ခီဖျိဟံၣ်လဲထီၣ်အဃိကမျၢၢ်လၢအဃ့ၢ်တၢ်ဒုးတဖၣ်အံၤတၢ်ကီတၢ်ခဲအိၣ်ထီၣ်လၢတၢ်အိၣ်တၢ်ဆိးလီၢ်ကျဲအဂီၢ်

လါအီကူး ၁ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်ဒီးတီအူကီၢ်ရ့ၣ်အပူၤ ခီဖျိဟီၣ်က၀ီၤပူၤတၢ်အိၣ်သး တဂၢၢ်တကျၢၤဘၣ်အဃိ ကမျၢၢ်လၢအလဲၤဃ့ၢ်အိၣ်ဆူ(စ့ၣ်တီမၠ့ၣ်)ကျိမုၢ်ထီၣ်တကပၤန့ၣ်သ့ၣ်တဖၣ် တကီၢ်ခါခဲအံၤ ခီဖျိဟံၣ်လဲထီၣ်အဃိအ၀ဲသ့ၣ်အံၤလၢကဟးအိၣ်ဆိးတၢ်လီၢ်တၢ်ကျဲအဂီၢ်ထံၣ်ဘၣ်၀ဲတၢ်ကီတၢ်ခဲ အဂ့ၢ်န့ၣ် သ့ၣ်ညါဘၣ်လၢၦၤမၤစၢၤၦၤဃ့ၢ်မှံဟးဖျိးသ့ၣ်တဖၣ်အအိၣ်န့ၣ်လီၤႉ

ခီဖျိတၢ်ဒုးကဲထီၣ်၀ဲလၢပယီၤသုးဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤအဃိသၣ်တီၣ်ကၠံကီၢ်ဆၣ်ဒီးလၢၢ်ဒိၣ်ႇ ဆီထံးကီၢ်ဆၣ်ပူၤ ကမျၢၢ်သ့ၣ်တဖၣ်အံၤလဲၤစံၣ်အိၣ်၀ဲလၢတီအူ၀့ၢ်(စ့ၣ်တီမၠ့ၣ်)ကျိမုၢ်ထီၣ်တကပၤန့ၣ်ဒီး ခီဖျိၦၤနီၣ်ဂံၢ်အါအဃိအ၀ဲသ့ၣ်ထံၣ်ဘၣ်၀ဲတၢ်ကီတၢ်ခဲလၢဟံၣ်လဲၦ့ၤထီၣ်အဂ့ၢ်န့ၣ် လီၢ်က၀ီၤကမျၢၢ်လၢအမၤစၢၤ ၦၤဃ့ၢ်မှံ ဟးဖျိးတဂၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“တၢ်ဒုးကဲထီၣ်ဘျီအါဒၣ်တက့ၢ်န့ၣ်ၦၤလဲၤစံၣ်အိၣ်လၢတီအူတကပၤန့ၣ်ႇအ၀ဲသ့ၣ်လဲၤအိၣ်စိ၀ဲလၢအဘူးအတံၢ်အဟံၣ်ဒ်န့ၣ်လီၤမီၤနီၤႉမ့မ့ၢ်ဟံၣ်လၢၦၤဟ့ၣ်ဒုးအိၣ်ခီလီတဖၣ်န့ၣ်စ့ၢ်ကီးၦၤကညီအိၣ်ၦဲၤၦဲၤလီၤအဃိအ၀ဲသ့ၣ်တနီၤန့ၣ်ဘၣ်ငါအိၣ်ဟံၣ်လီၤႉဟံၣ်ဒီဂ့ၢ်တနီၤန့ၣ်အၦ့ၤအိၣ်ထဲအကလးလီၤဘၣ်ဆၣ်မ့မ့ၢ်ဟံၣ်ဖးဒိၣ်ခီန့ၣ်အၦ့ၤအိၣ်လၢ(၂)ကလီၢ်ႇ (၃)ကလီၢ်ညါ”အဂ့ၢ်န့ၣ် စံး၀ဲန့ၣ်လီၤႉ

ၦၤလၢအဟဲစံၣ်အိၣ်ဖဲတီအူပူၤတဖၣ်အိၣ်ဆိ၀ဲဒၣ်လၢတၢ်ဘါယွၤသရိာ်ကရၢၢ်ပူၤဒီးတနီၤန့ၣ်အိၣ်လၢအဘူးအတံၢ်ဟံၣ်အိၣ်၀ဲအသိးႇခီဖျိကတံာ်ကတူာ်အဃိၦၤဃ့ၢ်တၢ်ဒုးဖိလၢအကျိၣ်အိၣ်စ့အိၣ်တဖၣ်တနီၤန့ၣ်တၢ်ကီတၢ်ခဲအိၣ်လၢ ကဟးဃုငါအိၣ်ဟံၣ်အဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ

“ဟံၣ်လဲထီၣ်အဃိအ၀ဲသ့ၣ်ဟးဃုငါအိၣ်ဟံၣ်လၢအၦ့ၤဘၣ်တစဲးမီၤနီၤႉဘၣ်ဆၣ်အ၀ဲသ့ၣ်ဟးဃု၀ဲတဘၣ်ဘၣ်အဃိ လီလီစဲၤအ၀ဲသ့ၣ်ဘၣ်အိၣ်ဆိ၀ဲလၢအဘူးအတံၢ်ဟံၣ်တစိၢ်တလီၢ်ဒ်န့ၣ်လီၤမီၤနီၤ”အဂ့ၢ်န့ၣ် ၦၤလၢအိၣ်ဃ့ၢ်ထီၣ်လၢယၤဒိၣ်သ၀ီတကပၤတဂၤ စံး၀ဲန့ၣ်လီၤႉ

လၢခ့ၣ်အဲၣ်ယူၣ်(သုးက့ ၂)ဟီၣ်က၀ီၤ တီအူကီၢ်ရ့ၣ် သၣ်တီၣ်ကၠံကလံၤစိး ယၤဒိၣ်သ၀ီပူၤန့ၣ် ဖဲအပူၤကွံာ်လါယူၤလံ ၁၁ သီအခါ တၢ်ဒုးကဲထီၣ်၀ဲလၢပယီၤသုးဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤဒီး ဖဲန့ၣ်၀ံၤလီၢ်ခံခီဖျိကဘီယူၤ ဟဲခးလီၤတၢ် တပယူာ်ဃီအဃိ ကမျၢၢ်အဟံၣ်အဃီတၢ်သူၣ်ထီၣ်ဟးဂီၤ၀ဲအါအါဂီၢ်ဂီၢ်ဒီး လီၢ်က၀ီၤကမျၢၢ်အဂၤ (၂၀၀၀)ဘျဲၣ် ဘၣ်ဃ့ၢ်ထီၣ်၀ဲတုၤလၢခဲအံၤတစုန့ၣ်လီၤႉ

ဒ်န့ၣ်အသိးဖဲအပူၤကွံာ်တနွံအခါန့ၣ်တၢ်ဒုးကဲထီၣ်၀ဲဒၣ်လၢခ့ၣ်အဲၣ်ယူၣ်(သုးက့ ၃) ချၢၣ်လွံၢ်ထူၣ်ကီၢ်ရ့ၣ်ပူၤဒီး ခီဖျိပယီၤသုးနုာ်လီၤလၢသ၀ီပူၤ ခးလီၤကျိဖးဒိၣ်ဆူသ၀ီပူၤအဃိ သ၀ီ(၄၁)ဖျၢၣ် လီၢ်က၀ီၤကမျၢၢ်အဂၤ(၈၀၀၀)ဃၣ်ဃၣ် ဘၣ်ဃ့ၢ်ထီၣ်၀ဲအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲတ့ၢ်ဃာ်၀ဲဖဲလါယူၤလံ ၂၈ သီအနံၤန့ၣ်လီၤႉ