ့ၣ်ထူ လၢအဒိး န့ၢ်ဘၣ် တၢ်လၤကပီၤအံၤ စံး၀ဲလၢ “ပထံၣ်ဘၣ်လၢပှၤဟ့ၣ်ပှၤတၢ်လၤကပီၤခီဖျိလၢပမၤန့ၢ်က့ၤမၤနၢၤပျီအဖီခိၣ်မီၤ .တၢ်မၤ သ့ၣ်တဖၣ်အံၤ တမ့ၢ်လၢပမၤသ့တဂၤဘၣ်,ပပၥ်ဖှိၣ်ထီၣ်သးပမၤဒီဒူၣ်လီၤ.တၢ်လၤကပီၤတခါအံၤပှၤဟ့ၣ်ပှၤကညီလၢအပၣ်ဃုၥ်တဖၣ်ကိးဂၤဒဲးဃၣ်ဃၣ်လီၤ.ဘၣ်ဆၣ်မ့မ့ၢ်လၢတၢ်သူၣ်ဒူသးဒူတၢ်လၤကပီၤတခါန့ၣ်ပှၤဟ့ၣ်ဒၣ်ထဲယၤဒီးသုးခိၣ်စီၤခ့ၤလ့ခံဂၤလီၤ.ခိၣ်နၢ်လၢတၢ်ဖီခိၣ်ထံၣ်၀ဲအကြၢး၀ဲဘၣ်၀ဲအဃိဟ့ၣ်၀ဲလီၤ.တၢ်သးသဟီၣ်ဒုအိၣ်ပှဲၤပှဲၤတချုးလၢပှၤဟ့ၣ်ပှၤတၢ်လၤကပီၤဒံးဘၣ်အခါလံ.ဒ်ပမ့ၢ်သုးဖိတဂၤအသိးပဟဲအခါန့ၣ်ပအၢၣ်လီၤသးလၢပကမၤတၢ်လၢထံကီၢ်ဒီးပှၤကလုၥ်ဂီၢ်,ပကဒီသဒၢပပှၤကလုၥ်ဒီးပကမၤထူၣ်ဖျဲးထီၣ်က့ၤပှၤကလုၥ်လၢကုၢ်အလီၢ်အဂီၢ်လီၤ.”အဂ့ၢ်န့ၣ် စံး၀ဲန့ၣ်လီၤ.
တကးဒံးဘၣ်လၢတၢ်ကမၤန့ၢ်က့ၤသုးကလၢၤအံၤအဂီၢ် သုးခိၣ်စီၤခ့ၤလ့ ဒီး သုးခိၣ် စီၤတ့ၤမၠ့ၣ်ထူ ခံဂၤအံၤ အမဲၥ်ညါ ခိၣ်နၢ်သိၣ်ဒူ, သုးဖိသံၣ်ဖိလၢအပၣ်ဃုၥ်လၢတၢ်ထီၣ်မၤနၢၤပျီတၢ်ဒုးအပူၤအံၤတဖၣ်လၢအိၣ်ဒီးသးလၢအဒူအဃိၤတဖၣ်စ့ၢ်ကီး ကညီဒီ ကလုၥ် တၢ်ထူၣ်ဖျဲးသုးမုၢ်ဒိၣ်(KNLA)၀ဲၤလီၢ်ခိၣ်သ့ၣ် ဟ့ၣ်လၤကပီၤအ၀ဲသ့ၣ်လၢလံၥ်တၢ်လၤကပီၤကိးဂၤစုၥ်စုၥ်အဂ့ၢ်န့ၣ် ခ့ၣ်အဲၣ်ယူၣ် စံး၀ဲ န့ၣ်လီၤ.
ပယီၤသုးခီၣ်ချ့သုးရ့ၣ်(ခမရ-၉၁၃)သုးကလၢၤလၢအိၣ်မၤနၢၤပျီဟီၣ်က၀ီၤ (သုးက့ ၇)တၢ်ပၢအပူၤအံၤ ကညီဒီကလုၥ်တၢ်ထူၣ် ဖျဲးသုးမုၢ်ဒိၣ်(KNLA), ကညီဒီကလုၥ်ဂၢၤသးကရၢ (KNDO) ဒီးသိၣ်မှံၤသုးပၥ်ဖှိၣ်တဖၣ် ထီၣ်မၤန့ၢ်က့ၤ၀ဲ ဖဲအပူၤကွံၥ် (၂၀၂၄)လါဒံၣ်စ့ဘၢၣ် ၁၆ သီအခါန့ၣ်လီၤ.
သုးကလၢၤအံၤ ဖဲအပူၤကွံၥ်တ့ၢ်(၁၉၉၅)နံၣ် လါယနူၤအါရံၤ ၂၇ သီအခါန့ၣ် လၢဘူးဒးတၢ်ဘါတၢ်ဂုၤထီၣ်ပသီထီၣ်ကညီသုးမုၢ်ဒိၣ် (DKBA)ထုးဖးသးကရူၢ်အတၢ်ပၥ်ဖှိၣ်မၤသကိးတၢ်အဃိ ဖဲန့ၣ်(န၀တ)သုးထီၣ်ဟံန့ၢ်က့ၤ၀ဲသုးကလၢၤအံၤန့ၣ်လီၤ.
တၢ်လၤကပီၤလၢတၢ်ဟ့ၣ်၀ဲဒ်အံၤန့ၣ် ဖဲအပူၤကွံၥ်လါယနူၤအါရံၤ ၃၁ သီလၢအလီၤဘၣ်၀ဲကညီဒီကလုၥ်တၢ်ပၢၢ်ဆၢမုၢ်နံၤ အခါန့ၣ်စ့ၢ်ကီး ခ့ၣ်အဲၣ်ယူၣ်- ကညီ ဒီကလုၥ်စၢဖှိၣ်ကရၢ ဟ့ၣ်လၤကပီၤ၀ဲ Cobra သုးကျိၤခိၣ် သုးခိၣ်ဒိၣ်ဖိ စီၤကိၤကိၤ(ကိး) စီၤဒးဘီလၢ ကီၢ်သူလ့ၤတၢ်သးဒူကဘျၣ် တၢ်လၤကပီၤအံၤဒံးန့ၣ်လီၤ.
